ਅਭਿਨੇਤਾ ਕਾਰਤਿਕ ਆਰੀਅਨ ਦੇ ਖਾਤੇ ਵਿੱਚ ਅੱਜਕੱਲ੍ਹ ਕਈ ਫਿਲਮਾਂ ਹਨ। ਉਹ ਰਾਮ ਮਾਧਵਾਨੀ ਦੇ ਨਿਰਦੇਸ਼ਨ ਵਾਲੀ ‘ਧਮਾਕਾ’ ਦੀ ਸ਼ੂਟਿੰਗ ਪੂਰੀ ਕਰ ਚੁੱਕੇ ਹਨ ਅਤੇ ਫਿਲਹਾਲ ‘ਫਰੈਡੀ' ਦੀ ਸ਼ੂਟਿੰਗ ਕਰ ਰਹੇ ਹਨ। ਉਸ ਦੇ ਇਲਾਵਾ ਉਸ ਕੋਲ ਹੰਸਲ ਮਹਿਤਾ ਦੀ ਫਿਲਮ ‘ਕੈਪਟਨ ਇੰਡੀਆ’, ਅਨੀਸ ਬਜ਼ਮੀ ਦੀ ‘ਭੂਲ ਭੁਲੱਈਆਂ 2’ ਦੇ ਨਾਲ ਸਾਜਿਦ ਨਾਡਿਆਡਵਾਲਾ ਦੀ ਇੱਕ ਅਣਟਾਈਟਲਡ ਫਿਲਮ ਵੀ ਹੈ। ਖਬਰ ਹੈ ਕਿ ਉਹ ਰੋਹਿਤ ਧਵਨ ਨਾਲ ਫਿਲਮ ਕਰਨ ਜਾ ਰਹੇ ਹਨ। ਇਹ ਪਿਛਲੇ ਸਾਲ ਰਿਲੀਜ਼ ਹੋਈ ਅੱਲੂ ਅਰਜਨ ਦੀ ਤੇਲਗੂ ਫਿਲਮ ‘ਆਲਾ ਵੈਕੁੰਠਪੁਰਮੁਲੁ’ ਦੀ ਹਿੰਦੀ ਰੀਮੇਕ ਹੈ। ਕਾਰਤਿਕ ਨੇ ਫੋਟੋ ਪੋਸਟ ਕਰਦੇ ਹੋਏ ਫਿਲਮ ਦੇ ਸ਼ੁਰੂ ਹੋਣ ਦੇ ਸੰਕੇਤ ਦਿੱਤੇ ਹਨ। ਉਸ ਨੇ ਰੋਹਿਤ ਧਵਨ ਦੇ ਨਾਲ ਆਪਣੀ ਫੋਟੋ ਸਾਂਝੀ ਕੀਤੀ। ਫਿਲਮ ਨੂੰ ਪ੍ਰੋਡਿਊਸ ਕਰ ਰਹੀ ਏਕਤਾ ਕਪੂਰ ਨੇ ਵੀ ਕਮੈਂਟ ਬਾਕਸ ਪ੍ਰਤੀਕਿਰਿਆ ਦਿੱਤੀ ਹੈ।
ਰੋਹਿਤ ਨੇ ਇਸ ਤੋਂ ਪਹਿਲਾਂ ਫਿਲਮ ‘ਡਿਸ਼ੁਮ' ਦਾ ਨਿਰਦੇਸ਼ਨ ਕੀਤਾ ਸੀ। ਉਸ ਵਿੱਚ ਉਸ ਦੇ ਭਰਾ ਵਰੁਣ ਧਵਨ, ਜਾਨ ਅਬਰਾਹਮ ਮੁੱਖ ਭੂਮਿਕਾ ਵਿੱਚ ਸਨ। ‘ਆਲਾ ਵੈਕੰੁਠਪੁਰਮੁਲੁ’ ਦੀ ਕਹਾਣੀ ਉਸ ਲੜਕੇ ਦੀ ਹੈ ਜਿਸ ਦੇ ਪਿਤਾ ਉਸ ਨੂੰ ਨਫਰਤ ਕਰਦੇ ਹਨ। ਉਸ ਨੂੰ ਪਤਾ ਲੱਗਦਾ ਹੈ ਕਿ ਉਸ ਦੇ ਅਸਲੀ ਪਿਤਾ ਅਮੀਰ ਬਿਜ਼ਨਸਮੈਨ ਹਨ। ਉਸ ਨੂੰ ਪਾਲਣ ਵਾਲੇ ਪਿਤੇ ਨੇ ਪੈਦਾ ਹੋਣ ਉੱਤੇ ਆਪਣੇ ਬੱਚੇ ਨਾਲ ਉਸ ਨੂੰ ਬਦਲ ਦਿੱਤਾ ਸੀ। ਅਸਲੀ ਪਿਤਾ ਦੀ ਜਾਨ ਨੂੰ ਖਤਰੇ ਦੇਖ ਕੇ ਉਹ ਪਰਵਾਰ ਦੀ ਸੁਰੱਖਿਆ ਲਈ ਉਸ ਘਰ ਜਾਂਦਾ ਹੈ। ਇਸ ਵਿੱਚ ਕਈ ਰੋਚਕ ਟਵਿਸਟ ਅਤੇ ਟਰਨ ਆਉਂਦੇ ਹਨ।