ਰੋਮ, 21 ਸਤੰਬਰ, (ਪੋਸਟ ਬਿਊਰੋ)- ਈਸਾਈ ਧਰਮ ਲਈ ਜਗਤ ਗੁਰੂ ਪੋਪ ਫਰਾਂਸਿਸ ਨੇ ਆਪਣੇ ਵਿਰੁੱਧ ਰੂੜੀਵਾਦੀ ਆਲੋਚਕਾਂ ਉੱਤੇ ਨਿਸ਼ਾਨਾ ਵਿੰਨ੍ਹਦੇ ਹੋਏ ਕਿਹਾ ਹੈ ਕਿ ਉਨ੍ਹਾਂ ਦੀਆਂ ਅਸ਼ਲੀਲ ਟਿੱਪਣੀਆਂ ਸ਼ੈਤਾਨ ਦਾ ਕੰਮ ਹਨ ਅਤੇ ਪਿਛਲੇ ਦਿਨੀਂ ਹੋਈ ਮੇਰੀ ਅੰਤੜੀਆਂ ਦੀ ਸਰਜਰੀ ਤੋਂ ਬਾਅਦ ਕੁਝ ਲੋਕ ਚਾਹੁੰਦੇ ਸਨ ਕਿ ਮੈਂ ਮਰ ਜਾਵਾਂ।
ਪੋਪ ਫਰਾਂਸਿਸ ਨੇ ਸਲੋਵਾਕ ਦੀ ਰਾਜਧਾਨੀ ਬ੍ਰਾਤਿਸਲਾਵਾ ਵਿੱਚ ਪਹੁੰਚਣ ਤੋਂ ਤੁਰੰਤ ਬਾਅਦ ਏਥੇ ਸਲੋਵਾਕੀਆ ਦੇ ਜੇਸੂਆਈਟਸ ਨਾਲ ਹੋਈ ਇਕ ਬੈਠਕ ਵਿੱਚ ਇਹ ਗੱਲ ਕਹੀ ਹੈ। ਇਸ ਬੈਠਕ ਵਿੱਚ ਹੋਈ ਗੱਲਬਾਤ ਦੇ ਕੁਝ ਖਾਸ ਅੰਸ਼ ਮੰਗਲਵਾਰ ਨੂੰ ਜੈਸੂਆਈਟ ਜਰਨਲ ਲਾਅ ਸਿਵਿਲਟਾ ਕੈਟੋਲੀਆ ਵਿੱਚਛਾਪੇ ਗਏ ਹਨ।ਇਸ ਗੱਲਬਾਤ ਮੌਕੇ ਪਾਦਰੀ ਨੇ ਉਨ੍ਹਾਂ ਤੋਂ ਪੁੱਛਿਆ ਕਿ ਉਹ ਕਿੱਦਾਂ ਮਹਿਸੂਸ ਕਰਦੇ ਹਨ ਤਾਂ ਪੋਪ ਨੇ ਮਜ਼ਾਕੀਆ ਲਹਿਜ਼ੇ ਵਿੱਚ ਕਿਹਾ ਅਜੇ ਮੈਂ ਜਿੰਦਾ ਹਾਂ। ਉਨ੍ਹਾਂ ਕਿਹਾ ਕਿ ਕੁਝ ਲੋਕ ਚਾਹੁੰਦੇ ਸਨ ਕਿ ਮੈਂ ਮਰ ਜਾਵਾਂ, ਮੈਨੂੰ ਪਤਾ ਹੈ ਕਿ ਪਾਦਰੀ ਲੋਕ ਬੈਠਕਾਂ ਕਰਨ ਲੱਗੇ ਸਨ ਅਤੇ ਕਹਿ ਰਹੇ ਸਨ ਕਿ ਪੋਪ ਦੀ ਹਾਲਤ ਜਿਹੜੀ ਦੱਸੀ ਜਾਂਦੀ ਹੈ, ਅਸਲ ਵਿੱਚ ਉਹ ਉਸ ਤੋਂ ਵੱਧ ਖਰਾਬ ਹੈ, ਉਹ ਅੱਗੇ ਦੀ ਤਿਆਰੀ ਕਰ ਰਹੇ ਸਨ। ਸਬਰ ਰੱਖੋ, ਰੱਬ ਦਾ ਸ਼ੁਕਰ ਹੈ ਮੈਂ ਠੀਕ ਹਾਂ।
ਅਸਲ ਵਿੱਚ ਪੋਪ ਫਰਾਂਸਿਸ ਦੀ ਜੁਲਾਈ ਵਿੱਚ ਸਰਜਰੀ ਹੋਈ ਸੀ, ਜਿਸ ਵਿੱਚ ਉਨ੍ਹਾਂ ਦੀ ਵੱਡੀ ਅੰਤੜੀ ਦਾ 33 ਸੈਂਟੀਮੀਟਰ (13 ਇੰਚ) ਹਿੱਸਾ ਕੱਢਿਆ ਗਿਆ ਸੀ। ਇਸ ਪਿੱਛੋਂ ਪੋਪ ਨੇ 12 ਤੋਂ 15 ਸਤੰਬਰ ਨੂੰ ਹੰਗਰੀ-ਸਲੋਵਾਕੀਆ ਦੀ ਯਾਤਰਾ ਕੀਤੀ ਸੀ, ਜੋ ਸਰਜਰੀ ਤੋਂ ਬਾਅਦ ਉਨ੍ਹਾਂ ਦੀ ਪਹਿਲੀ ਅੰਤਰਰਾਸ਼ਟਰੀ ਯਾਤਰਾ ਸੀ। ਪੋਪ ਦੇ 10 ਦਿਨ ਤੱਕ ਹਸਪਤਾਲਰਹਿਣ ਉੱਤੇ ਇਟਲੀ ਦਾ ਮੀਡੀਆ ਕਿਆਸ ਲਾਈ ਜਾਂਦਾ ਸੀ ਕਿ ਸ਼ਾਇਦ ਪੋਪ ਅਸਤੀਫਾ ਦੇ ਦੇਣਗੇ।