ਕੈਲਗਰੀ(ਹਰਬੰਸ ਬੁੱਟਰ ) ਸਟੈਟਿਸਟਿਕਸ ਕੈਨੇਡਾ ਵੱਲੋਂ ਜਾਰੀ ਅੰਕੜਿਆਂ ਵਿੱਚ ਦੱਸਿਆ ਗਿਆ ਹੈ ਕਿ ਦੇਸ਼ ਬਰ ਵਿੱਚ ਭੰਗ ਅਤੇ ਭੰਗ ਤੋਂ ਬਣੀਆਂ ਵਸਤਾਂ ਦੀ ਵਿੱਕਰੀ ਨੂੰ ਕਾਨੂੰਨੀ ਮਾਨਤਾ ਦਿੱਤੇ ਜਾਣ ਤੋਂ ਬਾਦ ਦੇਸ਼ ਭਰ ਵਿੱਚ ਅਕਤੂਬਰ ਮਹੀਨੇ ਦੌਰਾਨ 43 ਮਿਲੀਅਨ ਡਾਲਰ ਦਾ ਕਾਰੋਬਾਰ ਕੀਤਾ ਗਿਆ ਹੈ। 17 ਅਕਤੂਬਰ ਤੋਂ ਦੇਸ਼ ਭਰ ਵਿੱਚ ਮੈਰਿਯੁਆਨਾ ਦੀ ਵਿੱਕਰੀ ਸ਼ੁਰੂ ਕੀਤੀ ਗਈ ਸੀ। ਸ਼ੁਰੂਆਤੀ ਦਿਨਾਂ ਵਿੱਚ ਕੈਨਾਬਿਸ ਸਟੋਰਾਂ ਅੱਗੇ ਲੰਬੀਆਂ-ਲੰਬੀਆਂ ਲਾਈਨਾਂ ਲੱਗੀਆਂ ਰਹੀਆਂ ਸਨ। ਕਈ ਸਟੋਰ ਮਾਲਿਕਾਂ ਦਾ ਕਹਿਣਾ ਹੈ ਕਿ ਬਹੁਤ ਵੱਡੀ ਗਿਣਤੀ ਵਿੱਚ ਨਵੇਂ ਗ੍ਰਾਹਕ ਆਏ ਹਨ ਤੇ ਉਹਨਾਂ ਪਹਿਲੀ ਬਾਰ ਭੰਗ ਦਾ ਸੇਵਨ ਕੀਤਾ ਹੈ। ਐਲਬਰਟਾ ਭਰ ਵਿੱਚ ਭੰਗ ਦੀ ਸਪਲਾਈ ਘਟ ਜਾਣ ਦੇ ਮੱਦੇਨਜ਼ਰ ਐਲਬਰਟਾ ਗੇਮਿੰਗ, ਲਿਕਰ ਐਂਡ ਕੈਨਾਬਿਸ ਕਮਿਸ਼ਨ ਏ.ਜੀ.ਐਲ.ਸੀ. ਵੱਲੋਂ ਮੈਰਿਯੁਆਨਾ ਦੇ ਸਟੋਰਾਂ ਵਾਸਤੇ ਨਵੇਂ ਲਾਇਸੰਸ ਜਾਰੀ ਕਰਨੇ ਆਰਜ਼ੀ ਤੌਰ `ਤੇ ਬੰਦ ਕੀਤੇ ਗਏ ਹਨ। ਸਟੋਰ ਮਾਲਕਾਂ ਨੇ ਸ਼ੁਰੂਆਤੀ ਮਹੀਨਿਆਂ ਦੌਰਾਨ ਕਾਰੋਬਾਰ ਨੂੰ ਮਿਲੇ ਉਤਸ਼ਾਹ ਤੇ ਖੁਸ਼ੀ ਦਾ ਇਜ਼ਹਾਰ ਕੀਤਾ ਹੈ।