ਜਲੰਧਰ, 27 ਸਤੰਬਰ (ਪੋਸਟ ਬਿਊਰੋ)- ਓ ਕੇ ਫਾਰਜਿਨਸ ਪ੍ਰਾਈਵੇਟ ਕੰਪਨੀ ਦਾ ਨਿੱਜੀ ਡਾਟਾ ਲੀਕ ਕਰਨ ਦੇ ਦੋਸ਼ ਵਿੱਚ ਥਾਣਾ ਅੱਠ ਦੀ ਪੁਲਸ ਨੇ ਕੱਲ੍ਹ ਕੰਪਨੀ ਦੇ ਇੰਪੋਰਟ ਬਿਜ਼ਨਸ ਡਿਵੈਲਪਮੈਂਟ (ਆਈ ਬੀ ਡੀ) ਅਫਸਰ ਦੇ ਖਿਲਾਫ 420 ਦਾ ਕੇਸ ਦਰਜ ਕੀਤਾ ਹੈ। ਦੋਸ਼ੀ ਰਾਹੁਲ ਜੈਨ ਵਾਸੀ ਮੁਹੱਲਾ ਨੰਬਰ 27 ਜਲੰਧਰ ਕੈਂਟ ਨੇ ਹਜ਼ਾਰਾਂ ਗੁਪਤ ਦਸਤਾਵੇਜ਼ ਈ-ਮੇਲ ਦੇ ਰਾਹੀਂ ਲਿੰਕ ਕੀਤੇ ਸਨ। ਪਹਿਲਾਂ ਇਸ ਵਿੱਚ ਸੇਲਜ਼ ਮੈਨੇਜਰ ਦਾ ਨਾਂਅ ਵੀ ਚੱਲਦਾ ਸੀ, ਪਰ ਜਾਂਚ ਵਿੱਚ ਉਸ ਨੂੰ ਕਲੀਨ ਚਿੱਟ ਮਿਲ ਗਈ ਅਤੇ ਬਾਕੀ ਲੋਕਾਂ ਬਾਰੇ ਪੁਲਸ ਜਾਂਚ ਕਰ ਰਹੀ ਹੈ।
ਪਠਾਨਕੋਟ ਬਾਈਪਾਸ ਉੱਤੇ ਸਥਿਤ ਇਸ ਕੰਪਨੀ ਦੇ ਡੀ ਜੀ ਐਮ ਪ੍ਰਦੀਪ ਸ਼ਰਮਾ ਨੇ ਪੁਲਸ ਨੂੰ ਦੱਸਿਆ ਕਿ ਰਾਹੁਲ ਜੈਨ ਕਾਫੀ ਸਮੇਂ ਤੋਂ ਆਈ ਬੀ ਡੀ ਅਫਸਰ ਦੀ ਪੋਸਟ ਉੱਤੇ ਕੰਮ ਕਰ ਰਿਹਾ ਸੀ ਅਤੇ ਇਸ ਦੇ ਕੋਲ ਕੰਪਨੀ ਦੀ ਖਰੀਦੋ-ਫਰੋਖਤ ਅਤੇ ਦੇਸੀ ਤੇ ਵਿਦੇਸ਼ੀ ਕੰਪਨੀਆਂ ਨਾਲ ਡੀਲਿੰਗ ਦਾ ਸਾਰਾ ਡਾਟਾ ਹੁੰਦਾ ਸੀ। ਬੀਤੀ 29 ਅਪ੍ਰੈਲ ਨੂੰ ਉਸ ਨੇ ਸੋਸ਼ਲ ਮੀਡੀਆ ਰਾਹੀਂ ਅਸਤੀਫਾ ਭੇਜਿਆ, ਜਿਸ ਨੂੰ ਦੋ ਦਿਨ ਬਾਅਦ ਮਨਜ਼ੂਰ ਕਰ ਲਿਆ ਗਿਆ, ਪਰ ਕੰਪਨੀ ਨੇ ਤਿੰਨ ਮਹੀਨੇ ਦਾ ਟਾਈਮ ਬੌਂਡ ਦਿੱਤਾ ਕਿ ਉਹ ਓਦੋਂ ਤਕ ਕੰਮ ਕਰੇਗਾ। ਇਸ ਦੇ ਬਾਅਦ 10 ਮਈ ਨੂੰ ਰਾਹੁਲ ਨੇ ਕੰਪਨੀ ਨੂੰ ਦੋਬਾਰਾ ਈ-ਮੇਲ ਕਰ ਕੇ ਅਸਤੀਫਾ ਜਲਦੀ ਮਨਜ਼ੂਰੀ ਕਰਨ ਦੀ ਮੰਗ ਕੀਤੀ।ਪ੍ਰਦੀਪ ਸ਼ਰਮਾ ਨੇ ਪੁਲਸ ਨੂੰ ਦੱਸਿਆ ਕਿ ਜਦ ਉਸ ਦੇ ਮੋਬਾਈਲ ਫੋਨ ਦੀ ਜਾਂਚ ਕਰਵਾਈ ਤਾਂ ਪਤਾ ਲੱਗਾ ਕਿ ਛੇ ਮਈ ਨੂੰ ਰਾਹੁਲ ਨੇ ਮਹੱਤਵਪੂਰਨ ਡਾਟਾ ਕੰਪਨੀ ਦੇ ਸੇਲਜਮੈਨ ਨੂੰ ਸ਼ੇਅਰ ਕੀਤਾ ਅਤੇ ਕੁਝ ਫਾਈਲਾਂ ਪੀ ਡੀ ਐਫ ਵਜੋਂ ਸਾਬਕਾ ਮੁਲਾਜ਼ਮਾਂ ਨੂੰ ਭੇਜੀਆਂ ਸਨ। ਇਸ ਦਾ ਪਤਾ ਲੱਗਾ ਤਾਂ ਉਨ੍ਹਾਂ ਨੇ ਲੁਧਿਆਣਾ ਵਿੱਚ ਰਹਿੰਦੇ ਕੰਪਨੀ ਦੇ ਸੇਲਜਮੈਨ ਨੂੰ ਦਫਤਰ ਸੱਦਿਆ ਤੇ ਉਸ ਦੇ ਲੈਪਟਾਪ ਤੋਂ ਉਸ ਦਾ ਸੋਸ਼ਲ ਮੀਡੀਆ ਅਕਾਊਂਟ ਚੈਕ ਕੀਤਾ। ਉਥੋਂ ਪਤਾ ਲੱਗਾ ਕਿ ਰਾਹੁਲ ਜੈਨ ਨੇ ਛੇ ਮਈ ਨੂੰ ਕਰੀਬ 45 ਮੈਸੇਜ ਕਰਕੇ ਡੇਢ ਸੌ ਅਟੈਚਮੈਂਟ ਫਾਈਲਾਂ ਅਤੇ ਹਜ਼ਾਰ ਤੋਂ ਵੱਧ ਦਸਤਾਵੇਜ਼ ਸਾਬਕਾ ਮੁਲਾਜ਼ਮ ਨੂੰ ਭੇਜੇ ਸਨ।