ਵਾਸ਼ਿੰਗਟਨ, 14 ਦਸੰਬਰ (ਪੋਸਟ ਬਿਊਰੋ)- ਆਈ ਐੱਮ ਐੱਫ ਦੇ ਇੱਕ ਅਫਸਰ ਮੁਤਾਬਕ ਅੰਤਰਰਾਸ਼ਟਰੀ ਮਾਨੀਟਰੀ ਫੰਡ (ਆਈ ਐੱਮ ਐੱਫ) ਪਾਕਿਸਤਾਨ ਨੂੰ ਕਰਜ਼ ਦੇਣ ਤੋਂ ਪਹਿਲਾਂ ਉਸ ਦੀ ਸਮਰੱਥਾ ਦਾ ਵਿਸ਼ਲੇਸ਼ਣ ਕਰੇਗਾ।
ਅਸਲ ਵਿਚ ਪਾਕਿਸਤਾਨ ਨੇ ਆਈ ਐੱਮ ਐੱਫ ਤੋਂ 8 ਅਰਬ ਡਾਲਰ ਦੇ ਰਾਹਤ ਪੈਕੇਜ ਦੀ ਮੰਗ ਕੀਤੀ ਹੈ। ਇਸ ਸਬੰਧ ਵਿਚ ਆਈ ਐੱਮ ਐੱਫ ਦੀ ਚਿੰਤਾ ਇਹ ਹੈ ਕਿ ਕਿਤੇ ਪਾਕਿਸਤਾਨ ਇਸ ਰਾਸ਼ੀ ਦੀ ਵਰਤੋਂ ਆਪਣੇ ਉੱਪਰ ਚੀਨ ਦੇ ਕਰਜ਼ੇ ਨੂੰ ਉਤਾਰਨ ਲਈ ਨਾ ਕਰੇ। ਇਸ ਲਈ ਆਈ ਐੱਮ ਐੱਫ ਵੱਲੋਂ ਉਸ ਦੀ ਕਰਜ਼ ਭੁਗਤਾਨ ਸਮਰੱਥਾ ਦੀ ਡੂੰਘੀ ਘੋਖ ਕਰਨ ਦੀ ਗੱਲ ਮਹੱਤਵ ਪੂਰਨ ਹੋ ਜਾਂਦੀ ਹੈ। ਪਾਕਿਸਤਾਨ ਨੇ ਪੈਕੇਜ ਦੀ ਮੰਗ ਆਪਣੇ ਨਕਦੀ ਸੰਕਟ ਅਤੇ ਭੁਗਤਾਨ ਸੰਕਟ ਨਾਲ ਨਜਿੱਠਣ ਲਈ ਕੀਤੀ ਹੈ। ਉਸ ਦੀ ਅਰਥ ਵਿਵਸਥਾ ਮਾੜੇ ਦੌਰ ਵਿਚ ਹੈ। ਆਈ ਐੱਮ ਐੱਫ ਦੇ ਅਧਿਕਾਰੀ ਗੈਰੀ ਰਾਈਸ ਨੇ ਕੱਲ੍ਹ ਏਥੇ ਪ੍ਰੈੱਸ ਕਾਨਫਰੰਸ ਵਿਚ ਕਿਹਾ, ‘ਕਿਸੇ ਦੇਸ਼ ਦੀ ਕਰਜ਼ ਸਮਰੱਥਾ ਦਾ ਯੋਗ ਮੁਲੰਕਣ ਕਰਾਉਣ ਲਈ ਉਸ ਦੇਸ਼ ਦੇ ਕਰਜ ਬਾਰੇ ਪਾਰਦਰਸ਼ਿਤਾ ਲਾਜਮੀ ਹੈ। ਜਦੋਂ ਅਸੀਂ ਆਪਣੇ ਮੈਂਬਰ ਦੇਸ਼ਾਂ ਨਾਲ ਏਦਾਂ ਦੇ ਪ੍ਰੋਗਰਾਮ ਵਿਚ ਸ਼ਾਮਲ ਹੁੰਦੇ ਹਾਂ ਤਾਂ ਇਸ ਤਰ੍ਹਾਂ ਦਾ ਵਿਸ਼ਲੇਸ਼ਣ ਕੀਤਾ ਜਾਂਦਾ ਹੈ, ਇਹੋ ਪਾਕਿਸਤਾਨ ਬਾਰੇ ਵੀ ਕਰਾਂਗੇ।`