ਬੈਂਕਾਕ, 17 ਦਸੰਬਰ (ਪੋਸਟ ਬਿਊਰੋ)- ਫਿਲਪੀਨ ਦੀ ਕੈਟ੍ਰਿਆਨੋ ਗ੍ਰੇ ਨੇ ਸੋਮਵਾਰ ਨੂੰ ਇੱਥੇ ਮਿਸ ਯੂਨੀਵਰਸ 2018 ਖਿਤਾਬ ਆਪਣੇ ਨਾਂ ਕਰ ਲਿਆ। ਲਾਲ ਰੰਗ ਦਾ ਗਾਊਨ ਪਾ ਕੇ ਗ੍ਰੇ ਨੂੰ ਪਿਛਲੇ ਸਾਲ ਦੀ ਮਿਸ ਯੂਨੀਵਰਸ ਡੈਮੀ ਨੀਲ-ਪੀਟਰਸ ਨੇ ਤਾਜ ਪਾਇਆ। ਬੈਂਕਾਕ `ਚ ਹੋਏ ਮੁਕਾਬਲੇ `ਚ 93 ਦੇਸ਼ਾਂ ਦੀਆਂ ਸੁੰਦਰੀਆਂ ਨੇ ਹਿੱਸਾ ਲਿਆ ਸੀ।
ਦੱਖਣੀ ਅਫਰੀਕਾ ਦੀ ਤਮਾਰੀਨ ਗ੍ਰੀਨ ਦੂਜੇ ਅਤੇ ਵੈਨੇਜ਼ੁਏਲਾ ਦੀ ਸਟੈਫਨੀ ਗੁਤੀਰੇਜ ਤੀਜੇ ਥਾਂ ਰਹੀ। ਭਾਰਤ ਦੀ ਨੇਹਾ ਚੂੜਾਸਮਾ ਪ੍ਰਮੁੱਖ 20 ਉਮੀਦਵਾਰਾਂ `ਚ ਆਪਣੀ ਥਾਂ ਨਹੀਂ ਬਣਾ ਸਕੀ। ਮਜ਼ਬੂਤ ਔਰਤਾਂ ਥੀਮ `ਤੇ ਹੋਏ ਇਸ ਸਾਲ ਦੇ ਮੁਕਾਬਲੇ ਦੀ ਜੱਜ ਸੱਤ ਔਰਤਾਂ ਸਨ। ਇਨ੍ਹਾਂ `ਚ ਸਾਬਕਾ ਮਿਸ ਵਰਲਡ, ਮਿਸ ਯੂਨੀਵਰਸ, ਫੈਸ਼ਨ ਡਿਜ਼ਾਈਨਰ ਅਤੇ ਸਨਅਤਕਾਰ ਸ਼ਾਮਲ ਸਨ। ਅਮਰੀਕਾ ਦੇ ਬੋਸਟਨ ਦੇ ਬਰਕਲੇ ਕਾਲਜ ਆਫ ਮਿਊਜ਼ਿਕ ਤੋਂ ਪੜ੍ਹੀ ਗਾਇਕਾ ਤੇ ਮਾਡਲ ਗ੍ਰੇ ਮਿਸ ਯੂਨੀਵਰਸ ਬਣਨ ਵਾਲੀ ਫਿਲੀਪੀਂਸ ਦੀ ਚੌਥੀ ਔਰਤ ਹਨ। ਮਿਸ ਯੂਨੀਵਰਸ ਦਾ ਤਾਜ ਪਾਉਣ ਦੇ ਬਾਅਦ ਬਹੁਤ ਉਤਸ਼ਾਹਤ ਗ੍ਰੇ ਨੇ ਕਿਹਾ ਕਿ ਜਦੋਂ ਮੈਂ 13 ਸਾਲ ਦੀ ਸੀ ਤਾਂ ਮੇਰੀ ਮਾਂ ਨੇ ਮੈਨੂੰ ਕਿਹਾ ਸੀ ਕਿ ਉਹ ਮੈਨੂੰ ਲਾਲ ਰੰਗ ਦੀ ਡਰੈੱਸ `ਚ ਮਿਸ ਯੂਨੀਵਰਸ ਦਾ ਤਾਜ ਪਾ ਕੇ ਦੇਖਣਾ ਚਾਹੁੰਦੀ ਹੈ। ਗ੍ਰੇ ਨੇ ਕਿਹਾ ਕਿ ਉਨ੍ਹਾਂ ਦਾ ਗਾਊਨ ਉਨ੍ਹਾਂ ਦੀ ਮਾਂ ਦੇ ਮੂਲ ਸੂਬੇ ਐਲਬਾਈ ਦੇ ਮਾਯੋਨ ਜਵਾਲਾਮੁਖੀ ਤੋਂ ਪ੍ਰੇਰਿਤ ਹੈ।
ਉਸ ਦੀ ਜਿੱਤ `ਤੇ ਫਿਲਪੀਨ ਦੇ ਰਾਸ਼ਟਰਪਤੀ ਰੋਡ੍ਰਿਗੋ ਦੁਰਤੇਤੇ ਨੇ ਉਨ੍ਹਾਂ ਨੂੰ ਵਧਾਈ ਦਿੱਤੀ। ਉਨ੍ਹਾਂ ਨੇ ਕਿਹਾ ਕਿ ਗ੍ਰੇ ਨੇ ਦਿਖਾ ਦਿੱਤਾ ਕਿ ਸਾਡੇ ਦੇਸ਼ ਦੀਆਂ ਔਰਤਾਂ ਆਪਣੀ ਮਿਹਨਤ ਅਤੇ ਜਜ਼ਬੇ ਨਾਲ ਆਪਣਾ ਹਰ ਸੁਪਨਾ ਪੂਰਾ ਕਰ ਸਕਦੀਆਂ ਹਨ। ਸਪੇਨ ਦੀ ਐਂਜੇਲਾ ਪੋਂਸ ਮਿਸ ਯੂਨੀਵਰਸ ਮੁਕਾਬਲੇ `ਚ ਹਿੱਸਾ ਲੈਣ ਵਾਲੀ ਪਹਿਲੀ ਟਰਾਂਸਜੈਂਡਰ ਔਰਤ ਬਣ ਗਈ ਹੈ। ਇਕ ਵੀਡੀਓ `ਚ ਪੋਂਸ ਨੇ ਕਿਹਾ ਕਿ ਮੈਨੂੰ ਖਿਤਾਬ ਨਹੀਂ ਜਿੱਤ ਸਕਣ ਦਾ ਕੋਈ ਮਲਾਲ ਨਹੀਂ ਹੈ। ਇਸ ਮੁਕਾਬਲੇ ਦਾ ਹਿੱਸਾ ਬਣਨਾ ਹੀ ਮੇਰੀ ਸਫਲਤਾ ਹੈ।