ਸਿਰਸਾ, 6 ਜਨਵਰੀ, (ਪੋਸਟ ਬਿਊਰੋ)- ਹਰਿਆਣਾ ਦੇ ਇਸ ਜਿ਼ਲਾ ਕੇਂਦਰ ਵਾਲੇ ਸ਼ਹਿਰ ਵਿੱਚ ਅੱਜ ਦੁਪਹਿਰ ਬਾਅਦ ਡੇਰਾ ਸੱਚਾ ਸੌਦਾ ਦੇ ਮੁੱਖ ਕੇਂਦਰ ਦੇ ਦੁਆਲੇ ਵੱਡੀ ਗਿਣਤੀ ਵਿਚ ਪੁਲਿਸ ਤੇ ਅਰਧ ਫੌਜੀ ਦਸਤੇ ਲਾ ਦਿਤੇ ਗਏ ਤੇ ਡੇਰੇ ਦੇ ਅੰਦਰ ਜਾਂ ਬਾਹਰ ਜਾਣ ਵਾਲੇ ਹਰ ਵਿਅਕਤੀ ਉੱਤੇ ਨਜ਼ਰ ਰੱਖੀ ਜਾਣ ਲੱਗ ਪਈ ਹੈ। ਪਤਾ ਲੱਗਾ ਹੈ ਕਿ ਡੇਰਾ ਪ੍ਰਬੰਧਕਾਂ ਨੂੰ ਕਿਹਾ ਗਿਆ ਹੈ ਕਿ ਅਗਲੇ ਦਿਨਾਂ ਵਿਚ ਕੋਈ ਵੀ ਮੀਟਿੰਗ ਜਾਂ ਪ੍ਰੋਗਰਾਮ ਨਾ ਕੀਤਾ ਜਾਵੇ।
ਇਸ ਚਰਚਿਤ ਤੇ ਵਿਵਾਦਤ ਡੇਰੇ ਦੇ ਅੰਦਰੂਨੀ ਸੂਤਰਾਂ ਦਾ ਕਹਿਣਾ ਹੈ ਕਿ ਡੇਰਾ ਪ੍ਰਬੰਧਕਾਂ ਨੇ ਹੇਠਾਂ ਹਰ ਪੱਧਰ ਦੇ ਆਪਣੇ ਕਾਰਕੁਨਾਂ ਨੂੰ ਕੋਈ ਸਮਾਜੀ ਜਾਂ ਧਾਰਮਿਕ ਇਕੱਠ ਕਰਨੋਂ ਰੋਕ ਦਿਤਾ ਹੈ। ਪਤਾ ਲੱਗਾ ਕਿ ਸਿਰਸਾ ਸ਼ਹਿਰ ਦੇ ਨਾਲ ਹੀ ਹਰਿਆਣਾ ਤੇ ਪੰਜਾਬ ਦੇ ਹੋਰ ਸ਼ਹਿਰਾਂ ਅਤੇ ਕਸਬਿਆਂ ਵਿਚ ਬਣੇ ਹੋਏ ਡੇਰਿਆਂ ਵਿਚ ਸਵੇਰੇ ਸ਼ਾਮ ਦੀ ‘ਨਾਮ ਚਰਚਾ’ ਦੇ ਪ੍ਰੋਗਰਾਮ ਵੀ ਕੁਝ ਦਿਨਾਂ ਲਈ ਰੋਕ ਦਿਤੇ ਗਏ ਹਨ। ਡੇਰੇ ਦੇ ਅੰਦਰੂਨੀ ਸੂਤਰਾਂ ਨੂੰ ਇਹ ਪੁੱਛਣ ਉੱਤੇ ਕਿ ਇਸ ਤਰ੍ਹਾਂ ਨਾਮ-ਚਰਚਾ ਕਿਉਂ ਬੰਦ ਕੀਤੀ ਗਈ ਹੈ, ਉਹ ਕੁਝ ਵੀ ਦੱਸਣ ਤੋਂ ਇਨਕਾਰ ਕਰਦੇ ਹਨ।
ਵਰਨਣ ਯੋਗ ਹੈ ਕਿ ਰੋਹਤਕ ਦੀ ਸੋਨਾਰੀਆ ਜੇਲ੍ਹ ਵਿੱਚ ਬੰਦ ਡੇਰਾ ਸੱਚਾ ਸੌਦਾ ਦੇ ਮੁਖੀ ਰਾਮ ਰਹੀਮ ਉੱਤੇ ਚੱਲ ਰਹੇ ਪੱਤਰਕਾਰ ਰਾਮ ਚੰਦਰ ਛੱਤਰਪਤੀ ਦੇ ਕਤਲ ਕੇਸ ਬਾਰੇ ਪੰਚਕੂਲਾ ਵਾਲੀ ਸੀ ਬੀ ਆਈ ਕੋਰਟ ਨੇ 11 ਜਨਵਰੀ ਨੂੰ ਫੈਸਲਾ ਦੇਣਾ ਹੈ। ਪਿਛਲੇ ਬੁਧਵਾਰ ਇਸ ਕੇਸ ਦੀ ਬਹਿਸ ਖਤਮ ਹੋ ਗਈ ਸੀ ਅਤੇ ਇਸ ਕੇਸ ਦਾ ਫੈਸਲਾ ਵੀ ਡੇਰਾ ਮੁਖੀ ਰਾਮ ਰਹੀਮ ਨੂੰ ਪਹਿਲੇ ਕੇਸ ਵਿਚ ਸਜ਼ਾ ਦੇਣ ਵਾਲੇ ਜੱਜ ਵਲੋਂ ਹੀ ਸੁਣਾਇਆ ਜਾਣਾ ਹੈ।