ਲਖਨਊ, 6 ਜਨਵਰੀ (ਪੋਸਟ ਬਿਊਰੋ)- ਸਮਾਜਵਾਦੀ ਪਾਰਟੀ ਦੇ ਰਾਜ ਵਿੱਚ ਕਰੋੜਾਂ ਰੁਪਏ ਦੇ ਮਾਈਨਿੰਗ ਘੁਟਾਲੇ ਵਿੱਚ ਸੀ ਬੀ ਆਈ ਨੇ ਸ਼ਨੀਵਾਰ ਵੱਡੀ ਕਾਰਵਾਈ ਕੀਤੀ ਹੈ। ਆਈ ਏ ਐੱਸ ਅਧਿਕਾਰੀ ਬੀ ਚੰਦਰਕਲਾ ਦੇ ਲਖਨਊ ਦੇ ਫਲੈਟ ਸਮੇਤ ਹੋਰ ਜ਼ਿਲ੍ਹਿਆਂ ਵਿੱਚ ਮਾਈਨਿੰਗ ਵਿਭਾਗ ਦੇ ਮੁਲਾਜ਼ਮਾਂ ਤੇ ਠੇਕੇਦਾਰਾਂ ਦੇ 14 ਅੱਡਿਆਂ 'ਤੇ ਛਾਪੇਮਾਰੀ ਕੀਤੀ ਦੌਰਾਨ ਸੀ ਬੀ ਆਈ ਨੂੰ ਮਾਈਨਿੰਗ ਘੁਟਾਲੇ ਨਾਲ ਜੁੜੇ ਅਹਿਮ ਦਸਤਾਵੇਜ਼ ਮਿਲੇ ਹਨ।
ਮਿਲੀ ਜਾਣਕਾਰੀ ਅਨੁਸਾਰ ਸੀ ਬੀ ਆਈ ਨੇ 2008 ਬੈਚ ਦੀ ਆਈ ਏ ਐੱਸ ਅਫਸਰ ਚੰਦਰਕਲਾ ਅਤੇ ਐੱਮ ਐੱਲ ਸੀ ਰਮੇਸ਼ ਮਿਸ਼ਰਾ ਸਮੇਤ 11 ਮੁਲਜ਼ਮਾਂ ਵਿਰੁੱਧ ਕੇਸ ਦਰਜ ਕੀਤਾ ਹੈ। ਚੰਦਰਕਲਾ ਇਸ ਵੇਲੇ ਸਟੱਡੀ ਲੀਵ ਉੱਤੇ ਹਨ। ਸਮਾਜਵਾਦੀ ਪਾਰਟੀ ਵਿੱਚ ਮਾਈਨਿੰਗ ਮੰਤਰੀ ਰਹੇ ਗਾਇਤਰੀ ਪ੍ਰਸਾਦ ਪਰਜਾਪਤੀ ਉੱਤੇ ਕਾਨੂੰਨੀ ਸ਼ਿਕੰਜਾ ਕੱਸਿਆ ਜਾਣ ਤੋਂ ਬਾਅਦ ਸੀ ਬੀ ਆਈ ਦਾ ਨਿਸ਼ਾਨਾ ਸਾਬਕਾ ਮੁੱਖ ਮੰਤਰੀ ਅਖਿਲੇਸ਼ ਯਾਦਵ ਵੀ ਹੋ ਸਕਦਾ ਹੈ। ਅਖਿਲੇਸ਼ ਯਾਦਵ ਸਮਾਜਵਾਦੀ ਪਾਰਟੀ ਦੇ ਸ਼ੁਰੂ ਦੇ ਰਾਜ ਵਿੱਚ ਮਾਈਨਿੰਗ ਵਿਭਾਗ ਦੇ ਮੰਤਰੀ ਸਨ। ਚੰਦਰਕਲਾ ਉਸ ਵੇਲੇ ਹਮੀਰਪੁਰ ਦੀ ਜਿ਼ਲਾ ਮੈਜਿਸਟਰੇਟ ਹੋਇਆ ਕਰਦੀ ਸੀ। ਮੁੱਢਲੀ ਜਾਂਚ ਵਿੱਚ ਸੀ ਬੀ ਆਈ ਨੇ ਓਦੋਂ ਦੇ ਮਾਈਨਿੰਗ ਮੰਤਰੀ ਵੱਲ ਇਸ਼ਾਰਾ ਕੀਤਾ ਹੈ। ਇਸ ਆਧਾਰ 'ਤੇ ਸਾਬਕਾ ਮੁੱਖ ਮੰਤਰੀ ਅਖਿਲੇਸ਼ ਯਾਦਵ ਤੋਂ ਵੀ ਪੁੱਛਗਿੱਛ ਕੀਤੀ ਜਾ ਸਕਦੀ ਹੈ।
ਪਤਾ ਲੱਗਾ ਹੈ ਕਿ ਸੀ ਬੀ ਆਈ ਨੇ ਚੰਦਰਕਲਾ ਦਾ ਇੱਕ ਬੈਂਕ ਲਾਕਰ ਅਤੇ ਦੋ ਖਾਤੇ ਸੀਜ਼ ਕੀਤੇ ਹਨ। ਦੱਸਿਆ ਗਿਆ ਹੈ ਕਿ ਲਾਕਰ ਵਿੱਚ ਲੱਖਾਂ ਰੁਪਏ ਦੇ ਗਹਿਣੇ ਹਨ ਤੇ ਬੈਂਕ ਖਾਤਿਆਂ 'ਚ ਮੋਟੀ ਰਕਮ ਹੈ। ਇਸ ਤੋਂ ਇਲਾਵਾ ਸੀ ਬੀ ਆਈ ਟੀਮਾਂ ਨੇ ਹਮੀਰਪੁਰ ਵਿੱਚ ਓਦੋਂ ਦੇ ਮਾਈਨਿੰਗ ਅਫਸਰ ਮੁਈਨਉਦੀਨ, ਮਾਈਨਿੰਗ ਠੇਕੇਦਾਰ ਬਸਪਾ ਆਗੂ ਸੰਜੇ ਦੀਕਸ਼ਿਤ ਦੀ ਕੋਠੀ ਤੋਂ ਇਲਾਵਾ ਕਾਨਪੁਰ, ਨੋਇਡਾ, ਜਾਲੌਨ, ਉਰਈ ਅਤੇ ਦਿੱਲੀ ਸਥਿਤ ਮੁਲਜ਼ਮਾਂ ਦੇ ਟਿਕਾਣਿਆਂ 'ਤੇ ਛਾਪੇਮਾਰੀ ਕੀਤੀ ਅਤੇ ਕਈ ਦਸਤਾਵੇਜ਼ ਕਬਜ਼ੇ ਵਿੱਚ ਲਏ ਹਨ।