ਗੁਰਾਇਆ, 17 ਦਸੰਬਰ (ਪੋਸਟ ਬਿਊਰੋ)- ਰਾਮਗੜ੍ਹੀਆ ਮੁਹੱਲਾ ਗੁਰਾਇਆ ਵਿਖੇ ਇਕ ਬੀ ਬੀ ਏ ਦੀ ਵਿਦਿਆਰਥਣ (20 ਸਾਲਾ) ਨੇ ਫਾਹਾ ਲੈ ਕੇ ਖੁਦਕੁਸ਼ੀ ਕਰ ਲਈ ਹੈ।
ਮ੍ਰਿਤਕ ਲੜਕੀ ਦੇ ਛੋਟੇ ਭਰਾ ਹਰਿੰਦਰ ਨੇ ਕਿਹਾ ਕਿ ਉਸ ਦੀ ਭੈਣ ਵਿਜੇ ਕੁਮਾਰੀ ਪੁੱਤਰੀ ਰਾਜਵੀਰ ਬੀ ਬੀ ਏ ਦੀ ਪੜ੍ਹਾਈ ਕਰ ਰਹੀ ਸੀ। ਕੱਲ੍ਹ ਦੁਪਹਿਰ ਜਦੋਂ ਉਹ ਆਇਆ ਤਾਂ ਉਹ ਘਰ ਨਹੀਂ ਸੀ। ਉਹ ਆਪਣੀ ਭੈਣ ਦੀ ਭਾਲ ਕਰਦਾ ਬਾਜ਼ਾਰ ਚਲਾ ਗਿਆ। ਜਦੋਂ ਵਾਪਸ ਆਇਆ ਤਾਂ ਉਸ ਨੇ ਘਰ ਦੇ ਸਟੋਰ ਰੂਮ ਨੂੰ ਚੈਕ ਕੀਤਾ ਤਾਂ ਅੰਦਰੋਂ ਕੁੰਡੀ ਲੱਗੀ ਹੋਈ ਸੀ। ਜਦੋਂ ਉਸ ਨੇ ਕਾਫੀ ਜੱਦੋ ਜਹਿਦ ਕਰਕੇ ਕੁੰਡੀ ਨੂੰ ਖੋਲ੍ਹਿਆਂ ਤਾਂ ਅੰਦਰ ਗਾਰਡਰ ਨਾਲ ਉਸ ਦੀ ਭੈਣ ਦੀ ਲਾਸ਼ ਲਟਕ ਰਹੀ ਸੀ। ਉਸ ਦੇ ਰੌਲਾ ਪਾਉਣ 'ਤੇ ਉਨ੍ਹਾਂ ਦੇ ਨਾਲ ਰਹਿਣ ਵਾਲੇ ਕਿਰਾਏਦਾਰ ਆ ਗਏ, ਜਿਨ੍ਹਾਂ ਨੇ ਵਿਜੇ ਕੁਮਾਰੀ ਦੀ ਲਾਸ਼ ਨੂੰ ਉਤਾਰਿਆ। ਘਟਨਾ ਦੀ ਸੂਚਨਾ ਮਿਲਣ ਤੋਂ ਬਾਅਦ ਥਾਣਾ ਮੁਖੀ ਪਰਮਿੰਦਰ ਸਿੰਘ, ਏ ਐਸ ਆਈ ਜਗਦੀਸ਼ ਰਾਜ ਮੌਕੇ 'ਤੇ ਪੁੱਜੇ ਤੇ ਉਨ੍ਹਾਂ ਨੇ ਜਾਂਚ ਕਰਦਿਆਂ ਆਸ ਪਾਸ ਤੋਂ ਪੁੱਛਗਿੱਛ ਕੀਤੀ। ਥਾਣਾ ਮੁਖੀ ਪਰਮਿੰਦਰ ਸਿੰਘ ਨੇ ਕਿਹਾ ਕਿ ਇਹ ਪ੍ਰਵਾਸੀ ਪਰਵਾਰ ਇਥੇ ਕਾਫੀ ਸਮੇਂ ਤੋਂ ਕਿਰਾਏ 'ਤੇ ਰਹਿੰਦਾ ਹੈ। ਮ੍ਰਿਤਕਾ ਤੇ ਉਸ ਦਾ ਛੋਟਾ ਭਰਾ ਦੋਵੇਂ ਕੁਝ ਦਿਨ ਪਹਿਲਾਂ ਆਪਣੇ ਪਿੰਡ ਅਸੂਰ ਜ਼ਿਲਾ ਸੁਜਾਨਪੁਰ ਯੂ ਪੀ ਤੋਂ ਵਾਪਸ ਆਏ ਸਨ। ਇਨ੍ਹਾਂ ਦੇ ਮਾਤਾ ਪਿਤਾ ਓਥੇ ਹਨ ਤੇ ਮ੍ਰਿਤਕਾ ਦੀਆਂ ਦੋ ਵੱਡੀਆਂ ਭੈਣਾਂ ਵਿਦੇਸ਼ 'ਚ ਹਨ।