ਲੇਹ-ਆਨ-ਸੀਅ, ਇੰਗਲੈਂਡ, 15 ਅਕਤੂਬਰ (ਪੋਸਟ ਬਿਊਰੋ) : ਇੰਗਲੈਂਡ ਦੇ ਇੱਕ ਚਰਚ ਵਿੱਚ ਸ਼ੁੱਕਰਵਾਰ ਨੂੰ ਹਲਕਾ ਵਾਸੀਆਂ ਨਾਲ ਮੁਲਾਕਾਤ ਕਰਨ ਦੌਰਾਨ ਮੈਂਬਰ ਪਾਰਲੀਆਮੈਂਟ ਨੂੰ ਚਾਕੂ ਮਾਰ ਕੇ ਮੌਤ ਦੇ ਘਾਟ ਉਤਾਰ ਦਿੱਤਾ ਗਿਆ। ਇਸ ਨਾਲ ਇੱਕ ਵਾਰੀ ਸਮੁੱਚਾ ਬ੍ਰਿਟੇਨ ਤੇ ਖਾਸਤੌਰ ਉੱਤੇ ਉੱਥੋਂ ਦੇ ਸਿਆਸਤਦਾਨ ਸ਼ੌਕ ਵਿੱਚ ਤੇ ਦੁੱਖ ਵਿੱਚ ਹਨ। ਇਸ ਦੌਰਾਨ 25 ਸਾਲਾ ਵਿਅਕਤੀ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ।
69 ਸਾਲਾ ਕੰਜ਼ਰਵੇਟਿਵ ਐਮਪੀ ਡੇਵਿਡ ਐਮੈੱਸ ਦਾ ਇਸ ਵਿਅਕਤੀ ਵੱਲੋਂ ਕਤਲ ਕਿਉਂ ਕੀਤਾ ਗਿਆ ਇਸ ਦਾ ਅਜੇ ਪਤਾ ਨਹੀਂ ਲੱਗ ਸਕਿਆ ਹੈ ਤੇ ਨਾ ਹੀ ਮਸ਼ਕੂਕ ਦੀ ਪਛਾਣ ਹੀ ਹੋ ਸਕੀ ਹੈ। ਉਸ ਨੂੰ ਬੱਸ ਕਤਲ ਦੇ ਸ਼ੱਕ ਦੇ ਆਧਾਰ ਉੱਤੇ ਹੀ ਗ੍ਰਿਫਤਾਰ ਕੀਤਾ ਗਿਆ ਹੈ।ਇਸ ਤੋਂ ਪੰਜ ਸਾਲ ਪਹਿਲਾਂ ਜੋ ਕੌਕਸ ਨਾਂ ਦੀ ਐਮਪੀ ਦਾ ਵੀ ਉਸ ਦੇ ਹੀ ਹਲਕੇ ਵਿੱਚ ਕਤਲ ਕਰ ਦਿੱਤਾ ਗਿਆ ਸੀ। ਜਿ਼ਕਰਯੋਗ ਹੈ ਕਿ ਬ੍ਰਿਟਿਸ਼ ਸਿਆਸਤਦਾਨ ਜਦੋਂ ਹਲਕਾ ਵਾਸੀਆਂ ਨਾਲ ਮੁਲਾਕਾਤ ਕਰਦੇ ਹਨ ਤਾਂ ਉਨ੍ਹਾਂ ਨੂੰ ਪੁਲਿਸ ਪ੍ਰੋਟੈਕਸ਼ਨ ਮੁਹੱਈਆ ਨਹੀਂ ਕਰਵਾਈ ਜਾਂਦੀ।
ਐਸੈਕਸ ਪੁਲਿਸ ਨੇ ਦੱਸਿਆ ਕਿ ਦੁਪਹਿਰ ਵੇਲੇ ਅਧਿਕਾਰੀਆਂ ਨੂੰ ਲੇਹ-ਆਨ-ਸੀਅ ਵਰਗੇ ਸਮੁੰਦਰ ਕਿਨਾਰੇ ਵੱਸੇ ਨਿੱਕੇ ਜਿਹੇ ਟਾਊਨ ਵਿੱਚ ਵਾਪਰੀ ਇਸ ਛੁਰੇਬਾਜ਼ੀ ਦੀ ਘਟਨਾ ਦੀ ਜਾਣਕਾਰੀ ਦੇ ਕੇ ਸੱਦਿਆ ਗਿਆ। ਪੁਲਿਸ ਨੇ ਇੱਕ ਵਿਅਕਤੀ ਨੂੰ ਗ੍ਰਿਫਤਾਰ ਕਰਕੇ ਉਸ ਕੋਲੋਂ ਚਾਕੂ ਵੀ ਬਰਾਮਦ ਕੀਤਾ ਹੈ। ਪੁਲਿਸ ਨੇ ਆਖਿਆ ਕਿ ਹਾਲ ਦੀ ਘੜੀ ਉਹ ਕਿਸੇ ਹਰ ਵਿਅਕਤੀ ਦੀ ਭਾਲ ਨਹੀਂ ਕਰ ਰਹੇ।
1997 ਤੋਂ ਐਮੈੱਸ ਸਾਊਥਐਂਡ ਵੈਸਟ ਤੋਂ ਮੈਂਬਰ ਪਾਰਲੀਆਮੈਂਟ ਰਹੇ ਹਨ ਤੇ ਉਹ 1983 ਤੋਂ ਨੀਤੀਘਾੜੇ ਸਨ।ਇਸ ਨਾਲ ਉਹ ਹਾਊਸ ਆਫ ਕਾਮਨਜ਼ ਵਿੱਚ ਸੱਭ ਤੋਂ ਵੱਧ ਸੇਵਾ ਨਿਭਾਉਣ ਵਾਲੇ ਸਿਆਸਤਦਾਨ ਬਣ ਗਏ ਸਨ। 2015 ਵਿੱਚ ਮਹਾਰਾਣੀ ਐਲਿਜ਼ਾਬੈੱਥ ਦੋਇਮ ਵੱਲੋਂ ਉਨ੍ਹਾਂ ਨੂੰ ਸਨਮਾਨਿਤ ਕਰਕੇ ਨਾਈਟ ਦੀ ਉਪਾਧੀ ਦੇ ਕੇ ਸਰ ਡੇਵਿਡ ਬਣਾਇਆ ਗਿਆ ਸੀ।