ਮੋਗਾ, 25 ਸਤੰਬਰ (ਪੋਸਟ ਬਿਊਰੋ)- ਇਸ ਸ਼ਹਿਰ ਦੀ ਨਗਰ ਨਿਗਮ ਦੇ ਡਿਪਟੀ ਮੇਅਰ ਅਸ਼ੋਕ ਕੁਮਾਰ ਧਮੀਜਾ ਨੂੰ ਥੱਪੜ ਮਾਰਨ ਵਾਲੇ ਥਾਣਾ ਡਿਵੀਜ਼ਨ-5 ਲੁਧਿਆਣਾ ਦੇ ਮੁਖੀ ਸਬ-ਇੰਸਪੈਕਟਰ ਕੁਲਦੀਪ ਸਿੰਘ ਦੇ ਖ਼ਿਲਾਫ਼ ਥਾਣਾ ਸਿਟੀ ਵਿੱਚ ਕੱਲ੍ਹ ਕੇਸ ਦਰਜ ਕੀਤਾ ਗਿਆ ਹੈ। ਥਾਣੇਦਾਰ ਦੇ ਖ਼ਿਲਾਫ਼ ਕਾਰਵਾਈ ਲਈ ਲੋਕਾਂ ਵੱਲੋਂ ਦਿੱਤੇ ਧਰਨੇ ਵਿੱਚ ਰਾਤ ਇੱਕ ਵਜੇ ਹਾਕਮ ਧਿਰ ਦੇ ਵਿਧਾਇਕ ਡਾ. ਹਰਜੋਤ ਕਮਲ ਵੀ ਪਹੁੰਚੇ ਅਤੇ ਧਰਨਾ ਤੜਕੇ ਤਿੰਨ ਵਜੇ ਤੱਕ ਚੱਲਿਆ, ਜਿਸ ਦੇ ਬਾਅਦ ਕੇਸ ਦਰਜ ਕਰਨ ਦੀ ਮੰਗੀ ਮੰਨੀ ਜਾਣ ਉੱਤੇ ਧਰਨਾ ਖਤਮ ਕੀਤਾ ਗਿਆ ਹੈ।
ਵਰਨਣ ਯੋਗ ਹੈ ਕਿ ਸਬ-ਇੰਸਪੈਕਟਰ ਕੁਲਦੀਪ ਸਿੰਘ ਨੇ ਪਰਸੋਂ ਚੋਰੀ ਦਾ ਮੋਟਰਸਾਈਕਲ ਬਰਾਮਦ ਕਰਨ ਲਈ ਇੱਥੇ ਕਬਾੜ ਬਾਜ਼ਾਰ ਵਿੱਚ ਛਾਪਾ ਮਾਰਿਆ ਸੀ। ਸਥਾਨਕ ਪੁਲਸ ਅਧਿਕਾਰੀ ਦੋਵਾਂ ਧਿਰਾਂ ਦਾ ਸਮਝੌਤਾ ਕਰਾਉਣ ਦੀ ਕੋਸ਼ਿਸ਼ ਕਰਦੇ ਰਹੇ। ਡਿਪਟੀ ਮੇਅਰ ਅਤੇ ਸਥਾਨਕ ਕਬਾੜ ਬਾਜ਼ਾਰ ਦੇ ਪ੍ਰਧਾਨ ਅਸ਼ੋਕ ਕੁਮਾਰ ਧਮੀਜਾ ਨੇ ਪੁਲਸ ਨੂੰ ਦਿੱਤੇ ਬਿਆਨ ਵਿੱਚ ਕਿਹਾ ਕਿ ਲੁਧਿਆਣਾ ਪੁਲਸ ਨੇ ਉਸ ਦੇ ਭਤੀਜੇ ਦੀ ਦੁਕਾਨ ਉੱਤੇ ਛਾਪਾ ਮਾਰਿਆ ਸੀ। ਉਹ ਸ਼ਹਿਰ ਦਾ ਨੁਮਾਇੰਦਾ ਅਤੇ ਕਬਾੜ ਬਾਜ਼ਾਰ ਦਾ ਪ੍ਰਧਾਨ ਹੋਣ ਕਾਰਨ ਉਥੇ ਪੁੱਜੇ ਤਾਂ ਪੁਲਸ ਨੇ ਉਸਦੀ ਗੱਲ ਸੁਣਨ ਦੀ ਥਾਂਇੱਕ ਲੱਖ ਰੁਪਏ ਦੀ ਰਿਸ਼ਵਤ ਮੰਗੀ ਅਤੇ ਫਿਰ ਤੈਸ਼ ਵਿੱਚ ਆਏ ਐਸ ਐਚ ਓ ਕੁਲਦੀਪ ਸਿੰਘ ਨੇ ਉਸ ਨੂੰ ਥੱਪੜ ਮਾਰ ਦਿੱਤਾ ਸੀ। ਕੱਲ੍ਹ ਡਿਪਟੀ ਮੇਅਰ ਨਾਲ ਹੋਈ ਬਦਸਲੂਕੀ ਖ਼ਿਲਾਫ਼ ਨਗਰ ਨਿਗਮ ਕਾਮਿਆਂ ਨੇ ਕੰਮਕਾਜ ਠੱਪ ਰੱਖਿਆ। ਮੋਗਾ ਪੁਲਸ ਨੇ ਜ਼ਿਲ੍ਹਾ ਮੈਜਿਸਟਰੇਟ ਨੂੰ ਇਸ ਮਾਮਲੇ ਦੀ ਜਾਂਚ ਕਰਵਾਉਣ ਲਈ ਰਿਪੋਰਟ ਵਿੱਚ ਸਾਰੇ ਹਾਲਾਤ ਤੋਂ ਜਾਣੂ ਕਰਵਾਇਆ ਹੈ, ਜਿਸ ਦੀ ਪੁਸ਼ਟੀ ਡੀ ਐਸ ਪੀ ਸਿਟੀ ਜਸ਼ਨਦੀਪ ਸਿੰਘ ਗਿੱਲ ਨੇ ਕੀਤੀ ਹੈ।