ਬੀਜਿੰਗ, 3 ਜਨਵਰੀ (ਪੋਸਟ ਬਿਊਰੋ)- ਚੀਨ ਦੇ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਨੇ ਕੱਲ੍ਹ ਤਾਇਵਾਨ ਨੂੰ ਫੌਜ ਦੀ ਵਰਤੋਂ ਦੀ ਧਮਕੀ ਦਿੱਤੀ ਹੈ। ਉਨ੍ਹਾਂ ਕਿਹਾ ਹੈ ਕਿ ਤਾਇਵਾਨ ਨੂੰ ਚੀਨ ਦੇ ਕੰਟਰੋਲ 'ਚ ਲਿਆਉਣ ਲਈ ਫੌਜ ਵਰਤੀ ਜਾ ਸਕਦੀ ਹੈ, ਪਰ ਅਸੀਂ ਸ਼ਾਂਤੀ ਪੂਰਨ ਰਲੇਵਾਂ ਚਾਹੁੰਦੇ ਹਾਂ।
ਤਾਇਵਾਨ ਦੀ ਰਾਸ਼ਟਰਪਤੀ ਸਾਈ ਇੰਗ-ਵੇਨ ਨੇ ਚੀਨੀ ਰਾਸ਼ਟਰਪਤੀ ਜਿਨਪਿੰਗ ਦੇ ਇਸ ਬਿਆਨ ਉਤੇ ਦੋ ਟੁੱਕ ਕਿਹਾ ਕਿ ਚੀਨ ਨੂੰ ਲੋਕਤੰਤਰ ਅਪਣਾਉਣਾ ਚਾਹੀਦਾ ਹੈ। ਸਾਈ ਨੇ ਇਕ ਦਿਨ ਪਹਿਲਾਂ ਨਵੇਂ ਸਾਲ ਦੇ ਭਾਸ਼ਣ ਵਿੱਚ ਕਿਹਾ ਸੀ ਕਿ ਦੇਸ਼ ਦੀ ਜਨਤਾ ਖੁਦਮੁਖਤਿਆਰੀ ਰੱਖਣਾ ਚਾਹੁੰਦੀ ਹੈ। ਚੀਨ ਲਈ ਤਾਇਵਾਨ ਕਾਫੀ ਸੰਵੇਦਨਸ਼ੀਲ ਮੁੱਦਾ ਹੈ। ਉਹ ਇਸ ਖੁਦਮੁਖਤਿਆਰ ਖੇਤਰ ਉੱਤੇ ਆਪਣਾ ਦਾਅਵਾ ਕਰਦਾ ਹੈ। ਰਾਸ਼ਟਰਪਤੀ ਜਿਨਪਿੰਗ ਨੇ ਇਸ ਟਾਪੂ ਖੇਤਰ ਉਤੇ ਉਸ ਸਮੇਂ ਤੋਂ ਦਬਾਅ ਬਣਾਉਣਾ ਸ਼ੁਰੂ ਕਰ ਦਿੱਤਾ ਸੀ, ਜਦੋਂ ਸਾਲ 2016 ਵਿੱਚ ਲੋਕਤੰਤਰ ਸਮਰਥਕ ਡੈਮੋਕ੍ਰੇਟਿਕ ਪ੍ਰੋਗੈਸਿਵ ਪਾਰਟੀ ਦੀ ਨੇਤਾ ਸਾਈ ਰਾਸ਼ਟਰਪਤੀ ਚੁਣੀ ਗਈ ਸੀ। ਜਿਨਪਿੰਗ ਨੇ ਤਾਇਵਾਨ ਨੀਤੀ ਨੂੰ 40ਵੀਂ ਵਰ੍ਹੇਗੰਢ ਮੌਕੇ ਬੀਜਿੰਗ ਦੇ ਗ੍ਰੇਟ ਹਾਲ 'ਚ ਕਿਹਾ, ‘ਤਾਇਵਾਨ ਦਾ ਰਲੇਵਾਂ ਵੰਨ-ਚਾਈਨਾ ਸਿਧਾਂਤ ਦੇ ਤਹਿਤ ਚਾਹੀਦਾ ਹੈ। ਇਸ ਸਿਧਾਂਤ ਤਹਿਤ ਤਾਇਵਾਨ ਨੂੰ ਚੀਨ ਦੇ ਹਿੱਸੇ ਦੇ ਤੌਰ 'ਤੇ ਸਵੀਕਾਰ ਕੀਤਾ ਗਿਆ ਹੈ। ਤਾਇਵਾਨ ਦੀ ਬਹੁਗਿਣਤੀ ਆਬਾਦੀ ਸਾਫ ਤੌਰ 'ਤੇ ਜਾਣਦੀ ਹੈ ਕਿ ਇਸ ਦੀ ਆਜ਼ਾਦੀ ਵੱਡੀ ਮੁਸੀਬਤ ਦਾ ਕਾਰਨ ਬਣੇਗੀ।