ਮੋਹਾਲੀ, 17 ਦਸੰਬਰ (ਪੋਸਟ ਬਿਊਰੋ)- ਲੁਧਿਆਣਾ ਤੋਂ ਆਪਣੇ ਦੋਸਤਾਂ ਦੇ ਨਾਲ ਪੰਜਾਬੀ ਸਿੰਗਰ ਸਿੱਧੂ ਮੂਸੇਵਾਲਾ ਦੀ ਪ੍ਰਫਾਰਮੈਂਸ ਦੇਖਣ ਆਏ 35 ਸਾਲਾ ਨੌਜਵਾਨ ਸਰਬਜੀਤ ਗਰੇਵਾਲ ਉਰਫ ਸਰਵੀ ਦੀ ਗੋਲੀ ਲੱਗਣ ਨਾਲ ਮੌਤ ਹੋ ਗਈ। ਉਸ ਨੂੰ ਫੇਜ਼-11 ਸਥਿਤ ਕਰਾਊਡ ਵੈਸਟ ਹੋਟਲ ਦੇ ਰੂਮ ਨੰਬਰ 105 ਵਿੱਚ ਉਸ ਸਮੇਂ ਗੋਲੀ ਲੱਗੀ ਜਦ ਉਹ ਦੋਸਤਾਂ ਦੇ ਨਾਲ ਖਾਣਾ ਖਾਣ ਪਿੱਛੋਂ ਕਮਰੇ ਵਿੱਚ ਮੋਬਾਈਲ 'ਤੇ ਮੂਸੇਵਾਲਾ ਦਾ ਹਥਿਆਰਾਂ ਨਾਲ ਜੁੜੇ ਗਾਣੇ ਨੂੰ ਲਾ ਕੇ ਡਾਂਸ ਕਰ ਰਿਹਾ ਸੀ। ਗੋਲੀ 32 ਬੋਰ ਦੀ ਪਿਸਤੌਲ 'ਚੋਂ ਚੱਲੀ ਸੀ। ਪਿਸਤੌਲ ਕਿਸ ਦੀ ਹੈ ਅਤੇ ਕਿਸ ਨੇ ਗੋਲੀ ਚਲਾਈ, ਅਜੇ ਸਾਫ ਨਹੀਂ ਹੋ ਸਕਿਆ। ਇਕਦਮ ਚੱਲੀ ਗੋਲੀ ਸਰਵੀ ਦੇ ਦੇ ਮੋਢੇ ਦੇ ਹੇਠਾਂ ਅੰਡਰ ਆਰਮ ਤੋਂ ਪਾਰ ਹੋ ਗਈ।
ਗੋਲੀ ਲੱਗਣ ਨਾਲ ਸਰਵੀ ਜਦੋਂ ਡਿੱਗ ਪਿਆ ਤਾਂ ਉਸ ਦੇ ਦੋਸਤਾਂ ਜਸਕੀਰਤ ਸਿੰਘ, ਰਵਿੰਦਰ ਸਿੰਘ, ਗੁਰਪਿਆਰ ਸਿੰਘ ਪਿੰਡ ਕੋਕਰੀ ਜ਼ਿਲ੍ਹਾ ਮੋਗਾ ਨੇ ਹੋਟਲ ਮੈਨੇਜਰ ਪ੍ਰਵੀਨ ਕੁਮਾਰ ਤੇ ਹਾਊਸ ਕੀਪਰ ਅਮਿਤ ਕੁਮਾਰ ਨੂੰ ਉਸ ਦੇ ਬਾਰੇ ਦੱਸਿਆ। ਸਾਰਿਆਂ ਮਿਲ ਕੇ ਪਹਿਲਾਂ ਫਰਸ਼ ਅਤੇ ਦੀਵਾਰਾਂ 'ਤੇ ਖਿਲਰਿਆ ਖੂਨ ਸਾਫ ਕੀਤਾ ਅਤੇ ਫਿਰ ਦੋਸਤ ਸਰਵੀ ਨੂੰ ਚੁੱਕ ਕੇ ਪੀ ਜੀ ਆਈ ਲੈ ਗਏ। ਐਮਰਜੈਂਸੀ ਵਿੱਚ ਜਾਣ ਪਿੱਛੋਂ ਜਦ ਪਤਾ ਲੱਗਾ ਕਿ ਉਸ ਦੀ ਮੌਤ ਹੋ ਗਈ ਤਾਂ ਸਾਰੇ ਜਣੇ ਫਰਾਰ ਹੋ ਗਏ। ਐੱਸ ਐੱਚ ਓ ਗੁਰਪ੍ਰੀਤ ਸਿੰਘ ਬੈਂਸ ਨੇ ਦੱਸਿਆ ਕਿ ਸਰਵੀ ਦੇ ਦੋਸਤਾਂ ਦੇ ਇਲਾਵਾ ਪਿਸਤੌਲ ਮਾਲਕ ਜੋਧਾ ਅਤੇ ਕਰਾਊਨ ਵੈਸਟ ਹੋਟਲ ਦੇ ਮੈਨੇਜਰ ਪ੍ਰਵੀਨ ਕੂਮਾਰ ਅਤੇ ਹਾਊਸ ਕੀਪਰ ਅੰਬ ਕਲੋਨੀ ਦੇ ਖਿਲਾਫ ਕੇਸ ਦਰਜ ਕਰ ਲਿਆ ਹੈ। ਵਰਨਣ ਯੋਗ ਹੈ ਕਿ ਗਾਇਕ ਸਿੱਧੂ ਮੂਸੇਵਾਲਾ ਦੇ ਗਾਣਿਆਂ ਦਾ ਨੌਜਵਾਨਾਂ ਵਿੱਚ ਕਾਫੀ ਕਰੇਜ ਹੈ। ਖਾਸ ਕਰ ਕੇ ਹਥਿਆਰਾਂ ਬਾਰੇ ਉਨ੍ਹਾਂ ਦੇ ਗੀਤ ਨੌਜਵਾਨਾਂ ਨੂੰ ਬੇਹੱਦ ਆਕਰਸ਼ਿਤ ਕਰਦੇ ਹਨ।
ਜਿਸ ਪਿਸਤੌਲ 'ਚੋਂ ਗੋਲੀ ਚੱਲੀ ਉਹ ਲਾਇਸੈਂਸੀ ਹੈ ਅਤੇ ਕਿਸੇ ਜੋੋਧਾ ਨਾਂਅ ਦੇ ਸ਼ਖਸ ਦੇ ਨਾਂਅ 'ਤੇ ਹੈ। ਜਾਂਚ ਵਿੱਚ ਪਤਾ ਲੱਗਾ ਕਿ ਜੋਧਾ ਨਾਂਅ ਦਾ ਨੌਜਵਾਨ ਸਰਵੀ ਅਤੇ ਉਸ ਦੇ ਦੋਸਤਾਂ ਦਾ ਦੋਸਤ ਹੈ। ਮੂਸੇਵਾਲਾ ਦੇ ਪ੍ਰੋਗਰਾਮ ਵਿੱਚ ਧੌਂਸ ਜਮਾਉਣ ਲਈ ਉਹ 32 ਬੋਰ ਦਾ ਪਿਸਤੌਲ ਜੋਧਾ ਤੋਂ ਮੰਗ ਕੇ ਮੋਹਾਲੀ ਆਏ ਸਨ। ਰਾਤ ਨੂੰ ਖਾਣਾ ਖਾਣ ਦੇ ਬਾਅਦ ਉਹ ਸਾਰੇ ਕਮਰੇ ਵਿੱਚ ਚਲੇ ਗਏ। ਮੰਨਿਆ ਜਾ ਰਿਹਾ ਹੈ ਕਿ ਹੋਟਲ ਵਿੱਚ ਹੀ ਮੂਸੇਵਾਲਾ ਦੇ ਗੀਤਾਂ 'ਤੇ ਸਾਰੇ ਨੱਚ ਰਹੇ ਸਨ। ਇਸੇ ਦੌਰਾਨ ਪਿਸਤੌਲ 'ਚੋਂ ਗੋਲੀ ਚੱਲਣ ਨਾਲ ਸਰਬਜੀਤ ਦੀ ਮੌਤ ਹੋ ਗਈ।