ਟੋਰਾਂਟੋ 20 ਜਨਵਰੀ (ਪੋਸਟ ਬਿਊਰੋ) : ਮਿਸੀਸਾਗਾ ਸਿਟੀ ਕਾਉਂਸਲ ਵੱਲੋਂ ਸਰਬਸੰਮਤੀ ਨਾਲ ਡੰਡਸ ਸਟਰੀਟ ਦਾ ਮੁੜ ਨਾਮਕਰਣ ਕੀਤੇ ਜਾਣ ਖਿਲਾਫ ਮਤਾ ਪਾਸ ਕੀਤਾ ਗਿਆ।
ਜਿ਼ਕਰਯੋਗ ਹੈ ਕਿ ਹੈਨਰੀ ਡੰਡਸ, ਸਕੌਟਿਸ਼ ਮੰਤਰੀ ਸੀ ਜਿਸ ਦੀ ਮੌਤ 1811 ਵਿੱਚ ਹੋਈ ਸੀ। ਉਸ ਨੇ ਬ੍ਰਿਟਿਸ਼ ਰਾਜ ਦੀ ਗੁਲਾਮ ਪ੍ਰਥਾ ਨੂੰ ਖ਼ਤਮ ਕਰਨ ਵਿੱਚ ਦੇਰ ਕਰਨ ਲਈ ਅਹਿਮ ਭੂਮਿਕਾ ਨਿਭਾਈ ਸੀ। ਇਸ ਕਾਰਨ ਇਹ ਮੁੱਦਾ ਭਖਵੀਂ ਬਹਿਸ ਦਾ ਕਾਰਨ ਰਿਹਾ। ਜੁਲਾਈ ਵਿੱਚ ਟੋਰਾਂਟੋ ਸਿਟੀ ਕਾਊਂਸਲ ਨੇ ਡੰਡਸ ਸਟਰੀਟ ਦਾ ਨਾਂ ਬਦਲਣ ਲਈ ਮਤਾ ਪਾਸ ਕੀਤਾ ਸੀ।ਇਸ ਤੋਂ ਇਲਾਵਾ ਹੋਰਨਾਂ ਸਿਵਿਕ ਐਸੈਟਸ, ਜਿਵੇਂ ਕਿ ਯੰਗ ਡੰਡਸ ਸਕੁਏਅਰ ਤੇ ਡੰਡਸ ਸਬਵੇਅ ਸਟੇਸ਼ਨ ਆਦਿ ਤੋਂ ਉਸ ਦਾ ਨਾਂ ਹਟਾਏ ਜਾਣ ਉੱਤੇ ਸਹਿਮਤੀ ਬਣੀ ਸੀ।
ਪਰ ਮਿਸੀਸਾਗਾ ਨੇ ਵੱਖਰੀ ਦਿਸ਼ਾ ਵੱਲ ਜਾਣ ਦਾ ਫੈਸਲਾ ਕੀਤਾ ਹੈ। ਕਾਊਂਸਲਰ ਕੈਰੋਲਿਨ ਪੈਰਿਸ਼ ਵੱਲੋਂ ਪੇਸ਼ ਕੀਤੇ ਮਤੇ ਵਿੱਚ ਆਖਿਆ ਗਿਆ ਕਿ ਸਾਨੂੰ ਆਧੁਨਿਕ ਲੈਂਜ਼ ਵਿੱਚੋਂ ਇਤਿਹਾਸ ਦੀ ਵਿਆਖਿਆ ਕਰਨੀ ਚਾਹੀਦੀ ਹੈ, ਇਸ ਤੋਂ ਇਲਾਵਾ ਇਸ ਪੋ੍ਰਜੈਕਟ ਉੱਤੇ ਆਉਣ ਵਾਲੀ ਲਾਗਤ ਤੇ ਕਮਿਊਨਿਟੀ ਦੇ ਸਮਰਥਨ ਆਦਿ ਵਰਗੇ ਮੁੱਦੇ ਵਿਚਾਰਨ ਲਈ ਵੀ ਆਖਿਆ ਗਿਆ। ਕਾਊਂਸਲਰ ਪੈਟ ਸਾਇਤੋ ਨੇ ਇਸ ਮਤੇ ਨੂੰ ਮੁਲਤਵੀ ਕਰਨ ਦੀ ਪੇਸ਼ਕਸ਼ ਕੀਤੀ ਤਾਂ ਜੋ ਕਮਿਊਨਿਟੀ ਦੇ ਹੋਰ ਗਰੁੱਪ ਇਸ ਮੁੱਦੇ ਉੱਤੇ ਵੋਟ ਕਰ ਸਕਣ।
ਇਸ ਉੱਤੇ ਮੇਅਰ ਬੌਨੀ ਕ੍ਰੌਂਬੀ, ਜੋ ਕਿ ਵੋਟ ਦੌਰਾਨ ਮੌਜੂਦ ਨਹੀਂ ਸੀ, ਨੇ ਆਖਿਆ ਕਿ ਉਹ ਵੋਟ ਦੌਰਾਨ ਕੀਤੇ ਗਏ ਫੈਸਲੇ ਦਾ ਸਵਾਗਤ ਕਰਦੀ ਹੈ ਪਰ ਉਹ ਚਾਹੁੰਦੀ ਹੈ ਕਿ ਇਸ ਮਾਮਲੇ ਦਾ ਮੁਲਾਂਕਣ ਜਾਰੀ ਰਹੇ।