ਜ਼ੀਰਕਪੁਰ, 23 ਸਤੰਬਰ (ਪੋਸਟ ਬਿਊਰੋ)- ਗੁਪਤਾ ਬਿਲਡਰ ਐਂਡ ਪ੍ਰਮੋਟਰਸ (ਜੀ ਬੀ ਪੀ) ਗਰੁੱਪ ਦੇ ਡਾਇਰੈਕਟਰ ਲੋਕਾਂ ਦੀ ਖੂਨ ਪਸੀਨੇ ਦੀ ਕਮਾਈ ਦੇ ਕਰੋੜਾਂ ਰੁਪਏ ਲੈ ਕੇ ਰਾਤੋਂ-ਰਾਤ ਫਰਾਰ ਹੋ ਗਏ ਹਨ।
ਪਤਾ ਲੱਗਾ ਹੈ ਕਿ ਇਨ੍ਹਾਂ ਬਿਲਡਰਾਂ ਨੇ ਜਿਸ ਪ੍ਰੋਜੈਕਟ ਦੇ ਨਾਂਅ ਉੱਤੇ ਲੋਕਾਂ ਨੂੰ ਘਰ ਦਾ ਸੁਫਨਾ ਦਿਖਾਇਆ, ਉਸ ਉੱਤੇ ਤਾਲੇ ਲੱਗ ਗਏ ਹਨ। ਹਜ਼ਾਰਾਂ ਇਨਵੈਸਟਰ ਅਤੇ ਲੋਕ ਗਰੁੱਪ ਦੇ ਬਿਲਡਰਾਂ ਨੂੰ ਲੱਭ ਰਹੇ ਹਨ, ਜੋ ਉਨ੍ਹਾਂ ਨੂੰ ਘਰ ਦਾ ਸੁਫਨਾ ਦਿਖਾ ਕੇ ਧੋਖਾਧੜੀ ਕਰ ਕੇ ਗਾਇਬ ਹੋ ਗਏ ਹਨ। ਇਸ ਦੀ ਸੂਚਨਾ ਮਿਲਦੇ ਹੀ ਇਨਫੋਰਸਮੈਂਟ ਡਾਇਰੈਕਟੋਰੇਟ (ਈ ਡੀ) ਨੇ ਇਸ ਗਰੁੱਪ ਦੇ ਚੰਡੀਗੜ੍ਹ ਸੈਕਟਰ 34 ਵਾਲੇ ਹੈਡ ਆਫਿਸ, ਖਰੜ ਅਤੇ ਡੇਰਾਬੱਸੀ ਵਾਲੇ ਦਫਤਰ ਨੂੰ ਸੀਲ ਕਰ ਦਿੱਤਾ ਅਤੇ ਸਾਰੇ ਜਗ੍ਹਾ ਤੋਂ ਕੰਪਿਊਟਰ ਅਤੇ ਹੋਰ ਦਸਤਾਵੇਜ਼ ਜ਼ਬਤ ਕਰ ਲਏ ਹਨ। ਈ ਡੀ ਨੇ ਕੰਪਨੀ ਦੇ ਸਾਰੇ ਬੈਂਕ ਖਾਤਿਆਂ ਨੂੰ ਵੀ ਖੜੇ ਪੈਰ ਸੀਲ ਕਰ ਦਿੱਤਾ ਹੈ। ਇਸ ਕੰਪਨੀ ਨੇ ਹਿਮਾਚਲ ਪ੍ਰਦੇਸ਼, ਖਰੜ, ਡੇਰਾਬੱਸੀ ਅਤੇ ਟ੍ਰਾਈਸਿਟੀ ਵਿੱਚ ਕਰੀਬ 15 ਪ੍ਰੋਜੈਕਟ ਚੱਲ ਰਹੇ ਸਨ ਅਤੇ ਪੈਸਾ ਲੋਕਾਂ ਦਾ ਲੱਗਾ ਸੀ।
ਜ਼ੀਰਕਪੁਰ ਪੰਜਾਬ ਦਾ ਉਭਰਦਾ ਹੋਇਆ ਪ੍ਰਾਪਰਟੀ ਹਬ ਹੋਣ ਕਾਰਨ ਇੱਥੇ ਚੱਲਦੇ ਪ੍ਰੋਜੈਕਟਾਂ ਉੱਤੇ ਸੈਲੀਬ੍ਰਿਟੀ ਤੇ ਸਿਆਸਤਦਾਨਾਂ ਤੇ ਆਮ ਜਨਤਾ ਨੇ ਪੈਸਾ ਲਾਇਆ ਹੋਇਆ ਹੈ। ਡੇਰਾਬੱਸੀ ਬੇਸ ਗੁਪਤਾ ਬਿਲਡਰ ਐਂਡ ਪ੍ਰਮੋਟਰਸ (ਜੀ ਬੀ ਪੀ) ਜ਼ੀਰਕਪੁਰ ਦੇ ਨਾਮੀ ਬਿਲਡਰਾਂ ਵਿੱਚੋਂ ਇੱਕ ਸੀ। ਉਨ੍ਹਾਂ ਦਾ ਟਾਪ-10 ਸ਼੍ਰੇਣੀ ਵਿੱਚ ਦੂਸਰਾ ਸਥਾਨ ਸੀ। ਜੀ ਬੀ ਗਰੁੱਪ ਦੇ ਮਾਲਕ ਤਿੰਨੇ ਭਰਾ ਪੈਸਾ ਇਕੱਠਾ ਕਰ ਕੇ ਵਿਦੇਸ਼ ਦੌੜ ਗਏ ਹਨ। ਇਹ ਗੱਲ ਮਾਰਕੀਟ ਵਿੱਚ ਫੈਲਦੇ ਹੀ ਉਨ੍ਹਾਂ ਦੇ ਪ੍ਰੋਜੈਕਟਾਂ ਉੱਤੇ ਪੈਸਾ ਲਾਉਣ ਵਾਲਿਆਂ ਦਾ ਤਾਂਤਾ ਲੱਗ ਗਿਆ। ਕੱਲ੍ਹ ਜ਼ੀਰਕਪੁਰ ਵਿੱਚ ਏਥੇਂਸ ਨਾਂਅ ਦੇ ਪ੍ਰੋਜੈਕਟ ਉੱਤੇ ਤਾਲੇ ਲੱਗ ਗਏ। ਉਥੋਂ ਦਾ ਸਾਰਾ ਸਟਾਫ ਵੀ ਫਰਾਰ ਹੋ ਚੁੱਕਾ ਹੈ। ਕੁਝ ਬਿਲਡਰਾਂ ਨੇ ਬੈਂਕ ਤੋਂ ਕਰਜ਼ਾ ਲੈ ਕੇ ਪ੍ਰੋਜੈਕਟ ਉੱਤੇ ਪੈਸਾ ਲਗਾਇਆ ਹੋਇਆ ਸੀ। ਚਰਚਾ ਹੈ ਕਿ ਗੁਪਤਾ ਬਿਲਡਰਸ ਪੈਸਾ ਲੈ ਕੇ ਕੈਨੇਡਾ ਸੈਟਲ ਹੋ ਗਏ ਹਨ।