ਵਾਸ਼ਿੰਗਟਨ, 3 ਜਨਵਰੀ (ਪੋਸਟ ਬਿਊਰੋ)- ਅਮਰੀਕਾ ਦੀ ਡੋਨਾਲਡ ਟਰੰਪ ਸਰਕਾਰ ਵਿੱਚੋਂ ਅਧਿਕਾਰੀਆਂ ਦੇ ਅਸਤੀਫੇ ਦੇਣ ਦਾ ਦੌਰ ਅਜੇ ਵੀ ਜਾਰੀ ਹੈ। ਤਾਜ਼ਾ ਕੇਸ ਪੈਂਟਾਗਨ ਦੀ ਚੀਫ ਸਪੋਕਸਪਰਸਨ ਡਾਨਾ ਡਬਲਯੂ ਦਾ ਹੈ, ਉਸ ਨੇ ਸਾਬਕਾ ਰੱਖਿਆ ਮੰਤਰੀ ਜਿਮ ਮੈਟਿਸ ਦੇ ਅਸਤੀਫੇ ਦੇ ਕੁਝ ਘੰਟਿਆਂ ਦੇ ਅੰਦਰ ਅਸਤੀਫਾ ਦੇ ਦਿੱਤਾ ਹੈ।
ਡਾਨਾ ਨੇ ਟਵੀਟ ਕਰ ਆਪਣੇ ਅਸਤੀਫੇ ਬਾਰੇ ਦੱਸਿਆ ਹੈ। ਉਸ ਉੱਤੇ ਆਪਣੇ ਸਹਿਯੋਗੀਆਂ ਨਾਲ ਗਲਤ ਵਿਹਾਰ ਕਰਨ ਦੇ ਦੋਸ਼ਾਂ ਦੀ ਜਾਂਚ ਚੱਲ ਰਹੀ ਹੈ, ਜਿਸ ਦੀ ਸ਼ੁਰੂਆਤ ਮਈ `ਚ ਹੋਈ ਸੀ। ਕਿਹਾ ਜਾਂਦਾ ਹੈ ਕਿ ਉਨ੍ਹਾਂ ਨੇ ਇਸੇ ਲਈ ਅਸਤੀਫਾ ਦਿੱਤਾ ਹੈ, ਪਰ ਅਜੇ ਇਸ ਪਿੱਛਲੇ ਕਾਰਨ ਬਾਰੇ ਕੋਈ ਜਾਣਕਾਰੀ ਨਹੀਂ ਹੈ। ਉਸ ਨੇ ਟਵਿੱਟਰ ਉੱਤੇ ਲਿਖਿਆ, ‘ਮੈਂ ਸੈਕੇਟਰੀ ਜਿਮ ਮੈਟਿਸ, ਆਪਣੇ ਸਹਿਯੋਗੀਆਂ ਤੇ ਸਾਰੇ ਨਾਗਰਿਕਾਂ ਦੇ ਉਨ੍ਹਾਂ ਦੇ ਸਮਰਥਨ ਅਤੇ ਉਨ੍ਹਾਂ ਨਾਲ ਲੰਬੇ ਸਮੇਂ ਤੱਕ ਕੰਮ ਕਰਨ ਲਈ ਮਿਲੇ ਮੌਕੇ ਦੀ ਤਰੀਫ ਕਰਦੀ ਹਾਂ। ਇਹ ਮੇਰੇ ਲਈ ਮਾਣ ਤੇ ਕਿਸਮਤ ਦੀ ਗੱਲ ਹੈ। ਪੈਂਟਾਗਨ ਵੱਲੋਂ ਮੰਗਲਵਾਰ ਨੂੰ ਇਸ ਦੀ ਪੁਸ਼ਟੀ ਕੀਤੀ ਗਈ ਕਿ ਡਾਨਾ ਨੇ ਰੱਖਿਆ ਮੰਤਰੀ ਦੇ ਸਪੋਕਸਪਰਸਨ ਦੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ ਹੈ। ਪੈਂਟਾਗਨ ਦੇ ਮੁਤਾਬਕ ਵ੍ਹਾਈਟ ਦੀ ਥਾਂ ਚਾਰਲਸ ਈ ਸਮਰਸ ਜੂਨੀਅਰ ਡਿਫੈਂਸ ਸੈਕੇਟਰੀ ਦੇ ਸਹਾਇਕ ਦੇ ਰੂਪ ਵਿੱਚ ਕੰਮ ਕਰਨਗੇ। ਰਾਸ਼ਟਰਪਤੀ ਡੋਨਾਲਡ ਟਰੰਪ ਨਾਲ ਕੰਮ ਬਾਰੇ ਵਿਵਾਦ ਉੱਤੇ ਜਿਮ ਮੈਟਿਸ ਨੇ ਵੀ ਅਸਤੀਫਾ ਦੇ ਦਿੱਤਾ ਸੀ, ਜਿਸ ਤੋਂ ਬਾਅਦ ਸੋਮਵਾਰ ਨੂੰ ਉਨ੍ਹਾਂ ਦੀ ਥਾਂ ਪ੍ਰੈਟਿਕ ਸ਼ਾਨਹਾਨ ਨੂੰ ਕਾਰਜਕਾਰੀ ਰੱਖਿਆ ਸਕੱਤਰ ਬਣਾਇਆ ਗਿਆ ਹੈ। ਪ੍ਰੈਟਿਕ ਬੋਇੰਗ ਦੇ ਸਾਬਕਾ ਕਾਰਜਕਾਰੀ ਅਤੇ ਪੇਂਟਾਗਨ `ਚ ਨੰਬਰ 2 ਦੀ ਹੈਸੀਅਤ `ਚ ਹਨ।