ਓਨਟਾਰੀਓ, 3 ਜਨਵਰੀ (ਪੋਸਟ ਬਿਊਰੋ) : ਦੱਖਣੀ ਓਨਟਾਰੀਓ ਦੇ ਹਸਪਤਾਲ ਵੱਲੋਂ ਵੀਰਵਾਰ ਨੂੰ ਇਹ ਖੁਲਾਸਾ ਕੀਤਾ ਗਿਆ ਕਿ ਇੱਕ ਇਕਿਊਪਮੈਂਟ ਦੇ ਟੁਕੜੇ ਵਿੱਚ ਸਮੱਸਿਆ ਆਉਣ ਕਾਰਨ 25 ਮਰੀਜ਼ਾਂ ਨੂੰ ਗਲਤ ਰੇਡੀਏਸ਼ਨ ਟਰੀਟਮੈਂਟ ਦਿੱਤਾ ਗਿਆ ਹੋ ਸਕਦਾ ਹੈ। ਇਹ ਸਾਰੀਆਂ ਮਹਿਲਾਵਾਂ ਸਰਵਾਈਕਲ ਕੈਂਸਰ ਦੀਆਂ ਮਰੀਜ਼ ਸਨ।
ਜ਼ੁਰਾਵਿੰਸਕੀ ਕੈਂਸਰ ਸੈਂਟਰ ਦੇ ਹੈਮਿਲਟਨ ਹੈਲਥ ਸਾਇੰਸਿਜ਼ ਨੇ ਆਖਿਆ ਕਿ ਇਹ ਮੁੱਦਾ ਉਨ੍ਹਾਂ ਮਹਿਲਾਵਾਂ ਨਾਲ ਸਬੰਧਤ ਹੈ ਜਿਨ੍ਹਾਂ ਨੇ 2017 ਤੇ 2018 ਵਿੱਚ ਬ੍ਰੈਕੀਥੈਰੇਪੀ ਵਜੋਂ ਜਾਣਿਆ ਜਾਂਦਾ ਇਲਾਜ ਕਰਵਾਇਆ। ਇਹ ਵੀ ਆਖਿਆ ਗਿਆ ਕਿ ਭਾਵੇਂ ਇਸ ਕਾਰਨ ਕੁੱਝ ਮਰੀਜ਼ ਹੀ ਪ੍ਰਭਾਵਿਤ ਹੋਏ ਹੋ ਸਕਦੇ ਹਨ ਪਰ ਹਸਪਤਾਲ ਦੇ ਓਨਕੌਲੋਜੀ ਤੇ ਪੈਲੀਏਟਿਵ ਕੇਅਰ ਦੇ ਵਾਈਸ ਪ੍ਰੈਜ਼ੀਡੈਂਟ ਨੇ ਇਹ ਮੰਨਿਆ ਕਿ ਇਸ ਦਾ ਪ੍ਰਭਾਵ ਗੰਭੀਰ ਹੋ ਸਕਦਾ ਹੈ।
ਡਾ.ਰਾਲਫ ਮੇਅਰ ਨੇ ਆਖਿਆ ਕਿ ਇਸ ਖਰਾਬੀ ਕਾਰਨ ਮਰੀਜ਼ਾਂ ਦੇ ਟਿਊਮਰ ਨੂੰ ਜਿੱਥੇ ਨਿਸ਼ਾਨਾ ਬਣਾਇਆ ਜਾਣਾ ਸੀ ਉੱਥੇ ਹੀ ਉਨ੍ਹਾਂ ਦੇ ਸਿਹਤਮੰਦ ਟਿਸ਼ੂਜ਼ ਨੂੰ ਰੇਡੀਏਸ਼ਨ ਕਾਰਨ ਨੁਕਸਾਨ ਪਹੁੰਚਿਆ ਹੋ ਸਕਦਾ ਹੈ। ਜਿਸ ਨਾਲ ਕੈਂਸਰ ਦਾ ਇਲਾਜ ਤਾਂ ਨਹੀਂ ਹੋਇਆ ਹੋਵੇਗਾ ਪਰ ਅੰਦਰੂਨੀ ਅੰਗਾਂ ਨੂੰ ਨੁਕਸਾਨ ਹੋਇਆ ਹੋ ਸਕਦਾ ਹੈ। ਉਨ੍ਹਾਂ ਆਖਿਆ ਕਿ ਹਸਪਤਾਲ ਅਜੇ ਵੀ ਇਹ ਪਤਾ ਲਾਉਣ ਦੀ ਕੋਸਿ਼ਸ਼ ਕਰ ਰਿਹਾ ਹੈ ਕਿ 25 ਪ੍ਰਭਾਵਿਤ ਮਹਿਲਾਵਾਂ ਨੂੰ ਇਸ ਤਰ੍ਹਾਂ ਦੇ ਕਿਸੇ ਨੁਕਸਾਨ ਦਾ ਸਾਹਮਣਾ ਤਾਂ ਨਹੀਂ ਕਰਨਾ ਪੈ ਰਿਹਾ। ਉਨ੍ਹਾਂ ਆਖਿਆ ਕਿ ਇਸ ਮੁੱਦੇ ਉੱਤੇ ਹਸਪਤਾਲ ਦਾ ਸਟਾਫ ਇਸ ਲਈ ਪਰੇਸ਼ਾਨ ਹੈ ਕਿ ਉਹ ਆਪਣੇ ਮਰੀਜ਼ਾਂ ਦਾ ਸਹੀ ਇਲਾਜ ਨਹੀਂ ਕਰ ਪਾਇਆ।
ਉਨ੍ਹਾਂ ਆਖਿਆ ਕਿ ਇਸ ਨੁਕਸ ਦਾ ਪਤਾ ਤਕਨੀਸ਼ੀਅਨਾਂ ਨੂੰ ਉਸ ਸਮੇਂ ਲੱਗਿਆ ਜਦੋਂ ਉਨ੍ਹਾਂ ਪਾਇਆ ਕਿ ਜਿਹੜੀ ਟਿਊਬ ਇਲਾਜ ਕਰਨ ਵਾਲੇ ਹਿੱਸੇ ਤੱਕ ਰੇਡੀਏਸ਼ਨ ਪਹੁੰਚਾਉਣ ਵਿੱਚ ਮਦਦ ਕਰਦੀ ਹੈ ਉਹ ਲੇਬਲ ਉੱਤੇ ਦਰਜ ਜਾਣਕਾਰੀ ਨਾਲੋਂ ਚਾਰ ਸੈਂਟੀਮੀਟਰ ਲੰਮੀ ਹੈ। ਇਸ ਦੇ ਨਤੀਜੇ ਵਜੋਂ ਰੇਡੀਏਸ਼ਨ ਉਸ ਹਿੱਸੇ ਵਿੱਚ ਨਹੀਂ ਪਹੁੰਚੀ ਹੋਵੇਗੀ ਜਿੱਥੋਂ ਦਾ ਇਲਾਜ ਕੀਤਾ ਜਾਣਾ ਹੈ ਸਗੋਂ ਇਸ ਨਾਲ ਸਿਹਤਮੰਦ ਟਿਸ਼ੂਜ਼ ਨੂੰ ਨੁਕਸਾਨ ਪਹੁੰਚਿਆ ਹੋ ਸਕਦਾ ਹੈ।
ਉਨ੍ਹਾਂ ਆਖਿਆ ਕਿ ਜਿਵੇਂ ਹੀ ਹਸਪਤਾਲ ਨੂੰ ਇਸ ਸਬੰਧ ਵਿੱਚ ਜਾਣਕਾਰੀ ਮਿਲੀ ਤਾਂ ਸੱਭ ਤੋਂ ਪਹਿਲਾਂ ਉਨ੍ਹਾਂ 25 ਮਰੀਜ਼ਾਂ ਤੋਂ ਮੁਆਫੀ ਮੰਗੀ ਗਈ ਤੇ ਹੁਣ ਆਉਣ ਵਾਲੇ ਮਹੀਨਿਆਂ ਵਿੱਚ ਉਨ੍ਹਾਂ ਦੀ ਸਿਹਤ ਦੀ ਨਿਗਰਾਨੀ ਕੀਤੇ ਜਾਣ ਦੀ ਯੋਜਨਾ ਬਣਾਈ ਜਾ ਰਹੀ ਹੈ। ਉਨ੍ਹਾਂ ਆਖਿਆ ਕਿ ਹਸਪਤਾਲ ਭਵਿੱਖ ਵਿੱਚ ਇਸ ਤਰ੍ਹਾਂ ਦੀ ਕੁਤਾਹੀ ਨੂੰ ਦੂਰ ਕਰਨ ਲਈ ਵੀ ਠੋਸ ਕਦਮ ਚੁੱਕਣ ਦੀ ਤਿਆਰੀ ਕਰ ਰਿਹਾ ਹੈ।