ਓਟਵਾ, 8 ਸਤੰਬਰ (ਪੋਸਟ ਬਿਊਰੋ) : ਬੈਂਕ ਆਫ ਕੈਨੇਡਾ ਵੱਲੋਂ ਅੱਜ ਸਵੇਰੇ ਆਪਣੀਆਂ ਵਿਆਜ ਦਰਾਂ ਦਾ ਐਲਾਨ ਕੀਤਾ ਜਾਵੇਗਾ।
ਅਰਥਸ਼ਾਸਤਰੀਆਂ ਦਾ ਮੰਨਣਾ ਹੈ ਕਿ ਬੈਂਕ ਆਪਣੀਆਂ ਵਿਆਜ ਦਰਾਂ ਪਹਿਲਾਂ ਵਾਂਗ ਹੀ 0·25 ਫੀ ਸਦੀ ਉੱਤੇ ਹੀ ਰਹਿਣ ਦੇਵੇਗਾ। ਪਰ ਬੈਂਕ ਦੀ ਅਰਥਚਾਰੇ ਬਾਰੇ ਕੀ ਰਾਇ ਹੈ ਇਹ ਜਾਨਣ ਦੀ ਸਾਰੇ ਤਾਂਘ ਲਾਈ ਬੈਠੇ ਹਨ। ਵਿਆਜ ਦਰਾਂ ਬਾਰੇ ਫੈਸਲਾ ਵੀਰਵਾਰ ਨੂੰ ਬੈਂਕ ਆਫ ਕੈਨੇਡਾ ਦੇ ਗਵਰਨਰ ਟਿੱਫ ਮੈਕਲੈਮ ਵੱਲੋਂ ਦਿੱਤੇ ਜਾਣ ਵਾਲੇ ਭਾਸ਼ਣ ਤੋਂ ਪਹਿਲਾਂ ਆ ਰਿਹਾ ਹੈ।
ਦ ਬੈਂਕ ਆਫ ਕੈਨੇਡਾ ਦਾ ਕਹਿਣਾ ਹੈ ਕਿ ਉਹ ਆਪਣੀਆਂ ਵਿਆਜ ਦਰਾਂ ਉਦੋਂ ਤੱਕ ਜ਼ੀਰੋ ਦੇ ਨੇੜੇ ਤੇੜੇ ਰੱਖੇਗਾ ਜਦੋਂ ਤੱਕ ਅਰਥਚਾਰਾ ਇਨ੍ਹਾਂ ਵਿੱਚ ਵਾਧੇ ਨੂੰ ਸਾਂਭਣ ਜੋਗਾ ਨਹੀਂ ਹੋ ਜਾਂਦਾ। ਅਜਿਹਾ 2022 ਦੇ ਦੂਜੇ ਅੱਧ ਤੋਂ ਪਹਿਲਾਂ ਹੋਣ ਦੀ ਕੋਈ ਉਮੀਦ ਨਹੀਂ ਹੈ।ਸੈਂਟਰਲ ਬੈਂਕ ਨੇ ਇਸ ਸਾਲ ਜੁਲਾਈ ਵਿੱਚ ਆਰਥਿਕ ਵਿਕਾਸ ਦੀ ਉਮੀਦ ਛੱਡ ਦਿੱਤੀ ਸੀ।
ਉਸ ਸਮੇਂ ਬੈਂਕ ਨੇ ਆਖਿਆ ਸੀ ਕਿ 2021 ਵਿੱਚ ਅਰਥਚਾਰੇ ਦੇ 6·0 ਫੀ ਸਦੀ ਤੱਕ ਵਿਕਾਸ ਕਰਨ ਦੀ ਸੰਭਾਵਨਾ ਹੈ, ਜੋ ਕਿ ਪਹਿਲਾਂ ਕੀਤੀ ਗਈ ਇਸ ਦੀ 6·5 ਫੀ ਸਦੀ ਦੀ ਪੇਸ਼ੀਨਿਗੋਈ ਤੋਂ ਘੱਟ ਸੀ। 2022 ਲਈ ਬੈਂਕ ਵੱਲੋਂ 4·6 ਫੀ ਸਦੀ ਵਿਕਾਸ ਦੀ ਸੰਭਾਵਨਾ ਦੀ ਪੇਸ਼ੀਨਿਗੋਈ ਕੀਤੀ ਗਈ ਹੈ, ਜੋ ਕਿ ਇਸ ਦੀ ਪਹਿਲਾਂ ਕੀਤੀ ਗਈ 3·7 ਫੀ ਸਦੀ ਦੀ ਭਵਿੱਖਬਾਣੀ ਤੋਂ ਵੱਧ ਹੈ।