ਬਟਾਲਾ, 8 ਜਨਵਰੀ (ਪੋਸਟ ਬਿਊਰੋ)- ਵਸੀਅਤ ਕਰਵਾਉਣ ਲਈ ਪਟਵਾਰੀ ਵੱਲੋਂ ਪਿੰਡ ਮੜੀਆਂਵਾਲ ਦੇ ਵਿਅਕਤੀ ਤੋਂ 12 ਹਜ਼ਾਰ ਰੁਪਏ ਰਿਸ਼ਵਤ ਲੈਣ ਦੀ ਸ਼ਿਕਾਇਤ 'ਤੇ ਵਿਜੀਲੈਂਸ ਨੇ ਛਾਪਾ ਮਾਰ ਕੇ ਪਟਵਾਰੀ ਦੇ ਕਾਰਿੰਦੇ ਨੂੰ ਰਿਸ਼ਵਤ ਦੇ ਲਈ ਪੈਸਿਆਂ ਨਾਲ ਗ੍ਰਿਫਤਾਰ ਕਰ ਲਿਆ ਅਤੇ ਪਟਵਾਰੀ ਅਤੇ ਕਾਰਿੰਦੇ 'ਤੇ ਕੇਸ ਦਰਜ ਕਰ ਲਿਆ ਹੈ।
ਸ਼ਿਕਾਇਤ ਕਰਤਾ ਜਗਤਾਰ ਸਿੰਘ ਵਾਸੀ ਮੜੀਆਂਵਾਲ ਨੇ ਦੱਸਿਆ ਕਿ ਉਸ ਦੇ ਮਾਮੇ ਦਾ ਦਿਹਾਂਤ ਹੋ ਗਿਆ ਅਤੇ ਮਾਮੇ ਦਾ ਇਕਲੌਤਾ ਬੇਟਾ ਇਟਲੀ ਵਿੱਚ ਰਹਿੰਦਾ ਹੈ। ਮਾਮੇ ਦੇ ਬੇਟੇ ਦੇ ਨਾਂਅ ਮਾਮੇ ਦੀ ਵਸੀਅਤ ਵਿੱਚ ਕਰਾਉਣ ਦੇ ਲਈ ਪਟਵਾਰੀ ਸੁਰਜੀਤ ਸਿੰਘ ਨਾਲ ਸੰਪਰਕ ਕੀਤਾ ਤਾਂ ਪਟਵਾਰੀ ਨੇ 15 ਹਜ਼ਾਰ ਰੁਪਏ ਵਸੀਅਤ ਕਰਨ ਲਈ ਮੰਗੇ। ਬਾਅਦ ਵਿੱਚ 12 ਹਜ਼ਾਰ ਵਿੱਚ ਤੈਅ ਕਰ ਕੇ ਵਿਜੀਲੈਂਸ ਨੂੰ ਸ਼ਿਕਾਇਤ ਦੇ ਦਿੱਤੀ। ਸ਼ਿਕਾਇਤ 'ਤੇ ਕੱਲ੍ਹ ਵਿਜੀਲੈਂਸ ਨੇ ਪਟਵਾਰੀ ਦੇ ਕਾਰਿੰਦੇ ਤੋਂ ਰਿਸ਼ਵਤ ਦੇ 12 ਹਜ਼ਾਰ ਰੁਪਏ ਸਮੇਤ ਰੰਗੇ ਹੱਥ ਗ੍ਰਿਫਤਾਰ ਕਰ ਲਿਆ।