ਕੋਲੰਬੋ, 24 ਜਨਵਰੀ (ਪੋਸਟ ਬਿਊਰੋ)- ਸ੍ਰੀਲੰਕਾ ਦੀ ਸਰਕਾਰ ਨੇ ਭਾਰਤੀ ਮਛੇਰਿਆਂ ਦੇ 105 ਉਨ੍ਹਾਂ ਜਹਾਜ਼ਾਂ ਦੀ ਨੀਲਾਮੀ ਕਰਨ ਦਾ ਫ਼ੈਸਲਾ ਕੀਤਾ ਹੈ, ਜਿਨ੍ਹਾਂ ਨੂੰ ਉਨ੍ਹਾਂ ਦੀਆਂ ਬੰਦਰਗਾਹਾਂ ਤੋਂ ਇੱਕ ਜਾਂ ਦੂਸਰੀ ਉਲੰਘਣ ਕਰਨ ਦੇ ਕਾਰਨ ਜ਼ਬਤ ਕੀਤਾ ਗਿਆ ਸੀ। ਇਹ ਨੀਲਾਮੀ 7 ਤੋਂ 11 ਫਰਵਰੀ ਤਕ ਹੋਵੇਗੀ।
ਅਧਿਕਾਰਤ ਸੂਤਰਾਂ ਨੇ ਦੱਸਿਆ ਕਿ ਸ਼੍ਰੀਲੰਕਾਈ ਸਮੁੰਦਰੀ ਸੈਨਾ ਨੇ ਵੱਖ-ਵੱਖ ਮੌਕਿਆਂ ਉੱਤੇ ਸ਼੍ਰੀਲੰਕਾ ਦੇ ਪਾਣੀਆਂ ਵਿੱਚ ਗ਼ੈਰ-ਕਾਨੂੰਨੀ ਮੱਛੀਆਂ ਫੜਨ ਵਾਲੇ ਭਾਰਤੀ ਸਮੁੰਦਰੀ ਜਹਾਜ਼ਾਂ ਨੂੰ ਜ਼ਬਤ ਕੀਤਾ ਸੀ। ਮੱਛੀ ਪਾਲਣ ਵਿਭਾਗ ਕਾਨੂੰਨੀ ਕਾਰਵਾਈ ਤੋਂ ਬਾਅਦ ਅਗਲੇ ਮਹੀਨੇ ਜਨਤਕ ਨਿਲਾਮੀ ਵਿੱਚ ਲੱਗਭਗ 105 ਭਾਰਤੀ ਸਮੁੰਦਰੀ ਜਹਾਜ਼ਾਂ ਦਾ ਨਿਪਟਾਰਾ ਕਰੇਗਾ।ਜ਼ਬਤ ਕੀਤੇ ਜਹਾਜ਼ਾਂ ਦੀ ਨਿਲਾਮੀ ਕਰਨ ਦਾ ਫ਼ੈਸਲਾ ਇਸ ਲਈ ਕੀਤਾ ਗਿਆ ਕਿ ਉਹ ਜਾਂ ਤਾਂ ਅੰਸ਼ਕ ਤੌਰ ਉੱਤੇ ਨੁਕਸਾਨੇ ਗਏ ਹਨ ਜਾਂ ਵਰਤੋਂ ਯੋਗ ਨਹੀਂ ਹਨ। ਇਸ ਤੋਂ ਇਲਾਵਾ ਇਹ ਜਹਾਜ਼ ਕਈ ਸਾਲਾਂ ਤੋਂ ਨੇਵਲ ਜੈਟੀਆਂ ਵਿੱਚ ਖੜ੍ਹੇ ਹਨ ਅਤੇ ਡੇਂਗੂ ਦੇ ਪੈਦਾ ਹੋਣ ਦਾ ਸਥਾਨ ਬਣ ਗਏ ਹਨ। ਉਨ੍ਹਾਂ ਕਿਹਾ ਕਿ ਸਾਨੂੰ ਇਨ੍ਹਾਂ ਜਹਾਜ਼ਾਂ ਤੋਂ ਛੁਟਕਾਰਾ ਪਾਉਣ ਦੀ ਲੋੜ ਹੈ, ਕਿਉਂਕਿ ਅਦਾਲਤੀ ਕਾਰਵਾਈ ਬਹੁਤ ਪਹਿਲਾਂ ਖ਼ਤਮ ਹੋ ਚੁੱਕੀ ਹੈ। ਇਨ੍ਹਾਂ 105 ਜਹਾਜ਼ਾਂ ਵਿੱਚੋਂ 65 ਕਰਾਈਨਗਰ, 24 ਕਿਰਾਂਚੀ, 9 ਤਾਲਾਈਮਾਨ, ਪੰਜ ਕਨਕੇਸੰਤੁਰਾਈ ਅਤੇ ਦੋ ਕਲਪੀਤੀਆ ਵਿਖੇ ਹਨ।
ਜ਼ਿਲ੍ਹਾ ਮੱਛੀ ਪਾਲਣ ਵਿਭਾਗ ਨੇ ਸਮੁੰਦਰੀ ਇੰਜਨੀਅਰਾਂ ਦੀ ਮਦਦ ਨਾਲ ਜ਼ਬਤ ਕੀਤੇ ਜਹਾਜ਼ਾਂ ਦੇ ਮੁਲਾਂਕਣ ਦਾ ਕੰਮ ਸ਼ੁਰੂ ਕਰ ਦਿੱਤਾ ਹੈ। ਜਨਤਕ ਨੋਟਿਸ ਮੁਤਾਬਕ ਇੱਕ ਵਿਅਕਤੀ ਨੂੰ ਨਿਲਾਮੀ ਦੇ ਅਹਾਤੇ ਵਿੱਚ ਦਾਖ਼ਲ ਹੋਣ ਲਈ 1,000 ਰੁਪਏ ਭਰਨੇ ਪੈਣਗੇ ਅਤੇ 31 ਜਨਵਰੀ ਤੋਂ 5 ਫ਼ਰਵਰੀ ਤਕ ਵੱਖ-ਵੱਖ ਥਾਵਾਂ ਉੱਤੇ ਜਹਾਜ਼ਾਂ ਦੀ ਜਾਂਚ ਕਰਨ ਦੀ ਇਜਾਜ਼ਤ ਦਿੱਤੀ ਜਾਵੇਗੀ। ਨਵੇਂ ਸੋਧੇ ਪ੍ਰਬੰਧਾਂ ਹੇਠ ਕੋਈ ਵੀ ਵਿਦੇਸ਼ੀ ਜਹਾਜ਼ ਜੋ ਸ਼੍ਰੀਲੰਕਾ ਦੇ ਪਾਣੀਆਂ ਵਿੱਚ ਦਾਖ਼ਲ ਹੁੰਦਾ ਹੈ ਅਤੇ ਬਿਨਾਂ ਪਰਮਿਟ ਦੇ ਮੱਛੀਆਂ ਫੜਦਾ ਮਿਲਦਾ ਹੈ, ਉਸ ਨੂੰ ‘ਸਰਕਾਰੀ ਜਾਇਦਾਦ' ਐਲਾਨ ਕੀਤਾ ਜਾ ਸਕਦਾ ਹੈ।