ਬੀਜਿੰਗ, 23 ਜਨਵਰੀ (ਪੋਸਟ ਬਿਊਰੋ)- ਚੀਨ ਦੇ ਦਬਾਅ ਵਿੱਚ ਪਾਕਿਸਤਾਨ ਦੀ ਆਰਥਿਕ ਸਨਮਾਨ ਕਮੇਟੀ (ਈ ਸੀ ਸੀ) ਨੇ ਬੀਤੇ ਸਾਲ 13 ਜੁਲਾਈ ਨੂੰ ਹੋਏ ਅੱਤਵਾਦੀ ਹਮਲੇ ਵਿੱਚ ਮ੍ਰਿਤਕ ਤੇ ਜ਼ਖ਼ਮੀ 36 ਚੀਨੀ ਨਾਗਰਿਕਾਂ ਦੇ ਵਾਰਸਾਂ ਨੂੰ 1.16 ਕਰੋੜ ਡਾਲਰ (ਕਰੀਬ 86 ਕਰੋੜ) ਦਾ ਮੁਆਵਜ਼ਾ ਦੇਣ ਦਾ ਫੈਸਲਾ ਕੀਤਾ ਹੈ।
ਵਰਨਣ ਯੋਗ ਹੈ ਕਿ ਚੀਨੀ ਠੇਕੇਦਾਰਾਂ ਅਤੇ ਮੁਲਾਜ਼ਮਾਂ ਦੀ ਸੁਰੱਖਿਆ ਅਤੇ ਦਾਸੂ ਬੰਨ ਪ੍ਰਾਜੈਕਟ ਦੇ ਪੀੜਤਾਂ ਨੂੰ ਮੁਆਵਜ਼ਾ ਦੇਣ ਦੇ ਮੁੱਦੇ ਉੱਤੇ ਚੀਨ ਅਤੇ ਪਾਕਿਸਤਾਨ ਦੇ ਸੰਬੰਧਾਂ ਵਿੱਚ ਤਣਾਅ ਪੈਦਾ ਹੋ ਗਿਆ ਸੀ। ਵਿਸ਼ਵ ਬੈਂਕ ਦੀ ਮਦਦ ਨਾਲ ਖੈਬਰ ਪਖਤੂਨਖਵਾ ਰਾਜ ਵਿੱਚ ਚੱਲਦੇ ਦਾਸੂ ਜਲਬਿਜਲੀ ਪ੍ਰਾਜੈਕਟ ਯੋਜਨਾ, ਚੀਨ-ਪਾਕਿਸਤਾਨ ਆਰਥਿਕ ਗਲਿਆਰੇ (ਸੀ ਪੀਈਸੀ) ਦਾ ਹਿੱਸਾ ਨਹੀਂ ਹੈ। ਰਿਪੋਰਟ ਅਨੁਸਾਰ ਅੱਤਵਾਦੀ ਹਮਲੇ ਦੇ ਪੀੜਤ ਚੀਨੀ ਨਾਗਰਿਕਾਂ ਦੇ ਵਾਰਸਾਂ ਨੂੰ ਮੁਆਵਜ਼ਾ ਦੇਣ ਦਾ ਫੈਸਲਾ ਈ ਸੀ ਸੀ ਦੀ ਬੈਠਕ ਵਿੱਚ ਹੋਇਆ ਹੈ, ਜਿਸਦੀ ਪ੍ਰਧਾਨਗੀ ਵਿੱਤ ਮੰਤਰੀ ਸ਼ੌਕਤ ਤਰੀਨ ਨੇ ਕੀਤੀ ਸੀ। ਹਾਂਗਕਾਂਗ ਪੋਸਟ ਦੇ ਅਨੁਸਾਰ ਚੀਨੀ ਬਿਜਲੀ ਕੰਪਨੀਆਂ ਚੀਨ ਵਿੱਚ ਹੋਏ ਅਜਿਹੇ ਹੀ ਹਾਦਸੇ ਵਿੱਚ ਪੀੜਤਾਂ ਦੇ ਪਰਵਾਰ ਨੂੰ ਦਿੱਤੇ ਜਾਣ ਵਾਲੇ ਮੁਆਵਜ਼ੇ ਦੇ ਮੁਕਾਬਲੇ ਛੇ ਗੁਣਾ ਭੁਗਤਾਨ ਲਈਪਾਕਿਸਤਾਨ ਉੱਤੇ ਦਬਾਅ ਬਣਾ ਰਹੀਆਂ ਸਨ। ਇਸ ਅੱਤਵਾਦੀ ਹਮਲੇ ਪਿੱਛੋਂ ਚੀਨੀ ਕੰਪਨੀ ਨੇ ਕੰਮ ਬੰਦ ਕਰਕੇ 3.7 ਕਰੋੜ ਡਾਲਰ ਮੁਆਵਜ਼ੇ ਦੀ ਮੰਗ ਕੀਤੀ ਸੀ। ਅਧਿਕਾਰੀਆਂ ਅਨੁਸਾਰ ਜਿਸ ਤਰ੍ਹਾਂ ਚੀਨ ਦਾ ਦਬਦਬਾ ਵਧ ਰਿਹਾ ਹੈ, ਉਸਦੇ ਅਨੁਸਾਰ ਸਾਲ 2025 ਤਕ ਪਾਕਿਸਤਾਨ ਵਿੱਚ ਕੰਮ ਕਰਨ ਵਾਲੇ ਚੀਨੀ ਨਾਗਰਿਕਾਂ ਦੀ ਗਿਣਤੀ 50 ਲੱਖ ਤੋਂ ਜ਼ਿਆਦਾ ਹੋ ਜਾਵੇਗੀ।