ਲੁਧਿਆਣਾ, 26 ਸਤੰਬਰ (ਪੋਸਟ ਬਿਊਰੋ)- ਕੱਲ੍ਹ ਡੇਹਲੋਂ ਨੇੜਲੇ ਪਿੰਡ ਭੁੱਟਾ ਵਿੱਚ ਵੱਡੇ ਤੜਕੇ ਕਾਰ ਸਵਾਰ ਲੁਟੇਰਿਆਂ ਨੇ ਸਟੇਟ ਬੈਂਕ ਆਫ ਇੰਡੀਆ ਦਾ ਏ ਟੀ ਐਮ ਕੱਟ ਕੇ 18.30 ਲੱਖ ਰੁਪਏ ਦੀ ਨਕਦੀ ਲੁੱਟ ਲਈ।
ਮਿਲੀ ਜਾਣਕਾਰੀ ਅਨੁਸਾਰ ਇਸ ਪਿੰਡ ਵਿੱਚ ਲੱਗੇ ਸਟੇਟ ਬੈਂਕ ਆਫ ਇੰਡੀਆ (ਐਸ ਬੀ ਆਈ)ਦਾ ਏ ਟੀ ਐਮ ਲੁੱਟਣ ਲਈ ਕਾਰ ਸਵਾਰ ਤਿੰਨ ਲੁਟੇਰੇ ਆਏ ਸਨ। ਉਨ੍ਹਾਂ ਨੇ ਸਭ ਤੋਂ ਪਹਿਲਾਂ ਏ ਟੀ ਐਮ ਦਾ ਸ਼ਟਰ ਉਖਾੜਿਆ ਤੇ ਫਿਰ ਗੈਸ ਕਟਰ ਨਾਲ ਏ ਟੀ ਐਮ ਮਸ਼ੀਨ ਕੱਟੀ ਅਤੇ ਕੈਬਿਨ ਵਿੱਚ ਦਾਖਲ ਹੁੰਦੇ ਸਾਰ ਸੀ ਸੀ ਟੀ ਵੀ ਕੈਮਰੇ ਉੱਤੇ ਸਪਰੇਅ ਕਰ ਦਿੱਤਾ ਅਤੇ ਏ ਟੀ ਐਮ ਮਸ਼ੀਨ ਕੱਟ ਕੇ ਨਕਦੀ ਕੱਢ ਲਈ।ਏ ਸੀ ਪੀ ਸਾਊਥ ਦੀਪਕਮਲ ਨੇ ਦੱਸਿਆ ਕਿ ਸੇਡਾਨ ਕਾਰ ਵਿੱਚ ਸਵਾਰ ਹੋ ਕੇ ਆਏ ਲੁਟੇਰਿਆਂ ਨੇ ਏ ਟੀ ਐਮ ਮਸ਼ੀਨ ਲੁੱਟੀ ਹੈ। ਉਸ ਸਮੇਂ ਏ ਟੀ ਐਮ ਮਸ਼ੀਨ ਦੇ ਕੈਬਿਨ ਦਾ ਸ਼ਟਰ ਬੰਦ ਸੀ, ਜਿਸ ਨੂੰ ਪੁੱਟ ਕੇ ਲੁਟੇਰੇ ਮਸ਼ੀਨ ਕੱਟ ਕੇ ਨਕਦੀ ਲੁੱਟ ਕੇ ਫਰਾਰ ਹੋਏ ਹਨ। ਵਾਰਦਾਤ ਸਮੇਂ ਏ ਟੀ ਐਮ ਮਸ਼ੀਨ ਵਿੱਚ ਮੌਜੂਦ ਨਕਦੀ ਦੇ ਬਾਰੇ ਬੈਂਕ ਅਧਿਕਾਰੀਆਂ ਤੋਂ ਜਾਣਕਾਰੀ ਲਈ ਜਾ ਰਹੀ ਹੈ ਅਤੇ ਲੁਟੇਰਿਆਂ ਦੇ ਖਿਲਾਫ ਮਾਮਲਾ ਦਰਜ ਕਰਨ ਪਿੱਛੋਂ ਸੀ ਸੀ ਟੀ ਵੀ ਫੁਟੇਜ ਦੇ ਆਧਾਰ ਉੱਤੇ ਜਾਂਚ ਕੀਤੀ ਜਾ ਰਹੀ ਹੈ।