ਓਨਟਾਰੀਓ, 19 ਦਸੰਬਰ (ਪੋਸਟ ਬਿਊਰੋ) : ਪ੍ਰੀਮੀਅਰ ਡੱਗ ਫੋਰਡ ਵੱਲੋਂ ਓਨਟਾਰੀਓ ਦੀ ਪ੍ਰੋਵਿੰਸ਼ੀਅਲ ਪੁਲਿਸ ਦੇ ਡਿਪਟੀ ਕਮਿਸ਼ਨਰ ਬਰੈਡ ਬਲੇਅਰ ਉੱਤੇ ਪੁਲਿਸ ਸਰਵਿਸਿਜ਼ ਐਕਟ ਦੀ ਉਲੰਘਣਾ ਕਰਨ ਦਾ ਦੋਸ਼ ਲਾਇਆ ਜਾ ਰਿਹਾ ਹੈ। ਫੋਰਡ ਦਾ ਕਹਿਣਾ ਹੈ ਕਿ ਅਗਲੇ ਓਪੀਪੀ ਕਮਿਸ਼ਨਰ ਵਜੋਂ ਰੌਨ ਟੈਵਰਨਰਜ਼ ਦੀ ਵਿਵਾਦਗ੍ਰਸਤ ਨਿਯੁਕਤੀ ਬਾਰੇ ਸਿ਼ਕਾਇਤ ਕਰਕੇ ਬਲੇਅਰ ਨੇ ਇਸ ਐਕਟ ਦੀ ਉਲੰਘਣਾ ਕੀਤੀ ਹੈ।
ਜਿ਼ਕਰਯੋਗ ਹੈ ਕਿ ਸ਼ਨਿੱਚਰਵਾਰ ਤੱਕ ਓਪੀਪੀ ਦੇ ਅੰਤਰਿਮ ਮੁਖੀ ਵਜੋਂ ਸੇਵਾ ਨਿਭਾਉਣ ਵਾਲੇ ਬਲੇਅਰ ਉੱਤੇ ਵਰ੍ਹਦਿਆਂ ਫੋਰਡ ਨੇ ਆਖਿਆ ਕਿ ਇੱਕ ਚਿੱਠੀ ਵਿੱਚ ਬਲੇਅਰ ਨੇ ਲਿਖਿਆ ਹੈ ਕਿ 72 ਸਾਲਾ ਟੋਰਾਂਟੋ ਪੁਲਿਸ ਸੁਪਰਡੈਂਟ ਨੂੰ ਪ੍ਰੋਵਿੰਸ਼ੀਅਲ ਫੋਰਸ ਚਲਾਉਣ ਦੀ ਜਿ਼ੰਮੇਵਾਰੀ ਦੇਣ ਦੀ ਹਾਮੀ ਭਰੇ ਜਾਣ ਪਿੱਛੇ ਸਿਆਸੀ ਦਖਲਅੰਦਾਜ਼ੀ ਹੋਈ ਸੀ। ਫੋਰਡ ਨੇ ਇਹ ਨਹੀਂ ਦੱਸਿਆ ਕਿ ਬਲੇਅਰ ਨੇ ਕਿਸ ਖਾਸ ਕਿਸਮ ਨਾਲ ਪੁਲਿਸ ਸਰਵਿਸਿਜ਼ ਐਕਟ ਦੀ ਉਲੰਘਣਾ ਕੀਤੀ ਹੈ।
ਪ੍ਰੀਮੀਅਰ ਨੇ ਮੰਗਲਵਾਰ ਨੂੰ ਆਖਿਆ ਕਿ ਕਾਫੀ ਤਰ੍ਹਾਂ ਦੀ ਗਲਤ ਜਾਣਕਾਰੀ ਦਿੱਤੀ ਜਾ ਰਹੀ ਹੈ। ਪਿਛਲੇ ਹਫਤੇ ਟੈਵਰਨਰ ਵਾਲਾ ਮਾਮਲਾ ਸਾਹਮਣੇ ਆਉਣ ਤੋਂ ਬਾਅਦ ਫੋਰਡ ਵੱਲੋਂ ਪਹਿਲੀ ਵਾਰੀ ਨਿਊਜ਼ ਕਾਨਫਰੰਸ ਕੀਤੀ ਗਈ। ਇਹ ਨਿਯੁਕਤੀ ਅਜੇ ਵੀ ਅਧਵਾਟੇ ਲਮਕ ਰਹੀ ਹੈ ਕਿਉਂਕਿ ਇਹ ਮਾਮਲਾ ਇੰਟੇਗ੍ਰਿਟੀ ਕਮਿਸ਼ਨਰ ਜੇ ਡੇਵਿਡ ਵੇਕ ਕੋਲ ਜਾਂਚ ਲਈ ਪਿਆ ਹੈ। ਜਾਂਚ ਦੌਰਾਨ ਇਹ ਪਤਾ ਲਾਇਆ ਜਾਵੇਗਾ ਕਿ ਕੀ ਇਸ ਨਿਯੁਕਤੀ ਵਿੱਚ ਫੋਰਡ ਨੇ ਕੋਈ ਭੂਮਿਕਾ ਨਿਭਾਈ ਹੈ ਜਾਂ ਨਹੀਂ।