ਐਡਮੰਟਨ, 9 ਸਤੰਬਰ (ਪੋਸਟ ਬਿਊਰੋ) : ਫੈਡਰਲ ਚੋਣਾਂ ਦੀ ਕੈਂਪੇਨ ਦੀ ਸ਼ੁਰੂਆਤ ਤੋਂ ਹੀ ਲਿਬਰਲ ਆਗੂ ਜਸਟਿਨ ਟਰੂਡੋ ਦਾ ਕੁੱਝ ਗਰੁੱਪਜ਼ ਵੱਲੋਂ ਵਿਰੋਧ ਕੀਤਾ ਜਾ ਰਿਹਾ ਹੈ। ਜਿੱਥੇ ਵੀ ਟਰੂਡੋ ਕੈਂਪੇਨ ਕਰਨ ਜਾਂਦੇ ਹਨ ਅਜਿਹੇ ਗਰੁੱਪਜ਼ ਦੇ ਮੈਂਬਰ ਉੱਥੇ ਪਹੁੰਚ ਕੇ ਉਨ੍ਹਾਂ ਖਿਲਾਫ ਬੇਹੁਦੇਪਣ, ਨਸਲੀ ਟਿੱਪਣੀਆਂ ਤੇ ਮਹਿਲਾਵਾਂ ਨਾਲ ਪੱਖਪਾਤ ਕਰਨ ਵਾਲੇ ਆਗੂ ਵਰਗੀਆਂ ਟਿੱਪਣੀਆਂ ਕਰਦੇ ਹਨ ਤੇ ਇਸ ਤੋਂ ਇਲਾਵਾ ਗ੍ਰੈਫਿਕ ਸਾਈਨ ਲੈ ਕੇ ਵਿਰੋਧ ਕਰਨ ਵਾਲਿਆਂ ਦਾ ਮਜ੍ਹਮਾਂ ਲੱਗ ਜਾਂਦਾ ਹੈ।
ਇਨ੍ਹਾਂ ਗਰੁੱਪਜ਼ ਵਿੱਚ ਲਾਕਡਾਊਨ ਵਿਰੋਧੀ, ਮਾਸਕ ਵਿਰੋਧੀ, ਵੈਕਸੀਨ ਵਿਰੋਧੀ ਲੋਕ ਸ਼ਾਮਲ ਹੁੰਦੇ ਹਨ। ਇਹ ਖੁਲਾਸਾ ਕੈਨੇਡੀਅਨ ਐਂਟੀ ਹੇਟ ਨੈੱਟਵਰਕ ਵੱਲੋਂ ਕੀਤਾ ਗਿਆ ਹੈ। ਇਨ੍ਹਾਂ ਲੋਕਾਂ ਤੋਂ ਇਲਾਵਾ ਕੁੱਝ ਨਵੇਂ ਲੋਕ ਵੀ ਵੈਕਸੀਨ ਸਬੰਧੀ ਨਿਰਦੇਸ਼ਾਂ ਤੇ ਕੋਵਿਡ-19 ਨਾਲ ਸਬੰਧਤ ਚੋਣ ਵਾਅਦਿਆਂ ਦਾ ਵਿਰੋਧ ਕਰਨ ਲਈ ਇਨ੍ਹਾਂ ਰੈਲੀਆਂ ਵਿੱਚ ਪਹੁੰਚ ਜਾਂਦੇ ਹਨ।ਅਜਿਹੇ ਮੁਜ਼ਾਹਰਿਆਂ ਦਾ ਪ੍ਰਬੰਧ ਕਰਨ ਵਾਲਿਆਂ ਵਿੱਚ ਉਹ ਲੋਕ ਹਨ ਜਿਹੜੇ ਖੁਦ ਨੂੰ ਸਰਬਉੱਚ ਮੰਨਦੇ ਹਨ ਤੇ ਜਿਨ੍ਹਾਂ ਦੀ ਸੋਚ ਸੱਜੇ ਪੱਖੀ ਹੈ।
ਮਾਹਿਰਾਂ ਅਨੁਸਾਰ ਅਜਿਹੇ ਗਰੁੱਪਜ਼ ਵਿੱਚ ਸੱਜੇ ਪੱਖੀ, ਬਾਗੀ ਤੇ ਹੇਟ ਗਰੁੱਪਜ਼ ਨਾਲ ਜੁੜੇ ਲੋਕ ਸ਼ਾਮਲ ਹੁੰਦੇ ਹਨ।ਐਂਟੀ ਹੇਟ ਨੈੱਟਵਰਕ ਦੀ ਡਿਪਟੀ ਡਾਇਰੈਕਟਰ ਐਲਿਜ਼ਾਬੈੱਥ ਸਾਇਮਨਜ਼ ਨੇ ਆਖਿਆ ਕਿ ਉਹ ਪੱਤਰਕਾਰਾਂ ਨੂੰ, ਸਿਆਸੀ ਵਿਰੋਧੀਆਂ ਨੂੰ, ਟੰਗਣ ਦੀ ਗੱਲ ਵੀ ਕਰਦੇ ਹਨ।