ਲੰਡਨ, 11 ਜਨਵਰੀ (ਪੋਸਟ ਬਿਊਰੋ)- ਬ੍ਰਿਟੇਨ ਵਿੱਚ ਵਿਗਿਆਨੀਆਂ ਨੂੰ ਮਿਡਲੈਂਡ ਇਲਾਕੇ ਵਿੱਚ ਇੱਕ 18 ਕਰੋੜ ਸਾਲ ਪੁਰਾਣੇ ਵਿਸ਼ਾਲ ਸਮੁੰਦਰੀ ਜੀਵ ਦਾ ਪਿੰਜਰ ਮਿਲਿਆ ਹੈ। ਇਹ ਸਮੁੰਦਰੀ ਡਰੈਗਨ ਡਾਲਫਿਨ ਵਾਂਗ ਦਿਸਦਾ ਹੈ ਅਤੇ ਤੀਹ ਫੁੱਟ ਲੰਬਾ ਹੈ। ਇਸ ਦੀ ਖੋਪੜੀ ਦਾ ਵਜ਼ਨ ਇੱਕ ਟਨ ਦੱਸਿਆ ਗਿਆ ਹੈ। ਇਹ ਬ੍ਰਿਟੇਨ ਵਿੱਚ ਮਿਲਿਆ ਆਪਣੀ ਤਰ੍ਹਾਂ ਦਾ ਸਭ ਤੋਂ ਵੱਡਾ ਅਤੇ ਆਪਣੀ ਤਰ੍ਹਾਂ ਦਾ ਪੂਰਨ ਜੀਵ ਹੈ। ਇਸ ਦੀ ਖੋਜ 48 ਸਾਲਾ ਜੋ ਡੇਵਿਸ ਨੇ ਫਰਵਰੀ 2021 ਵਿੱਚ ਕੀਤੀ ਸੀ। ਰੂਟਲੈਂਡ ਦੇ ਪਾਣੀ ਨੇੜੇ ਮਿਲਿਆ ਇਹ ਸੀ-ਡਰੈਗਨ ਕਰੀਬ 82 ਫੁੱਟ ਤਕ ਹੋ ਸਕਦਾ ਸੀ।
ਮਿਲੀ ਜਾਣਕਾਰੀ ਅਨੁਸਾਰ ਇਸ ਜੀਵ ਨੂੰ ਸੀ-ਡਰੈਗਨ ਇਸ ਲਈ ਕਿਹਾ ਜਾਂਦਾ ਸੀ, ਕਿਉਂਕਿ ਉਸ ਦੇ ਦੰਦ ਅਤੇ ਅੱਖਾਂ ਬਹੁਤ ਵੱਡੀਆਂ ਹੁੰਦੀਆਂ ਸਨ। ਸਭ ਤੋਂ ਪਹਿਲਾਂ ਇਸ ਜੀਵ(ਇਚਥਿਓਸਾਰ) ਦੀ ਖੋਜ 19ਵੀਂ ਸਦੀ ਵਿੱਚ ਜੀਵ ਵਿਗਿਆਨੀ ਮੈਰੀ ਅੰਨੀਇੰਗ ਨੇ ਕੀਤੀ ਸੀ।ਇਸ ਸਮੁੰਦਰੀ ਜੀਵ ਦੀ ਖੋਜ ਕਰਨ ਵਾਲੇ ਡਾਕਟਰ ਡੀਨ ਲੋਮੈਕਸ ਨੇ ਕਿਹਾ, ‘‘ਬ੍ਰਿਟੇਨ ਵਿੱਚ ਇਚਥਿਓਸਾਰ ਦੇ ਕਈ ਜੀਵ ਮਿਲਣ ਦੇ ਬਾਅਦ ਵੀ ਇਹ ਦੱਸਣ ਯੋਗ ਹੈ ਕਿ ਇਹ ਬ੍ਰਿਟੇਨ ਵਿੱਚ ਮਿਲਿਆ ਸਭ ਤੋਂ ਵੱਡਾ ਪਿੰਜਰ ਹੈ। ਦੁਨੀਆ ਵਿੱਚ ਕਰੀਬ 25 ਕਰੋੜ ਸਾਲ ਪਹਿਲਾਂ ਸਭ ਤੋਂ ਪਹਿਲਾਂ ਇਚਥਿਓਸਾਰ ਹੋਂਦ ਵਿੱਚ ਆਏ ਸਨ ਅਤੇ ਨੌਂ ਕਰੋੜ ਸਾਲ ਪਹਿਲਾਂ ਉਹ ਧਰਤੀ ਤੋਂ ਅਲੋਪ ਹੋ ਗਏ। ਇਹ ਆਕਾਰ ਵਿੱਚ ਦੇਖਣ `ਚ ਡਾਲਫਿਨ ਵਾਂਗ ਹੁੰਦੇ ਸਨ। ਇਚਥਿਓਸਾਰ ਇੰਗਲੈਂਡ ਅਤੇ ਅਟਲਾਂਟਿਕ ਸਮੁੰਦਰ ਦੇ ਪਾਣੀ ਵਿੱਚ ਹਰ ਜਗ੍ਹਾ ਮੌਜੂਦ ਸਨ। ਉਨ੍ਹਾਂ ਦੇ ਸਰੀਰਕ ਮੁਕਾਬਲੇ ਵਿੱਚ ਇਚਥਿਓਸਾਰ ਦੀਆਂ ਅੱਖਾਂ ਵੱਡੀਆਂ ਹੰੁਦੀਆਂ ਸਨ।''
ਪਿੱਛੇ ਜਿਹੇ ਅਮਰੀਕਾ ਵਿੱਚ ਵਿਗਿਆਨੀਆਂ ਦੀ ਇੱਕ ਟੀਮ ਨੇ ਡਾਇਨਾਸੋਰ ਦੇ ਸਮੇਂ ਦੇ ਇਚਥਿਓਸਾਰ ਦੀ ਖੋਜ ਕੀਤੀ ਸੀ। ਇਸ ਜੀਵ ਦੀ ਲੰਬਾਈ 55 ਫੁੱਟ ਤਕ ਦੇਖੀ ਗਈ ਹੈ। ਰਿਸਰਚ ਤੋਂ ਪਤਾ ਲੱਗਾ ਹੈ ਕਿ ਮੱਛੀ ਦੇ ਆਕਾਰ ਦੇ ਇਨ੍ਹਾਂ ਸਮੁੰਦਰੀ ਜੀਵਾਂ ਦਾ ਆਕਾਰ 24 ਕਰੋੜ ਸਾਲ ਪਹਿਲਾਂ ਕਾਫੀ ਤੇਜ਼ੀ ਨਾਲ ਵਧਿਆ ਸੀ। ਇਸ ਜੀਵ ਦੇ ਸਿਰ ਦਾ ਆਕਾਰ 6.5 ਫੁੱਟ ਮਾਪਿਆ ਗਿਆ ਹੈ।ਕੈਲੀਫੋਰਨੀਆ ਦੇ ਸਕ੍ਰਿਪਸ ਕਾਲਜ ਦੇ ਜੀਵ ਵਿਗਿਆਨ ਦੇ ਐਸੋਸੀਏਟ ਪ੍ਰੋਫੈਸਰ ਲਾਰਸ ਸ਼ਾਮਿਤਜ ਨੇ ਸਟੱਡੀ ਵਿੱਚ ਕਿਹਾ ਹੈ ਕਿ ਇਚਥਿਓਸਾਰ ਨੇ ਵ੍ਹੇਲ ਦੇ ਮੁਕਾਬਲੇ ਵਿੱਚ ਆਪਣੇ ਆਕਾਰ ਨੂੰ ਕਾਫੀ ਤੇਜ਼ੀ ਨਾਲ ਵਧਾਇਆ ਹੈ। ਉਹ ਵੀ ਤਦ, ਜਦ ਧਰਤੀ ਤੋਂ ਡਾਇਨਾਸੋਰ ਵਰਗੇ ਜੀਵ ਤੇਜ਼ੀ ਨਾਲ ਅਲੋਪ ਹੋ ਰਹੇ ਸਨ। ਇਹ ਖੋਜ ਕਈ ਭੇਦ ਖੋਲ੍ਹੇਗੀ।