ਤਰਨ ਤਾਰਨ, 26 ਸਤੰਬਰ (ਪੋਸਟ ਬਿਊਰੋ)- ਪੰਜਾਬ ਪੁਲਸ ਦੇ ਇੱਕ ਸਾਬਕਾ ਡੀ ਐਸ ਪੀ ਗੁਰਮੇਜ ਸਿੰਘ ਵਾਸੀ ਗੁਰੂ ਨਾਨਕ ਕਾਲੋਨੀ ਪੱਟੀ ਨੇ ਮੁਹੱਲਾ ਜਸਵੰਤ ਸਿੰਘ, ਤਰਨ ਤਾਰਨ ਦੇ ਵਾਸੀ ਗੁਰਦੇਵ ਸਿੰਘ ਦੇ ਖਿਲਾਫ ਕਰੀਬ ਪੰਜਾਹ ਲੱਖ ਦੀ ਠੱਗੀ ਮਾਰਨ ਦਾ ਕੇਸ ਦਰਜ ਕਰਵਾਇਆ ਹੈ। ਇਹ ਠੱਗੀ ਗੁਰਮੇਜ ਸਿੰਘ ਸਣੇ 45 ਲੋਕਾਂ ਨਾਲ ਕੀਤੀ ਗਈ ਹੈ। ਇਹ ਕੇਸ 22 ਅਪ੍ਰੈਲ ਨੂੰ ਦਿੱਤੀ ਸ਼ਿਕਾਇਤ ਦੀ ਜਾਂਚ ਦੇ ਬਾਅਦ ਕੱਲ੍ਹ ਦਰਜ ਕੀਤਾ ਗਿਆ ਹੈ।
ਸਾਬਕਾ ਡੀ ਐਸ ਪੀ ਗੁਰਮੇਜ ਸਿੰਘ ਨੇ ਦੱਸਿਆ ਕਿ ਗੁਰਦੇਵ ਸਿੰਘ ਨੇ ਰੂਬੀ ਕ੍ਰੈਡਿਟ ਕੋਆਪਰੇਟਿਵ ਸੋਸਾਇਟੀ ਦੇ ਨਾਂਅ ਉੱਤੇ ਕੰਪਨੀ ਬਣਾ ਕੇ ਬੈਂਕ ਤੋਂ ਵੱਧ ਵਿਆਜ ਦਿਵਾਉਣ ਦੇ ਨਾਂਅ ਉੱਤੇ ਪੈਸੇੇ ਲੈਣੇ ਸ਼ੁਰੂ ਕੀਤੇ ਸਨ। ਜਦ ਉਸ ਤੋਂ ਪੈਸੇ ਵਾਪਸ ਮੰਗੇ ਤਾਂ ਉਸ ਨੇ ਨਹੀਂ ਮੋੜੇ। ਗੁਰਦੇਵ ਸਿੰਘ ਨੇ ਸਾਬਕਾ ਡੀ ਐਸ ਪੀ ਗੁਰਮੇਜ ਅਤੇ ਉਸ ਦੀ ਪਤਨੀ ਦੇ ਇਲਾਵਾ ਕਰੀਬ 45 ਲੋਕਾਂ ਤੋਂ ਇੱਕ ਲੱਖ ਤੋਂ ਲੈ ਕੇ ਸਵਾ ਲੱਖ ਰੁਪਏ ਲੈ ਲਏ। ਕਈ ਲੋਕਾਂ ਨੇ ਆਪਣੀ ਐਫ ਡੀ ਤੁੜਵਾ ਕੇ ਗੁਰਦੇਵ ਸਿੰਘ ਨੂੰ ਪੈਸੇ ਜਮ੍ਹਾਂ ਦਿੱਤੇ ਸਨ। ਲੋਕਾਂ ਤੋਂ ਪੈਸੇ ਲੈ ਕੇ ਗੁਰਦੇਵ ਸਿੰਘ ਨੇ ਐਫ ਡੀ ਸਰਟੀਫਿਕੇਟ ਤਾਂ ਦਿੱਤੇ, ਪਰੰਤੂ ਬਾਅਦ ਵਿੱਚ ਪੈਸੇ ਨਹੀ ਮੋੜੇ।ਇਸ ਦੀ ਜਾਂਚ ਡੀ ਐਸ ਪੀ ਸਪੈਸ਼ਲ ਕਰਾਈਮ ਬ੍ਰਾਂਚ ਨੇ ਕੀਤੀ ਅਤੇ ਪੱਟੀ ਥਾਣੇ `ਚ ਦੋਸ਼ੀ ਉੱਤੇ ਕੇਸ ਦਰਜ ਕਰਨ ਦੇ ਬਾਅਦ ਕਾਰਵਾਈ ਕੀਤੀ ਜਾ ਰਹੀ ਹੈ।