ਓਨਟਾਰੀਓ, 13 ਜਨਵਰੀ (ਪੋਸਟ ਬਿਊਰੋ) : ਪ੍ਰੋਵਿੰਸ ਦੇ ਬੈਕ ਟੂ ਸਕੂਲ ਪਲੈਨ ਤੋਂ ਸਕੂਲ ਬੋਰਡਜ਼, ਟੀਚਰਜ਼ ਯੂਨੀਅਨਜ਼ ਤੇ ਮਾਪਿਆਂ ਵੱਲੋਂ ਚਿੰਤਾ ਪ੍ਰਗਟਾਈ ਗਈ ਹੈ। ਇਨ੍ਹਾਂ ਸਭਨਾਂ ਦਾ ਕਹਿਣਾ ਹੈ ਕਿ ਇਸ ਮਾਮਲੇ ਵਿੱਚ ਉਨ੍ਹਾਂ ਸਾਰਿਆਂ ਦੀ ਸਲਾਹ ਨਹੀਂ ਲਈ ਗਈ ਤੇ ਬੱਚਿਆਂ ਨੂੰ ਸੋਮਵਾਰ ਤੋਂ ਕਲਾਸਾਂ ਵਿੱਚ ਭੇਜਣ ਲਈ ਉਹ ਸਹਿਜ ਮਹਿਸੂਸ ਨਹੀਂ ਕਰ ਰਹੇ।
ਜਿ਼ਕਰਯੋਗ ਹੈ ਕਿ ਸਿੱਖਿਆ ਮੰਤਰੀ ਸਟੀਫਨ ਲਿਚੇ ਨੇ ਬੁੱਧਵਾਰ ਨੂੰ ਕੀਤੀ ਗਈ ਨਿਊਜ਼ ਕਾਨਫਰੰਸ ਵਿੱਚ ਆਖਿਆ ਕਿ ਓਨਟਾਰੀਓ ਦਾ ਰਿਟਰਨ ਟੂ ਇਨ ਪਰਸਨ ਲਰਨਿੰਗ ਪਲੈਨ, ਟੈਸਟਿੰਗ, ਸੋਧੀ ਗਈ ਵੈਂਟੀਲੇਸ਼ਨ ਤੇ ਵੈਕਸੀਨੇਸ਼ਨ ਤੱਕ ਵਧੇਰੇ ਪਹੁੰਚ ਤੇ ਪੀਪੀਈ ਕਿੱਟਜ਼ ਵਿੱਚ ਸੁਧਾਰ ਉੱਤੇ ਕੇਂਦਰਿਤ ਰਹੇਗਾ।ਡਫਰਿਨ-ਪੀਲ ਕੈਥੋਲਿਕ ਸਕੂਲ ਬੋਰਡ ਨੇ ਲਿਚੇ ਨੂੰ ਲਿਖੇ ਖੁੱਲ੍ਹੇ ਪੱਤਰ ਵਿੱਚ ਆਖਿਆ ਕਿ ਮਾਪੇ ਤੇ ਗਾਰਡੀਅਨ ਆਪਣੇ ਬੱਚਿਆਂ ਨੂੰ ਸਕੂਲ ਭੇਜਣ ਤੋਂ ਡਰ ਰਹੇ ਹਨ।
ਇਸ ਪੱਤਰ ਵਿੱਚ ਲਿਖਿਆ ਗਿਆ ਹੈ ਕਿ ਫੋਰਡ ਸਰਕਾਰ ਨੇ ਪਾਰਦਰਸ਼ਤਾ ਤੋਂ ਕੰਮ ਨਹੀਂ ਲਿਆ ਤੇ ਸਕੂਲ ਬੋਰਡਜ਼ ਨਾਲ ਟੈਸਟਿੰਗ ਤੇ ਆਊਟਬ੍ਰੇਕਸ ਦੀ ਰਿਪੋਰਟ ਕਰਨ ਲਈ ਬਦਲੀ ਗਈ ਪ੍ਰੋਟੋਕਾਲ ਬਾਰੇ ਕੋਈ ਸਲਾਹ ਮਸ਼ਵਰਾ ਨਹੀਂ ਕੀਤਾ ਗਿਆ। ਹੋਰਨਾਂ ਸਕੂਲ ਬੋਰਡਜ਼ ਵੱਲੋਂ ਵੀ ਫੋਰਡ ਸਰਕਾਰ ਦੇ ਇਸ ਫੈਸਲੇ ਦਾ ਵਿਰੋਧ ਕੀਤਾ ਜਾ ਰਿਹਾ ਹੈ।
ਇਸ ਦੌਰਾਨ ਐਨਡੀਪੀ ਆਗੂ ਐਂਡਰੀਆ ਹੌਰਵਥ ਨੇ ਸਕੂਲ ਬੋਰਡਜ਼ ਦੇ ਇਸ ਤਰ੍ਹਾਂ ਖੁੱਲ੍ਹ ਕੇ ਸਾਹਮਣੇ ਆਉਣ ਦਾ ਧੰਨਵਾਦ ਕੀਤਾ ਤੇ ਆਖਿਆ ਕਿ ਸਰਕਾਰ ਸਾਰੀਆਂ ਕਲਾਸਾਂ ਵਿੱਚ ਹੈਪਾ ਫਿਲਟਰਜ਼ ਲੱਗੇ ਹੋਣ ਦਾ ਦਾਅਵਾ ਕਰ ਰਹੀ ਹੈ ਜੋ ਕਿ ਸੱਚ ਨਹੀਂ ਹੈ।