ਅੰਮ੍ਰਿਤਸਰ, 8 ਜਨਵਰੀ (ਪੋਸਟ ਬਿਊਰੋ)- ਬੀਤੀ 29 ਦਸੰਬਰ ਨੂੰ ਜੰਡਿਆਲਾ ਗੁਰੂ ਦੇ ਖਲਹਿਰਾ ਪਿੰਡ ਵਿੱਚ ਸਾਬਕਾ ਕਾਂਗਰਸੀ ਸਰਪੰਚ ਦੇ ਜੀਜੇ ਦੀ ਹੱਤਿਆ ਚੋਣ ਦੀ ਰੰਜਿਸ਼ ਵਿੱਚ ਨਹੀਂ ਹੋਈ ਸੀ, ਸਗੋਂ ਸਾਬਕਾ ਕਾਂਗਰਸੀ ਸਰਪੰਚ ਨੇ ਹੀ ਚੋਣਾਂ ਵਿੱਚ ਹਮਦਰਦੀ ਲੈਣ ਲਈ ਜੀਜੇ ਦੀ ਹੱਤਿਆ ਕਰਵਾਈ ਸੀ।
ਇਸ ਕੇਸ ਦੀ ਜਾਂਚ ਤੋਂ ਇਹ ਭੇਦ ਖੁੱਲ੍ਹਾ ਕਿ ਸਾਬਕਾ ਸਰਪੰਚ ਜਸਮੇਰ ਸਿੰਘ ਦਾ ਵੱਡਾ ਭਰਾ ਸੋਨਾ ਸਿੰਘ ਸਾਬਕਾ ਖਾੜਕੂ ਸੀ। ਤਰਸੇਮ ਸਿੰਘ ਨੇ ਸਾਲ 1991 ਵਿੱਚ ਪੁਲਸ ਨੂੰ ਸੂਚਨਾ ਦੇ ਕੇ ਉਸ ਨੂੰ ਗ੍ਰਿਫਤਾਰ ਕਰਾਇਆ ਸੀ। ਇਸ ਗੁੱਸੇ ਵਿੱਚ ਸਾਬਕਾ ਸਰਪੰਚ ਨੇ ਆਪਣੇ ਜੀਜੇ ਦੀ ਹੱਤਿਆ ਦੀ ਸਾਜ਼ਿਸ਼ ਰਚੀ। ਤਰਸੇਮ ਸਿੰਘ ਦਾ ਕਤਲ ਕਰ ਕੇ ਜਸਮੇਰ ਸਿੰਘ ਨੇ ਭਰਾ ਦਾ ਬਦਲਾ ਵੀ ਲੈ ਲਿਆ ਅਤੇ ਚੋਣਾਂ ਵਿੱਚ ਲੋਕਾਂ ਦੀ ਹਮਦਰਦੀ ਵੀ ਲੈਂਦਾ ਰਿਹਾ, ਪਰ ਪੁਲਸ ਦੇ ਸਾਹਮਣੇੇ ਝੂਠੀ ਕਹਾਣੀ ਜ਼ਿਆਦਾ ਦੇਰ ਨਹੀਂ ਟਿਕੀ। ਪੁਲਸ ਨੇ ਜਸਮੇਰ ਸਿੰਘ, ਟੀਟੂ ਸਿੰਘ ਤੇ ਜਗੀਰ ਸਿੰਘ ਨੂੰ ਗ੍ਰਿਫਤਾਰ ਕਰ ਲਿਆ ਹੈ।
ਅੰਮ੍ਰਿਤਸਰ ਦਿਹਾਤੀ ਪੁਲਸ ਦੇ ਮੁਖੀ ਪਰਮਪਾਲ ਸਿੰਘ ਅਤੇ ਐੱਸ ਪੀ (ਡੀ) ਹਰਪਾਲ ਸਿੰਘ ਨੇ ਪ੍ਰੈੱਸ ਕਾਨਫਰੰਸ ਕਰ ਕੇ ਦੱਸਿਆ ਕਿ 29 ਦਸੰਬਰ ਨੂੰ ਤਰਸੇਮ ਸਿੰਘ ਦੇ ਕਤਲ ਕੇਸ ਵਿੱਚ ਅਕਾਲੀ ਵਰਕਰ ਹਰਜਿੰਦਰ ਸਿੰਘ, ਜਸਪਾਲ ਸਿੰਘ, ਕੁਲਦੀਪ ਸਿੰਘ ਸਣੇ ਤਿੰਨ ਅਣਪਛਾਤੇ ਲੋਕਾਂ ਦੇ ਖਿਲਾਫ ਜੰਡਿਆਲਾ ਗੁਰੂ ਥਾਣੇ ਵਿੱਚ ਕੇਸ ਦਰਜ ਕੀਤਾ ਗਿਆ ਸੀ। ਜਾਂਚ ਦੌਰਾਨ ਪੀੜਤ ਧਿਰ ਦੀ ਕਹਾਣੀ ਮਿਲ ਨਹੀਂ ਰਹੀ ਸੀ। ਜਾਂਚ ਸ਼ੁਰੂ ਕੀਤੀ ਤਾਂ ਭੇਦ ਖੁੱਲ੍ਹ ਗਿਆ। ਕਤਲ ਕਰਨ ਤੋਂ ਪਹਿਲਾਂ ਇਹ ਸਾਜ਼ਿਸ਼ ਰਚੀ ਗਈ ਸੀ ਕਿ ਤਰਸੇਮ ਸਿੰਘ ਦੇ ਕਤਲ ਦਾ ਦੋਸ਼ ਅਕਾਲੀ ਵਰਕਰਾਂ 'ਤੇ ਲੱਗੇਗਾ ਤਾਂ ਲੋਕਾਂ ਦੀ ਹਮਦਰਦੀ ਜਸਮੇਰ ਅਤੇ ਉਸ ਦੇ ਪਰਵਾਰ ਨਾਲ ਜੁੜੇਗੀ, ਪਰ ਪੁਲਸ ਨੇ ਪੰਜ ਦਿਨ ਦੀ ਜਾਂਚ ਦੇ ਬਾਅਦ ਦੋਸ਼ੀਆਂ ਦੀ ਕਹਾਣੀ ਸਾਫ ਕਰ ਦਿੱਤੀ ਅਤੇ ਪਹਿਲਾਂ ਨਾਮਜ਼ਦ ਅਕਾਲੀ ਵਰਕਰਾਂ ਨੂੰ ਕਲੀਨ ਚਿਟ ਦੇਣ ਦਾ ਕੰਮ ਸ਼ੁਰੂ ਕਰ ਦਿੱਤਾ ਹੈ।