ਰੋਮਾਨੀਆ, 20 ਦਸੰਬਰ (ਪੋਸਟ ਬਿਊਰੋ) : ਰੋਮਾਨੀਆ ਵਿੱਚ ਸ਼ਾਂਤੀ ਮਿਸ਼ਨ ਵਾਸਤੇ ਕੈਨੇਡਾ ਦੇ ਉਮਰ ਵਿਹਾਅ ਚੁੱਕੇ ਲੜਾਕੂ ਜਹਾਜ਼ ਵੀ ਬਿਲਕੁਲ ਸਹੀ ਕੰਮ ਕਰ ਰਹੇ ਹਨ। ਇਹ ਗੱਲ ਕੈਨੇਡਾ ਦੇ ਏਅਰ ਪੁਲਿਸਿੰਗ ਮਿਸ਼ਨ ਦੇ ਕਮਾਂਡਰ ਨੇ ਆਖੀ।
ਪਿਛਲੇ ਚਾਰ ਮਹੀਨੇ ਤੋਂ ਰਾਇਲ ਕੈਨੇਡੀਅਨ ਏਅਰ ਫੋਰਸ ਦੇ 135 ਮੈਂਬਰਾਂ ਦੀ ਕਮਾਂਡ ਸਾਂਭ ਰਹੇ ਲੈਫਟੀਨੈਂਟ ਕਰਨਲ ਟਿੰਮ ਵੁੱਡਜ਼ ਨੇ ਆਖਿਆ ਕਿ ਇਸ ਖਿੱਤੇ ਵਿੱਚ ਨਾਟੋ ਦੇ ਵਿਸ਼ੇਸ਼ ਮਿਸ਼ਨ ਤਹਿਤ ਅਗਸਤ ਦੇ ਅਖੀਰ ਤੋਂ ਹੀ ਇੱਥੇ ਕੈਨੇਡਾ ਦੇ ਪੰਜ ਸੀਐਫ 18 ਜਹਾਜ਼ ਤਾਇਨਾਤ ਕੀਤੇ ਗਏ ਹਨ। ਵੁੱਡਜ਼ ਨੇ ਆਖਿਆ ਕਿ ਅਸੀਂ ਇਸ ਭੂਮਿਕਾ ਲਈ ਪੂਰੀ ਤਰ੍ਹਾਂ ਲੈਸ ਹਾਂ।
ਇੱਥੇ ਦੱਸਣਾ ਬਣਦਾ ਹੈ ਕਿ ਕੈਨੇਡਾ ਦੇ ਸੀਐਫ-18 ਤੀਹ ਸਾਲ ਤੋਂ ਵੀ ਪੁਰਾਣੇ ਹਨ ਤੇ ਇਨ੍ਹਾਂ ਨੂੰ ਦੋ ਦਹਾਕਿਆਂ ਬਾਅਦ ਹੀ ਬਦਲਿਆ ਜਾਣਾ ਸੀ। ਹੁਣ ਕੌਮੀ ਰੱਖਿਆ ਮੰਤਰਾਲਾ ਆਸਟਰੇਲੀਆ ਤੋਂ 25 ਵਰਤੇ ਹੋਏ ਜੈੱਟ ਜਹਾਜ਼ ਖਰੀਦਣ ਦੀ ਤਿਆਰੀ ਕਰ ਰਿਹਾ ਹੈ ਤਾਂ ਕਿ ਆਪਣੇ ਫਲੀਟ ਨੂੰ ਸਹੀ ਕਰ ਸਕੇ। ਸਰਕਾਰ ਦੀ ਇਸ ਯੋਜਨਾ ਦਾ ਵਿਰੋਧੀ ਧਿਰ ਵੱਲੋਂ ਸਖਤ ਵਿਰੋਧ ਕੀਤਾ ਜਾ ਰਿਹਾ ਹੈ।
ਕੈਨੇਡਾ ਦੀ ਏਅਰ ਟਾਸਕ ਫੋਰਸ ਜਨਵਰੀ ਵਿੱਚ ਰੋਮਾਨੀਆ ਤੋ ਪਰਤੇਗੀ। ਭਾਵੇਂ ਕਿ ਕੈੇਨੇਡੀਅਨ ਆਰਮਡ ਫੋਰਸਿਜ਼ ਵੱਲੋਂ ਅਜੇ ਇਸ ਦਾ ਐਲਾਨ ਨਹੀਂ ਕੀਤਾ ਗਿਆ ਹੈ। ਵੁੱਡਜ਼ ਨੇ ਆਖਿਆ ਕਿ ਉਨ੍ਹਾਂ ਨੂੰ ਉਮੀਦ ਹੈ ਕਿ ਅਗਲੇ ਸਾਲ ਵੀ ਕੈਨੇਡਾ ਦੀ ਐਡੀ ਵੱਡੀ ਫੋਰਸ ਹੀ ਨਾਟੋ ਦੇ ਕਿਸੇ ਹੋਰ ਮਿਸ਼ਨ ਉੱਤੇ ਜਾਵੇਗੀ। ਕੈਨੇਡਾ 2014 ਤੋਂ ਹੀ ਨਾਟੋ ਮਿਸ਼ਨ ਲਈ ਆਪਣੀਆਂ ਫੌਜੀ ਟੁਕੜੀਆਂ ਮੁਹੱਈਆ ਕਰਵਾ ਰਿਹਾ ਹੈ।