ਓਟਵਾ, 7 ਸਤੰਬਰ (ਪੋਸਟ ਬਿਊਰੋ) : ਕੰਜ਼ਰਵੇਟਿਵ ਆਗੂ ਐਰਿਨ ਓਟੂਲ ਵੱਲੋਂ ਇਸ ਵਿਸ਼ਵਾਸ ਨਾਲ ਇੰਟਰਨੈਸ਼ਨਲ ਟੈਲੀਕਮਿਊਨਿਕੇਸ਼ਨ ਕੰਪਨੀਜ਼ ਨੂੰ ਕੈਨੇਡਾ ਲਿਆਉਣ ਦਾ ਵਾਅਦਾ ਕੀਤਾ ਜਾ ਰਿਹਾ ਹੈ ਤਾਂ ਕਿ ਲੋਕਾਂ ਦੇ ਸੈੱਲਫੋਨ ਤੇ ਇੰਟਰਨੈੱਟ ਦੇ ਬਿੱਲ ਘੱਟ ਹੋ ਸਕਣ।
ਉਨ੍ਹਾਂ ਆਖਿਆ ਕਿ ਕੈਨੇਡੀਅਨਜ਼ ਨੂੰ ਇਨ੍ਹਾਂ ਸੇਵਾਵਾਂ ਲਈ ਕਾਫੀ ਉੱਚੀਆਂ ਕੀਮਤਾਂ ਅਦਾ ਕਰਨੀਆਂ ਪੈਂਦੀਆਂ ਹਨ ਤੇ ਇਸ ਦਾ ਇੱਕੋ ਕਾਰਨ ਮੁਕਾਬਲੇਬਾਜ਼ੀ ਦੀ ਘਾਟ ਹੈ। ਟੋਰੀ ਆਗੂ ਨੇ ਵਾਅਦਾ ਕੀਤਾ ਕਿ ਕੈਨੇਡਾ ਵਿੱਚ ਕੌਮਾਂਤਰੀ ਕੰਪਨੀਆਂ ਨੂੰ ਇਜਾਜ਼ਤ ਦੇਣ ਨਾਲ ਕੈਨੇਡੀਅਨ ਕੰਪਨੀਆਂ ਵਿੱਚ ਵੀ ਮੁਕਾਬਲੇਬਾਜ਼ੀ ਵਧੇਗੀ ਤੇ ਉਹ ਵੀ ਆਪਣੀਆਂ ਦਰਾਂ ਘਟਾਉਣ ਬਾਰੇ ਸੋਚਣਗੀਆਂ।
ਓਟੂਲ ਨੇ 2025 ਤੱਕ ਸਾਰੇ ਕੈਨੇਡੀਅਨਜ਼ ਦੀ ਪਹੁੰਚ ਹਾਈ ਸਪੀਡ ਇੰਟਰਨੈੱਟ ਤੱਕ ਕਰਵਾਉਣ ਲਈ ਕੈਨੇਡਾ ਦੇ ਡਿਜੀਟਲ ਇਨਫਰਾਸਟ੍ਰਕਚਰ ਦੇ ਨਿਰਮਾਣ ਦਾ ਵੀ ਐਲਾਨ ਕੀਤਾ। ਪਾਰਟੀ ਦਾ ਕਹਿਣਾ ਹੈ ਕਿ ਉਹ ਰੌਜਰ ਤੇ ਸ਼ਾਅ ਦਰਮਿਆਨ ਪ੍ਰਸਤਾਵਿਤ ਰਲੇਵੇਂ ਨੂੰ ਲੈ ਕੇ ਵੀ ਚਿੰਤਤ ਹੈ।ਓਟੂਲ ਨੇ ਆਖਿਆ ਕਿ ਉਹ ਉਸ ਸੂਰਤ ਵਿੱਚ ਹੀ ਅਜਿਹੇ ਰਲੇਵੇਂ ਨੂੰ ਹਰੀ ਝੰਡੀ ਦੇ ਸਕਦੇ ਹਨ ਜੇ ਉਹ ਮੁਕਾਬਲੇਬਾਜ਼ੀ ਜਾਰੀ ਰੱਖ ਸਕੇ।
ਓਟੂਲ ਪਿਛਲੇ ਕਈ ਦਿਨਾਂ ਤੋਂ ਹਥਿਆਰਾਂ ਤੇ ਹਥਿਆਰਾਂ ਦੇ ਜਿਹੜੇ ਮਾਡਲ ਉੱਤੇ ਉਹ ਪਾਬੰਦੀ ਲਾਉਣਾ ਚਾਹੁੰਦੇ ਹਨ, ਇਸ ਸਬੰਧ ਵਿੱਚ ਪੁੱਛੇ ਜਾ ਰਹੇ ਸਵਾਲਾਂ ਦੇ ਜਵਾਬ ਦੇਣ ਤੋਂ ਟਾਲਾ ਵੱਟਦੇ ਆ ਰਹੇ ਹਨ।