ਜਲੰਧਰ, 17 ਦਸੰਬਰ (ਪੋਸਟ ਬਿਊਰੋ)- ਜਾਇਦਾਦ ਕਾਰੋਬਾਰੀਆਂ, ਹੋਟਲ ਮਾਲਕਾਂ ਤੇ ਜੂਏਬਾਜ਼ੀ ਦੇ ਧੰਦੇ ਵਾਲੇ ਲੋਕਾਂ ਵੱਲੋਂ ਆਪਣੇ ਕੰਮ ਕਢਵਾਉਣ ਲਈ ਕੁਝ ਪੁਲਸ ਅਫਸਰਾਂ ਨੂੰ ਮਹਿੰਗੇ ਤੋਹਫੇ ਦੇਣਾ ਆਮ ਗੱਲ ਹੈ। ਇਨ੍ਹਾਂ ਲੋਕਾਂ ਵੱਲੋਂ ਕੁਝ ਪੁਲਸ ਅਫਸਰਾਂ ਨੂੰ ਮਹਿੰਗੀਆਂ ਕਾਰਾਂ, ਮੋਬਾਈਲ ਫੋਨ, ਘੁੰਮਣ ਫਿਰਨ ਲਈ ਰਮਣੀਕ ਥਾਵਾਂ ਲਈ ਹਵਾਈ ਟਿਕਟਾਂ ਅਤੇ ਹੋਟਲਾਂ ਦੇ ਵਾਊਚਰ ਸਮੇਤ ਤੋਹਫੇ ਦਿੱਤੇ ਜਾਣ ਦੀਆਂ ਰਿਪੋਰਟਾਂ ਤੋਂ ਬਾਅਦ ਪਤਾ ਲੱਗਾ ਹੈ ਕਿ ਸਰਕਾਰ ਨੇ ਤੋਹਫੇ ਲੈਣ ਤੇ ਆਮਦਨ ਤੋਂ ਵਧੇਰੇ ਖਰਚ ਕਰਨ ਵਾਲੇ ਅਧਿਕਾਰੀਆਂ ਉੱਤੇ ਸ਼ਿਕੰਜਾ ਕੱਸਣ ਦਾ ਫੈਸਲਾ ਲਿਆ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਇਹ ਰਿਪੋਰਟਾਂ ਤੋਂ ਬਾਅਦ ਪਤਾ ਲੱਗਾ ਹੈ ਕਿ ਐਸ ਐਚ ਓ ਪੱਧਰ ਤੋਂ ਐਸ ਪੀ ਰੈਂਕ ਤੱਕ ਦੇ ਅਧਿਕਾਰੀ ਕਰੋੜ ਰੁਪਏ ਤੱਕ ਦੀਆਂ ਮਰਸੀਡੀਜ਼ ਕਾਰਾਂ ਦੇ ਝੂਟੇ ਲੈਂਦੇ ਹਨ ਤੇ ਕਈ ਲੋਕਾਂ ਦੇ ਹੱਥਾਂ ਵਿੱਚ ਤਿੰਨ-ਤਿੰਨ ਲੱਖ ਰੁਪਏ ਤੱਕ ਦੇ ਮੋਬਾਈਲ ਫੋਨ ਫੜੇ ਹੁੰਦੇ ਹਨ। ਇਨ੍ਹਾਂ ਅਧਿਕਾਰੀਆਂ ਦੀ ਜਾਇਦਾਦ ਕਾਰੋਬਾਰੀਆਂ ਨਾਲ ਨੇੜਤਾ ਅਕਸਰ ਦੇਖੀ ਜਾਂਦੀ ਹੈ। ਇਹ ਵੀ ਰਿਪੋਰਟਾਂ ਹਨ ਕਿ ਅਧਿਕਾਰੀਆਂ ਵੱਲੋਂ ਵਰਤੀਆਂ ਜਾਂਦੀਆਂ ਮਹਿੰਗੀਆਂ ਕਾਰਾਂ, ਫੋਨ ਤੇ ਹੋਰ ਵਸਤਾਂ ਸਬੰਧਤ ਅਧਿਕਾਰੀਆਂ ਦੇ ਆਪਣੇ ਨਾਵਾਂ ਦੀ ਥਾਂ ਹੋਰ ਨਾਵਾਂ 'ਤੇ ਲਈਆਂ ਜਾਂਦੀਆਂ ਹਨ। ਇਹ ਰਿਪੋਰਟਾਂ ਤੋਂ ਪਤਾ ਲੱਗਾ ਹੈ ਕਿ ਮੁੱਖ ਮੰਤਰੀ ਦਫਤਰ ਨੇ ਖੁਫੀਆ ਵਿਭਾਗ ਨੂੰ ਸਾਰੇ ਪੰਜਾਬ ਵਿੱਚੋਂ ਅਜਿਹੇ ਅਫਸਰਾਂ ਦੀਆਂ ਸੂਚੀਆਂ ਬਣਾਉਣ ਦੀ ਹਦਾਇਤ ਕੀਤੀ ਹੈ ਤੇ ਖੁਫੀਆ ਵਿਭਾਗ ਦੇ ਅਧਿਕਾਰੀ ਇਸ ਲਈ ਸਰਗਰਮ ਦੱਸੇ ਜਾਂਦੇ ਹਨ। ਪਤਾ ਲੱਗਾ ਹੈ ਕਿ ਅੰਮ੍ਰਿਤਸਰ, ਜਲੰਧਰ, ਲੁਧਿਆਣਾ ਤੇ ਮੁਹਾਲੀ ਵਰਗੇ ਵੱਡੇ ਸ਼ਹਿਰਾਂ ਵਿੱਚ ਕਈ ਪੁਲਸ ਅਫਸਰਾਂ ਦੀ ਕਾਲੋਨੀਆਂ ਕੱਟਣ ਵਾਲਿਆਂ ਨਾਲ ਹਿੱਸੇਦਾਰੀ ਹੈ ਤੇ ਕਈ ਅਧਿਕਾਰੀਆਂ ਨੂੰ ਗਾਹੇ ਬਗਾਹੇ ਮਦਦ ਲਈ ਵੱਡੇ ਤੋਹਫੇ ਦਿੱਤੇ ਜਾਂਦੇ ਹਨ। ਪਿਛਲੇ ਦਿਨਾਂ ਵਿੱਚ ਮਾਲਵਾ ਖੇਤਰ ਦੇ ਇਕ ਐਸ ਐਸ ਪੀ ਵੱਲੋਂ ਪੁਲਸ ਹੈਡਕੁਆਰਟਰ ਦੇ ਕਈ ਅਫਸਰਾਂ ਨੂੰ ਮਹਿੰਗੇ ਮੋਬਾਈਲ ਵੰਡੇ ਜਾਣ ਦੀ ਵੀ ਚਰਚਾ ਰਹੀ ਹੈ। ਦੁਆਬਾ ਖੇਤਰ ਦਾ ਇਕ ਸਾਬਕਾ ਪੁਲਸ ਇੰਸਪੈਕਟਰ ਕਰੀਬ ਇਕ ਕਰੋੜ ਰੁਪਏ ਦੀ ਮਹਿੰਗੀ ਕਾਲੇ ਰੰਗ ਦੀ ਲੈਂਡ ਰੋਵਰ ਕਾਰ ਲੈ ਕੇ ਘੁੰਮਦਾ ਰਿਹਾ ਹੈ ਤੇ ਇਹ ਕਾਰ ਉਸ ਵੱਲੋਂ ਡਰੱਗ ਦੇ ਕੇਸ 'ਚ ਫੜੇ ਰਾਜਾ ਕੰਦੋਲਾ ਤੋਂ ਖੋਹੀ ਹੋਈ ਦੱਸੀ ਜਾਂਦੀ ਹੈ।