ਨਵੀਂ ਦਿੱਲੀ, 5 ਜਨਵਰੀ (ਪੋਸਟ ਬਿਊਰੋ)- ਮਨੂ ਭਾਕਰ ਨੇ ਕੱਲ੍ਹ ਹਰਿਆਣਾ ਦੇ ਖੇਡ ਮੰਤਰੀ ਅਨਿਲ ਵਿਜ ਨੂੰ ਦੋ ਕਰੋੜ ਦੀ ਨਕਦ ਇਨਾਮੀ ਰਾਸ਼ੀ ਬਾਰੇ ਯਾਦ ਕਰਵਾਇਆ ਹੈ, ਜਿਸ ਦਾ ਐਲਾਨ ਇਸ ਨਿਸ਼ਾਨੇਬਾਜ਼ ਵੱਲੋਂ ਯੂਥ ਓਲੰਪਿਕ ਵਿੱਚ ਸੋਨ ਤਮਗਾ ਜਿੱਤਣ ਤੋਂ ਬਾਅਦ ਕੀਤਾ ਗਿਆ ਸੀ, ਪਰ ਅਜੇ ਤੱਕ ਉਸ ਨੂੰ ਇਹ ਨਹੀਂ ਮਿਲੀ।
16 ਸਾਲਾ ਮਨੂ ਭਾਕਰ ਨੇ ਮੰਤਰੀ ਅਨਿਲ ਵਿਜ ਦੇ ਟਵੀਟ ਦਾ ਸਕਰੀਨਸ਼ਾਟ ਪੋਸਟ ਕੀਤਾ ਹੈ, ਜਿਸ ਵਿੱਚ ਉਸ ਨੇ ਸੂਬਾ ਸਰਕਾਰ ਵੱਲੋਂ ਦੋ ਕਰੋੜ ਰੁਪਏ ਦੇ ਨਕਦ ਇਨਾਮ ਦਾ ਵਾਅਦਾ ਕੀਤਾ ਸੀ। ਮਨੂ ਨੇ ਟਵਿਟਰ ਉਤੇ ਲਿਖਿਆ, “ਸਰ, ਕ੍ਰਿਪਾ ਕਰਕੇ ਇਸ ਦੀ ਪੁਸ਼ਟੀ ਕਰੋ ਕਿ ਇਹ ਸਹੀ ਹੈ ਜਾਂ ਫਿਰ ਸਿਰਫ ‘ਜੁਮਲਾ' ਹੀ ਸੀ।” ਮਨੂ ਜਦੋਂ ਓਲੰਪਿਕ 'ਚ ਸੋਨ ਤਮਗਾ ਜਿੱਤਣ ਵਾਲੀ ਪਹਿਲੀ ਭਾਰਤੀ ਬਣੀ ਤਾਂ ਮੰਤਰੀ ਅਨਿਲ ਵਿਜ ਨੇ ਇਹ ਟਵੀਟ ਕੀਤਾ ਸੀ, ‘ਮਨੂ ਭਾਕਰ ਨੂੰ ਯੂਥ ਓਲੰਪਿਕ ਵਿੱਚ ਨਿਸ਼ਾਨੇਬਾਜ਼ੀ ਦਾ ਸੋਨ ਤਮਗਾ ਜਿੱਤਣ ਉੱਤੇ ਵਧਾਈ।’ ਮੰਤਰੀ ਨੇ ਕਿਹਾ ਸੀ, ‘ਹਰਿਆਣਾ ਸਰਕਾਰ ਮਨੂ ਭਾਕਰ ਨੂੰ ਸੋਨ ਤਮਗਾ ਜਿੱਤਣ ਲਈ ਦੋ ਕਰੋੜ ਰੁਪਏ ਦਾ ਨਕਦ ਇਨਾਮ ਦੇਵੇਗੀ। ਪਿਛਲੀ ਸਰਕਾਰ ਪਹਿਲਾਂ 10 ਲੱਖ ਰੁਪਏ ਦਿੰਦੀ ਸੀ।’ ਇਸ ਦੇ ਬਾਅਦ ਇਹ ਫਰਜ਼ ਭੁਲਾ ਦਿੱਤਾ ਗਿਆ ਸੀ।