ਲਖਨਊ, 16 ਸਤੰਬਰ (ਪੋਸਟ ਬਿਊਰੋ)- ਉਤਰ ਪ੍ਰਦੇਸ਼ ਵਿੱਚ ‘ਅੱਬਾ ਜਾਨ' ਤੋਂ ਬਾਅਦ ‘ਚਾਚਾ ਜਾਨ' ਦਾ ਵਿਵਾਦ ਖੜ੍ਹਾ ਹੋ ਗਿਆ ਹੈ। ਇਸ ਵਾਰ ਕਿਸਾਨ ਆਗੂ ਰਾਕੇਸ਼ ਟਿਕੈਤ ਵੱਲੋਂ ਏ ਆਈ ਐਮ ਆਈ ਐਮ ਦੇ ਪ੍ਰਧਾਨ ਅਸਦੂਦੀਨ ਓਵੈਸੀ ਨੂੰ ‘ਚਾਚਾ ਜਾਨ' ਕਹੇ ਜਾਣਾ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ।
ਅਸਲ ਵਿੱਚ ‘ਚਾਚਾ ਜਾਨ' ਉਹ ਨਵਾਂ ਨਾਂਅ ਹੈ, ਜੋ ਓਵੈਸੀ ਨੂੰ ਭਾਰਤੀ ਕਿਸਾਨ ਯੂਨੀਅਨ ਦੇ ਆਗੂ ਰਾਕੇਸ਼ ਟਿਕੈਤ ਨੇ ਦਿੱਤਾ ਹੈ। ਰਾਕੇਸ਼ ਟਿਕੈਤ ਉਤਰ ਪ੍ਰਦੇਸ਼ ਵਿੱਚ ਵਿਧਾਨ ਸਭਾ ਚੋਣਾਂ ਲੜਨ ਬਾਰੇ ਏ ਆਈ ਐਮ ਆਈ ਐਮ ਦੇ ਫੈਸਲੇ ਬਾਰੇ ਓਵੈਸੀ ਉੱਤੇ ਵਰ੍ਹੇ। ਉਨ੍ਹਾਂ ਦਾਅਵਾ ਕੀਤਾ ਕਿ ਓਵੈਸੀ ਭਾਜਪਾ ਦੇ ਹੱਥਾਂ ਵਿੱਚ ਖੇਡਦੇ ਹਨ ਅਤੇ ਟਿਕੈਤ ਨੇ ਉਨ੍ਹਾਂ ਨੂੰ ਭਾਜਪਾ ਦਾ ‘ਚਾਚਾ ਜਾਨ' ਦੱਸਿਆ। ਬਾਗਪਤ ਵਿੱਚ ਮੀਡੀਆ ਨਾਲ ਗੱਲਬਾਤ ਦੌਰਾਨ ਟਿਕੈਤ ਨੇ ਕਿਹਾ, ‘ਭਾਜਪਾ ਦੇ ਚਾਚਾ ਜਾਨ ਅਸਦੂਦੀਨ ਉਤਰ ਪ੍ਰਦੇਸ਼ ਵਿੱਚ ਆ ਗਏ ਹਨ। ਜੇ ਉਹ ਭਾਜਪਾ ਨੂੰ ਗਾਲ੍ਹਾਂ ਕੱਢਣਗੇ ਤਾਂ ਭਾਜਪਾ ਉਨ੍ਹਾਂ ਖਿਲਾਫ ਕੇਸ ਦਰਜ ਨਹੀਂ ਕਰਵਾਏਗੀ, ਕਿਉਂਕਿ ਉਹ ਇੱਕੋ ਟੀਮ ਦੇ ਹਨ।’ ਮਾਫੀਆ ਤੋਂ ਸਿਆਸਤਦਾਨ ਬਣੇ ਅਤੀਕ ਅਹਿਮਦ ਨੂੰ ਏ ਆਈ ਐਮ ਆਈ ਐਮ ਵੱਲੋਂ ਟਿਕਟ ਦੀ ਪੇਸ਼ਕਸ਼ ਬਾਰੇ ਗੱਲ ਕਰਦਿਆਂ ਟਿਕੈਤ ਨੇ ਕਿਹਾ, ‘ਪ੍ਰੱਗਿਆ ਠਾਕੁਰ (ਭੋਪਾਲ ਤੋਂ ਭਾਜਪਾ ਦੀ ਪਾਰਲੀਮੈਂਟ ਮੈਂਬਰ) ਅਤੇ ਉਸ ਦੇ ਸਰਟੀਫਿਕੇਟਾਂ ਬਾਰੇ ਕੀ ਖਿਆਲ ਹੈ?’