ਕਾਬੁਲ, 27 ਸਤੰਬਰ (ਪੋਸਟ ਬਿਊਰੋ)- ਤਾਲਿਬਾਨ ਦੀ ਅੰਤਿ੍ਰਮ ਸਰਕਾਰ ਨੇ ਏਅਰਲਾਈਨ ਕੰਪਨੀਆਂ ਨੂੰ ਕੌਮਾਂਤਰੀ ਉਡਾਣਾਂ ਸ਼ੁਰੂ ਕਰਨ ਦੀ ਅਪੀਲ ਕੀਤੀ ਹੈ ਅਤੇ ਕਿਹਾ ਹੈ ਕਿ ਉਹ ਏਅਰਲਾਈਨਾਂ ਨੂੰ ਸਹੂਲਤ ਤੇ ਸੁਰੱਖਿਆ ਦੇਣਗੇ। ਅਜੇ ਤਕ ਕਾਬੁਲ ਏਅਰਪੋਰਟ ਉੱਤੇ ਰਾਹਤ ਸਮੱਗਰੀ ਲੈ ਕੇ ਹੀ ਜਹਾਜ਼ ਉਤਰ ਰਹੇ ਹਨ। ਇਸ ਤੋਂ ਇਲਾਵਾ ਪਾਕਿਸਤਾਨ ਨੇ ਕੁਝ ਉਡਾਣਾਂ ਸ਼ੁਰੂ ਕਰ ਦਿੱਤੀਆਂ ਹਨ, ਪਰ ਬਾਕੀ ਜਹਾਜ਼ ਓਥੇ ਨਹੀਂ ਜਾ ਰਹੇ।
ਇਸ ਸੰਬੰਧ ਵਿੱਚ ਤਾਲਿਬਾਨ ਸਰਕਾਰ ਦੇ ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਅਬਦੁਲ ਕਾਹਰ ਬਲਖੀ ਨੇ ਕਿਹਾ ਕਿ ਅਫਗਾਨਿਸਤਾਨ ਵਿੱਚ ਸਥਿਤੀ ਆਮ ਵਰਗੀ ਹੋ ਰਹੀ ਹੈ, ਅਜਿਹੀ ਸਥਿਤੀ ਵਿੱਚ ਪੜ੍ਹਨ ਜਾਂ ਕਾਰੋਬਾਰ ਕਰਨ ਲਈ ਲੋਕ ਬਾਹਰ ਜਾਣਾ ਚਾਹੁੰਦੇ ਹਨ। ਉਨ੍ਹਾਂ ਲਈ ਕੌਮਾਂਤਰੀ ਉਡਾਣਾਂ ਦੀ ਲੋੜ ਹੈ। ਅਸੀਂ ਅਜਿਹੀਆਂ ਸਾਰੀਆਂ ਉਡਾਣਾਂ ਦੇ ਆਉਣ-ਜਾਣ ਦੀਆਂ ਜ਼ਰੂਰੀ ਵਿਵਸਥਾਵਾਂ ਕਰ ਰਹੇ ਹਾਂ। ਖਬਰ ਏਜੰਸੀ ਮੁਤਾਬਕ ਅਫਗਾਨਿਸਤਾਨ ਦੇ ਦੂਰ-ਦਰਾਜ ਦੇ ਇਲਾਕੇ ਤਾਂ ਕੀ, ਰਾਜਧਾਨੀ ਕਾਬੁਲ ਵਿੱਚ ਵੀ ਖੁਰਾਕੀ ਸਮੱਗਰੀ ਲਈ ਕੀਮਤਾਂ ਤੇਜ਼ੀ ਨਾਲ ਵੱਧ ਰਹੀਆਂ ਹਨ। ਦਵਾਈਆਂ ਦੀ ਕਿੱਲਤ ਬਣੀ ਹੋਈ ਹੈ। ਸਥਿਤੀ ਇਹ ਹੈ ਕਿ ਜ਼ਰੂਰੀ ਸਾਮਾਨ ਵੀ ਨਹੀਂ ਮਿਲ ਰਿਹਾ। ਪੈਟਰੋਲ ਡੀਜ਼ਲ ਦੀ ਕੀਮਤ ਬਹੁਤ ਵਧਣ ਕਾਰਨ ਯਾਤਰੀ ਬੱਸਾਂ ਤੇ ਟੈਕਸੀਆਂ ਨੇ ਵੀ ਕਿਰਾਏ ਵਧਾ ਦਿੱਤੇ ਹਨ। ਤੇਲ ਦੀਆਂ ਕੀਮਤਾਂ ਇੱਥੇ ਵੀਹ ਤੋਂ ਚਾਲੀ ਫੀਸਦੀ ਤਕ ਵਧ ਗਈਆਂ ਹਨ। ਸਬਜ਼ੀਆਂ ਦੀਆਂ ਕੀਮਤਾਂ ਪੰਜਾਹ ਫੀਸਦੀ ਵਧ ਗਈਆਂ ਹਨ।