ਫਿਰੋਜ਼ਪੁਰ, 8 ਜਨਵਰੀ (ਪੋਸਟ ਬਿਊਰੋ)- ਨਾਰਕੋਟਿਕਸ ਸੈਲ ਨੇ 94 ਹਜ਼ਾਰ ਰੁਪਏ ਦੀ ਜਾਅਲੀ ਕਰੰਸੀ ਨਾਲ ਦੋ ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਇਨ੍ਹਾਂ ਤੋਂ ਕੰਪਿਊਟਰ, ਸਕੈਨਰ ਤੇ ਹੋਰ ਦਸਤਾਵੇਜ਼ ਮਿਲੇ ਹਨ। ਇਨ੍ਹਾਂ ਵਿੱਚੋਂ ਇਕ ਦੋਸ਼ੀ ਟੀਚਰ ਹੈ ਅਤੇ ਦੂਸਰੇ ਦੀ ਪਤਨੀ ਟੀਚਰ ਹੈ। ਇਨ੍ਹਾਂ ਕੋਲੋਂ ਦੋ ਹਜ਼ਾਰ, ਪੰਜ ਸੌ ਅਤੇ ਦੋ ਸੌ ਰੁਪਏ ਦੇ ਲਗਭਗ 275 ਨੋਟ ਮਿਲੇ ਹਨ। ਉਰ ਥਾਣਾ ਕੈਂਟ ਪੁਲਸ ਨੇ ਕੱਲ੍ਹ ਦੋਵਾਂ ਦੋਸ਼ੀਆਂ ਖਿਲਾਫ ਮਾਮਲਾ ਦਰਜ ਕਰ ਲਿਆ ਹੈ।
ਇਸ ਸੰਬੰਧ ਵਿੱਚ ਨਾਰਕੋਟਿਕਸ ਸੈਲ ਦੇ ਏ ਐਸ ਆਈ ਦਲਵਿੰਦਰ ਸਿੰਘ ਨੇ ਪੁਲਸ ਨੂੰ ਬਿਆਨ ਦਿੱਤੇ ਹਨ ਕਿ ਉਨ੍ਹਾਂ ਨੂੰ ਸੂਚਨਾ ਮਿਲੀ ਸੀ ਕਿ ਫਰੀਦਕੋਟ ਵਿੱਚ ਫਿਰੋਜ਼ਪੁਰ ਰੋਡ ਦੇ ਸੁੰਦਰ ਨਗਰ ਦੇ ਵਾਸੀ ਸੁਰਜੀਤ ਸਿੰਘ ਅਤੇ ਥਾਣਾ ਗੁਰੂਹਰਸਹਾਏ ਦੇ ਬਾਬੇ ਤਾਰੇ ਵਾਲਾ ਖੂਹ ਦਾ ਵਸਨੀਕ ਦੇਸ ਰਾਜ ਉਰਫ ਦੇਸਾ ਜਾਅਲੀ ਕਰੰਸੀ ਬਣਾ ਕੇ ਬਾਜ਼ਾਰ ਵਿੱਚ ਚਲਾਉਂਦੇ ਹਨ। ਇਸ ਸਮੇਂ ਛਾਉਣੀ ਦੇ ਆਰੀਆ ਅਨਾਥਾਲਯ ਸਕੂਲ ਦੇ ਪਿੱਛੇ ਕੱਚੇ ਰਸਤੇ 'ਤੇ ਦੋਵੇਂ ਜਾਅਲੀ ਕਰੰਸੀ ਲੈ ਕੇ ਜਾ ਰਹੇ ਹਨ। ਪੁਲਸ ਨੇ ਛਾਪਾ ਮਾਰ ਕੇ ਦੋਵਾਂ ਦੀ ਤਲਾਸ਼ੀ ਲਈ ਤਾਂ ਉਨ੍ਹਾਂ ਕੋਲੋਂ 94 ਹਜ਼ਾਰ ਦੇ ਜਾਅਲੀ ਨੋਟ ਮਿਲੇ। ਦੇਸ ਰਾਜ ਇਕ ਸਰਕਾਰੀ ਸਕੂਲ ਵਿੱਚ ਟੀਚਰ ਹੈ। ਉਹ ਕਾਂਟ੍ਰੈਕਟ ਉੱਤੇ ਹੈ। ਨਾਰਕੋਟਿਕਸ ਸੈਲ ਦੇ ਅਧਿਕਾਰੀਆਂ ਦੇ ਮੁਤਾਬਕ ਦੋਵੇਂ ਦੋਸ਼ੀ ਦੋ ਹਜ਼ਾਰ, ਪੰਜ ਸੌ ਤੇ ਦੋ ਸੌ ਰੁਪਏ ਦੇ ਨੋਟ ਤਿਆਰ ਕਰਦੇ ਸਮੇਂ ਉਸ ਵਿੱਚ ਚਮਕੀਲੀ ਤਾਰ ਵੀ ਪਾਉਂਦੇ ਸਨ। ਐਸ ਪੀ (ਡੀ) ਬਲਜੀਤ ਸਿੰਘ ਦਾ ਕਹਿਣਾ ਹੈ ਕਿ ਦੋਸ਼ੀਆਂ ਤੋਂ ਪੁੱਛਗਿੱਛ ਕੀਤੀ ਜਾ ਰਹੀ ਹੈ ਕਿ ਇਹ ਲੋਕ ਕਿਨ੍ਹਾਂ-ਕਿਨ੍ਹਾਂ ਨੂੰ ਜਾਅਲੀ ਕਰੰਸੀ ਸਪਲਾਈ ਕਰਦੇ ਸਨ।