ਲਾਹੌਰ, 18 ਦਸੰਬਰ (ਪੋਸਟ ਬਿਊਰੋ)- ਪਿਸ਼ਾਵਰ ਸ਼ਹਿਰ ਦੇ ਇਤਿਹਾਸਕ ਗੁਰਦੁਆਰਾ ਸਾਹਿਬ ਦੇ ਇਕ ਵੱਡੇ ਹਿੱਸੇ ਦੀ ਪਾਕਿਸਤਾਨ ਇਵੈਕੂਈ ਟਰੱਸਟ ਪ੍ਰਾਪਰਟੀ ਬੋਰਡ (ਈ ਟੀ ਪੀ ਬੀ) ਵੱਲੋਨ ਕਰਵਾਈ ਜਾ ਰਹੀ ਨਿਲਾਮੀ ਉੱਤੇ ਪਿਸ਼ਾਵਰ ਹਾਈ ਕੋਰਟ ਨੇ ਅਗਲੇ ਹੁਕਮਾਂ ਤੱਕ ਰੋਕ ਲਾ ਦਿੱਤੀ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਈ ਟੀ ਪੀ ਬੀ ਵੱਲੋਂ ਗੁਰਦੁਆਰਾ ਭਾਈ ਬੀਬਾ ਸਿੰਘ ਦਾ ਇਕ ਹਿੱਸਾ ਵਪਾਰਕ ਕੰਮਾਂ ਲਈ ਬਾਹਰੀ ਵਿਅਕਤੀ ਨੂੰ ਵੇਚਿਆ ਜਾ ਰਿਹਾ ਸੀ, ਜਿਸ 'ਤੇ ਪਾਕਿਸਤਾਨ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਮੈਂਬਰ ਸਾਹਿਬ ਸਿੰਘ, ਗੁਰਪਾਲ ਸਿੰਘ, ਦਰਸ਼ਨ ਸਿੰਘ ਅਤੇ ਹਰਦਿਆਲ ਸਿੰਘ ਨੇ ਨਿਲਾਮੀ ਦੀ ਕਾਰਵਾਈ ਨੂੰ ਅਯੋਗ ਦੱਸਦਿਆਂ ਪਿਸ਼ਾਵਰ ਹਾਈ ਕੋਰਟ 'ਚ ਇਸ ਬਾਰੇ ਅਪੀਲ ਦਾਇਰ ਕੀਤੀ ਸੀ। ਵਰਨਣ ਯੋਗ ਹੈ ਕਿ ਪਿਸ਼ਾਵਰ ਦੇ ਹਸ਼ਤਨਗਰੀ ਵਾਲੇ ਇਲਾਕੇ ਦੇ ਮੁਹੱਲਾ ਝੁੱਗੀਵਾੜਾ ਦੀ ਚੱਕੀ ਗਲੀ ਵਿੱਚ ਉਕਤ ਗੁਰਦੁਆਰਾ ਗੁਰੂ ਗੋਬਿੰਦ ਸਿੰਘ ਜੀ ਦੇ ਸਿੱਖ ਭਾਈ ਬੀਬਾ ਸਿੰਘ ਨਾਲ ਸਬੰਧਤ ਹੈ। ਕੇਸ ਦੀ ਸੁਣਵਾਈ ਕਰ ਰਹੇ ਜਸਟਿਸ ਇਕਰਮੁੱਲਾ ਖਾਨ ਅਤੇ ਜਸਟਿਸ ਮੁਸੱਰਤ ਹਿਲਾਲੀ ਦੇ ਬੈਂਚ ਨੇ ਪਿਸ਼ਾਵਰ ਪੁਲਸ ਅਤੇ ਈ ਟੀ ਪੀ ਬੀ ਨੂੰ ਤੁਰੰਤ ਗੁਰਦੁਆਰਾ ਭਾਈ ਬੀਬਾ ਸਿੰਘ ਦੇ ਇਕ ਹਿੱਸੇ ਉਤੇ ਬਾਹਰੀ ਵਿਅਕਤੀ ਦਾ ਕਬਜ਼ਾ ਹੋਣ ਤੋਂ ਰੋਕਣ ਦੇ ਹੁਕਮ ਜਾਰੀ ਕਰ ਕੇ ਕੇਂਦਰ ਸਰਕਾਰ, ਖੈਬਰ ਪਖਤੂਨਖਵਾ ਸੂਬਾ ਸਰਕਾਰ, ਈ ਟੀ ਪੀ ਬੀ ਦੇ ਚੇਅਰਮੈਨ, ਡਿਪਟੀ ਸਕੱਤਰ ਤੇ ਪਿਸ਼ਾਵਰ ਦੇ ਡਿਪਟੀ ਪ੍ਰਬੰਧਕ ਨੂੰ ਨੋਟਿਸ ਜਾਰੀ ਕੀਤੇ ਹਨ।