ਤਲ ਅਵੀਵ, 17 ਦਸੰਬਰ (ਪੋਸਟ ਬਿਊਰੋ)- ਸੋਸ਼ਲ ਮੀਡੀਆ ਫੇਸਬੁੱਕ ਨੇ ਮੁਸਲਿਮ ਵਿਰੋਧੀ ਪੋਸਟ ਲਈ ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਦੇ ਬੇਟੇ ਯਾਈਰ ਦਾ ਅਕਾਊਂਟ ਐਤਵਾਰ ਨੂੰ 24 ਘੰਟੇ ਲਈ ਬਲਾਕ ਕਰ ਦਿੱਤਾ। ਫੇਸਬੁੱਕ ਦੇ ਇਸ ਕਦਮ ਦੀ ਯਾਈਰ ਨੇ ਸਖ਼ਤ ਨਿਖੇਧੀ ਕੀਤੀ ਹੈ।
ਯਾਈਰ ਨੇ ਪਿਛਲੇ ਹਫ਼ਤੇ ਵੈਸਟ ਬੈਂਕ ਇਲਾਕੇ `ਚ ਇਜ਼ਰਾਈਲ ਦੇ ਦੋ ਫ਼ੌਜੀਆਂ ਦੀ ਹੱਤਿਆ ਤੋਂ ਬਾਅਦ ਆਪਣੇ ਫੇਸਬੁੱਕ ਪੋਸਟ ਵਿੱਚ ਫ਼ੌਜੀਆਂ ਦੀ ਹੱਤਿਆ ਦਾ ਬਦਲਾ ਲੈਣ ਅਤੇ ਸਾਰੇ ਮੁਸਲਮਾਨਾਂ ਨੂੰ ਦੇਸ਼ ਛੱਡ ਦੇਣ ਲਈ ਕਿਹਾ ਸੀ। ਫੇਸਬੁੱਕ ਨੇ ਇਸ ਪੋਸਟ ਨੂੰ ਡਿਲੀਟ ਕਰਨ ਦੇ ਨਾਲ ਉਨ੍ਹਾਂ ਦਾ ਅਕਾਊਂਟ ਵੀ ਦਿਨ ਭਰ ਲਈ ਬਲਾਕ ਕਰ ਦਿੱਤਾ। ਯਾਈਰ ਨੇ ਇਸ `ਤੇ ਟਵੀਟ ਕੀਤਾ ਕਿ ‘ਇਕ ਘਟਨਾ ਦਾ ਆਲੋਚਨਾ ਕਰਨ ਲਈ ਫੇਸਬੁੱਕ ਨੇ ਮੈਨੂੰ ਬਲਾਕ ਕਰ ਦਿੱਤਾ। ਇਹ ਤਾਨਾਸ਼ਾਹੀ ਹੈ।` ਇਕ ਹੋਰ ਟਵੀਟ `ਚ ਉਨ੍ਹਾਂ ਲਿਖਿਆ; `ਕੀ ਤੁਸੀਂ ਜਾਣਦੇ ਹੋ ਕਿ ਦੁਨੀਆ ਦੇ ਕਿਸ ਦੇਸ਼ `ਚ ਕੋਈ ਅੱਤਵਾਦੀ ਹਮਲਾ ਨਹੀਂ ਹੁੰਦਾ? ਆਈਸਲੈਂਡ ਤੇ ਜਾਪਾਨ ਵਿੱਚ। ਹੈਰਾਨੀ ਦੀ ਗੱਲ ਹੈ ਕਿ ਓਥੇ ਕੋਈ ਮੁਸਲਮਾਨ ਨਹੀਂ ਹੈ।’ ਉਨ੍ਹਾਂ ਨੂੰ ਬਲਾਕ ਕੀਤੇ ਜਾਣ ਉੱਤੇ ਫੇਸਬੁੱਕ ਨੇ ਕੋਈ ਟਿੱਪਣੀ ਨਹੀਂ ਕੀਤੀ। ਯਾਈਰ ਪਹਿਲਾਂ ਵੀ ਆਪਣੇ ਵਿਵਾਦਤ ਪੋਸਟ ਕਾਰਨ ਚਰਚਾ `ਚ ਰਹੇ ਹਨ। 2017 `ਚ ਉਨ੍ਹਾਂ ਨੇ ਯਹੂਦੀ ਅਰਬਪਤੀ ਜਾਰਜ ਸੋਰੋਸ ਦਾ ਇਕ ਕਾਰਟੂਨ ਪੋਸਟ ਕੀਤਾ ਸੀ ਜਿਸ ਵਿਚ ਉਨ੍ਹਾਂ ਨੂੰ ਸੱਪ ਵਾਂਗ ਦਿਖਾਇਆ ਗਿਆ ਸੀ।