ਸੰਜੇ ਲੀਲਾ ਭੰਸਾਲੀ ਕਾਫੀ ਸਮੇਂ ਤੋਂ ਆਪਣੀ ਫਿਲਮ ‘ਇੰਸ਼ਾਅੱਲ੍ਹਾ’ ਬਾਰੇ ਸੁਰਖੀਆਂ ਵਿੱਚ ਰਹੇ ਹਨ। ਇਸ ਫਿਲਮ ਵਿੱਚ ਆਲੀਆ ਭੱਟ ਤੇ ਸਲਮਾਨ ਖਾਨ ਮੁੱਖ ਭੂਮਿਕਾ ਵਿੱਚ ਦਿੱਸਣਗੇ, ਪਰ ਸਲਮਾਨ ਦੇ ਫਿਲਮ ਵਿੱਚੋਂ ਬਾਹਰ ਹੋਣ ਪਿੱਛੋਂ ਇਹ ਠੰਢੇ ਬਸਤੇ ਵਿੱਚ ਚਲੀ ਗਈ ਸੀ। ਨਵੀਂ ਜਾਣਕਾਰੀ ਇਹ ਹੈ ਕਿ ਭੰਸਾਲੀ, ਸਲਮਾਨ ਦੇ ਬਿਨਾਂ ਆਲੀਆ ਨੂੰ ਨਾਲ ਲੈ ਕੇ ‘ਇੰਸ਼ਾਅੱਲ੍ਹਾ’ ਦੇ ਪ੍ਰੋਜੈਕਟ ਉੱਤੇ ਕੰਮ ਸ਼ੁਰੂ ਕਰਨਗੇ। ਚਰਚਾ ਹੈ ਕਿ ਅਜੈ ਦੇਵਗਨ ਨੂੰ ਫਿਲਮ ਵਿੱਚ ਕਾਸਟ ਕੀਤਾ ਜਾ ਸਕਦਾ ਹੈ। ਉਹ ਭੰਸਾਲੀ ਦੀ ਇੱਕ ਹੋਰ ਫਿਲਮ ‘ਗੰਗੂਬਾਈ ਕਾਠੀਆਵਾੜੀ’ ਵਿੱਚ ਵੀ ਕੈਮਿਊ ਕਰ ਰਹੇ ਹਨ ਅਤੇ ਇਸ ਤੋਂ ਪਹਿਲਾਂ ‘ਹਮ ਦਿਲ ਦੇ ਚੁਕੇ ਸਨਮ' ਵਿੱਚ ਵੀ ਉਨ੍ਹਾਂ ਨੇ ਭੰਸਾਲੀ ਦੇ ਨਾਲ ਕੰਮ ਕੀਤਾ ਸੀ।
ਦੱਸਣ ਯੋਗ ਹੈ ਕਿ ਫਿਲਮ ਦੀ ਸਕ੍ਰਿਪਟ ਪਹਿਲਾਂ ਸਲਮਾਨ ਦੇ ਹਿਸਾਬ ਨਾਲ ਲਿਖੀ ਗਈ ਸੀ, ਇਸ ਲਈ ਇਸ ਨੂੰ ਪਰਦੇ ਉੱਤੇ ਇਸ ਰੋਲ ਨੂੰ ਨਿਭਾਉਣ ਲਈ 50 ਪਲੱਸ ਦੇ ਐਕਟਰ ਨੂੰ ਕਾਸਟ ਕੀਤਾ ਜਾਣਾ ਹੈ। ਜੇ ਅਜੈ ਨੂੰ ਫਿਲਮ ਵਿੱਚ ਕਾਸਟ ਕੀਤਾ ਜਾਂਦਾ ਹੈ ਤਾਂ ਪਰਦੇ ਉੱਤੇ ਪਹਿਲੀ ਵਾਰ ਦਰਸ਼ਕਾਂ ਨੂੰ ਅਜੈ ਤੇ ਆਲੀਆ ਦੀ ਜੋੜੀ ਦੇਖਣ ਨੂੰ ਮਿਲੇਗੀ।