ਫਲੋਰਿਡਾ, 19 ਸਤੰਬਰ (ਪੋਸਟ ਬਿਊਰੋ) : ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਐਤਵਾਰ ਨੂੰ ਵਿਓਮਿੰਗ ਤੋਂ ਮਿਲੀ ਲਾਸ਼ ਗੈਬਰੀਐਲ ਗੈਬੀ ਪੈਟਿਟੋ ਦੀ ਹੀ ਹੈ। ਇਹ ਲੜਕੀ ਆਪਣੇ ਬੁਆਏਫਰੈਂਡ ਨਾਲ ਕਰੌਸ ਕੰਟਰੀ ਟਰੈਕ ਉੱਤੇ ਜਾਣ ਤੋਂ ਬਾਅਦ ਤੋਂ ਲਾਪਤਾ ਸੀ। ਹੁਣ ਅਧਿਕਾਰੀ ਗੈਬਰੀਐਲ ਦੇ ਬੁਆਏਫਰੈਂਡ ਦੀ ਭਾਲ ਕਰ ਰਹੇ ਹਨ ਕਿਉਂਕਿ ਉਨ੍ਹਾਂ ਦੀ ਨਜ਼ਰ ਵਿੱਚ ਉਹ ਹੀ ਮਸ਼ਕੂਕ ਹੈ। ਉਸ ਦੀ ਭਾਲ ਫਲੋਰਿਡਾ ਨੇਚਰ ਪ੍ਰਿਜ਼ਰਵ ਵਿੱਚ ਕੀਤੀ ਜਾ ਰਹੀ ਹੈ।
ਐਫਬੀਆਈ ਨੇ ਆਖਿਆ ਕਿ ਇਹ ਲਾਸ਼ ਪਿਛਲੇ ਦੋ ਦਿਨ ਤੋਂ ਗੈਬਰੀਐਲ ਦੀ ਭਾਲ ਕਰ ਰਹੇ ਲਾਅ ਐਨਫੋਰਸਮੈਂਟ ਅਧਿਕਾਰੀਆਂ ਨੂੰ ਮਿਲੀ ਹੈ। ਐਫਬੀਆਈ ਦੇ ਸੁਪਰਵਾਈਜ਼ਰੀ ਸਪੈਸ਼ਲ ਏਜੰਟ ਚਾਰਲਸ ਜੋਨਜ਼ ਨੇ ਦੱਸਿਆ ਕਿ ਅਜੇ ਤੱਕ ਮੌਤ ਦੇ ਕਾਰਨਾਂ ਦਾ ਪਤਾ ਨਹੀਂ ਲੱਗ ਸਕਿਆ ਹੈ। ਉਨ੍ਹਾਂ ਆਖਿਆ ਕਿ ਅਜੇ ਫੋਰੈਂਸਿਕ ਜਾਂਚ ਵਿੱਚ ਇਸ ਗੱਲ ਦੀ 100 ਫੀ ਸਦੀ ਪੁਸ਼ਟੀ ਨਹੀਂ ਹੋ ਸਕੀ ਹੈ ਕਿ ਇਹ ਲਾਸ਼ ਗੈਬੀ ਦੀ ਹੈ ਪਰ ਫਿਰ ਵੀ ਉਸ ਦੇ ਘਰਦਿਆਂ ਨੂੰ ਇਸ ਸਬੰਧ ਵਿੱਚ ਜਾਣਕਾਰੀ ਦੇ ਦਿੱਤੀ ਗਈ ਹੈ।
ਪੈਟਿਟੋ ਦੇ ਪਰਿਵਾਰ ਲਈ ਬੁਲਾਰੇ ਦਾ ਕੰਮ ਕਰ ਰਹੇ ਅਟਾਰਨੀ ਰਿਚਰਡ ਬੈਨਸਨ ਨੇ ਆਖਿਆ ਕਿ ਇਸ ਸਮੇਂ ਪਰਿਵਾਰ ਨੂੰ ਥੋੜ੍ਹੀ ਪ੍ਰਾਈਵੇਸੀ ਚਾਹੀਦੀ ਹੈ ਤੇ ਉਹ ਕੁੱਝ ਸਮੇਂ ਬਾਅਦ ਬਿਆਨ ਜਾਰੀ ਕਰੇਗਾ। ਜੋਨਜ਼ ਨੇ ਆਖਿਆ ਕਿ ਨੈਸ਼ਨਲ ਫੌਰੈਸਟ ਦੇ ਨਾਲ ਲੱਗਦਾ ਗ੍ਰੈਂਡ ਟੈਟਨ ਦਾ ਪੂਰਬੀ ਹਿੱਸਾ ਹਾਲ ਦੀ ਘੜੀ ਜਾਂਚ ਲਈ ਬੰਦ ਕੀਤਾ ਗਿਆ ਹੈ। ਜਿ਼ਕਰਯੋਗ ਹੈ ਕਿ ਪੈਟਿਟੋ ਤੇ ਉਸ ਦਾ ਬੁਆਏਫਰੈਂਡ ਲਾਂਡਰੇ ਅਮਰੀਕਾ ਦੇ ਪੱਛਮੀ ਹਿੱਸੇ ਵਿੱਚ ਸਥਿਤ ਨੈਸ਼ਨਲ ਪਾਰਕਸ ਵਿੱਚ ਘੁੰਮਣ ਫਿਰਨ ਲਈ ਕਰੌਸ ਕੰਟਰੀ ਟਰੈਕ ਉੱਤੇ ਜੁਲਾਈ ਵਿੱਚ ਰਵਾਨਾ ਹੋਏ ਸਨ। ਪੁਲਿਸ ਨੇ ਦੱਸਿਆ ਕਿ ਪਹਿਲੀ ਸਤੰਬਰ ਨੂੰ ਜਦੋਂ ਲਾਂਡਰੇ ਨੌਰਥ ਪੋਰਟ, ਫਲੋਰਿਡਾ, ਆਪਣੇ ਮਾਪਿਆਂ ਕੋਲ ਆਪਣੀ ਵੈਨ ਵਾਪਿਸ ਲੈ ਕੇ ਪਹੁੰਚਿਆ ਸੀ ਤਾਂ ਉਹ ਇੱਕਲਾ ਹੀ ਸੀ।
ਹੁਣ ਪੁਲਿਸ ਲਾਂਡਰੇ ਦੀ ਭਾਲ ਕਰ ਰਹੀ ਹੈ। ਉਸ ਨੂੰ ਆਖਰੀ ਵਾਰੀ ਮੰਗਲਵਾਰ ਨੂੰ ਫਲੋਰਿਡਾ ਵਿੱਚ ਉਸ ਦੇ ਪਰਿਵਾਰਕ ਮੈਂਬਰਾਂ ਵੱਲੋਂ ਵੇਖਿਆ ਗਿਆ। ਪੈਟਿਟੋ ਦੇ ਪਰਿਵਾਰ ਨੇ 11 ਸਤੰਬਰ ਨੂੰ ਸੁਫੋਕ ਕਾਊਂਟੀ, ਨਿਊ ਯੌਰਕ ਕੋਲ ਗੈਬੀ ਦੇ ਲਾਪਤਾ ਹੋਣ ਦੀ ਰਿਪਰਟ ਲਿਖਵਾਈ ਸੀ।