ਐਸ ਏ ਐਸ ਨਗਰ, 14 ਦਸੰਬਰ (ਪੋਸਟ ਬਿਊਰੋ)- ਪੰਜਾਬ ਸਕੂਲ ਸਿੱਖਿਆ ਬੋਰਡ ਡਿਪਟੀ ਡਾਇਰੈਕਟਰ ਦਾ ਅਹੁਦਾ ਘਟਾਉਣ ਦੀ ਕੋਸ਼ਿਸ਼ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਬੋਰਡ ਦੇ ਸਕੱਤਰ ਨੇ ਡਿਪਟੀ ਡਾਇਰੈਕਟਰ ਓਪਨ ਸਕੂਲਜ਼ ਰਮਿੰਦਰਜੀਤ ਸਿੰਘ ਵਾਸੂ ਨੂੰ ਓਪਨ ਸਕੂਲਜ਼ ਤੋਂ ਲਾਂਭੇ ਕਰਕੇ ਦੁਬਾਰਾ ਇਕ ਸੈਲ ਦਾ ਇੰਚਾਰਜ ਲਾਉ ਦੇ ਹੁਕਮ ਜਾਰੀ ਕਰ ਦਿੱਤੇ ਹਨ। ਸੈਕਟਰੀ ਵੱਲੋਂ ਜਾਰੀ ਪੱਤਰ ਵਿੱਚ ਬਦਲੀ ਦਾ ਕਾਰਨ ਪ੍ਰਬੰਧਕੀ ਦੱਸਿਆ ਗਿਆ ਹੈ, ਪਰ ਬੋਰਡ ਵੱਲੋਂ ਕੀਤੇ ਗਏ ਇਸ ਫੈਸਲੇ ਨੂੰ ਮਾਹਰਾਂ ਨੇ ਧੱਕੇਸ਼ਾਹੀ ਵਾਲਾ ਕੰਮ ਦੱਸਿਆ ਹੈ।
ਵਰਨਣ ਯੋਗ ਹੈ ਕਿ ਪੰਜਾਬ ਸਕੂਲ ਸਿੱਖਿਆ ਬੋਰਡ ਦੇ ਸੀਨੀਅਰ ਮੋਸਟ ਵਿਸ਼ਾ ਮਾਹਰ ਰਮਿੰਦਰਜੀਤ ਸਿੰਘ ਵਾਸੂ ਨੂੰ ਦਸੰਬਰ 2014 ਵਿੱਚ ਤਨਖਾਹ ਵਿੱਚ ਤਰੱਕੀ ਨਾ ਦੇ ਕੇ ਡਿਪਟੀ ਡਾਇਰੈਕਟਰ ਓਪਨ ਸਕੂਲਜ਼ ਕੇਵਲ ਚਾਰਜ ਦਿੱਤਾ ਗਿਆ, ਜਿਸ ਮਗਰੋਂ ਓਪਨ ਸਕੂਲ ਪ੍ਰਣਾਲੀ ਅਧੀਨ ਵਿਦਿਆਰਥੀਆਂ ਦੀ ਗਿਣਤੀ ਵਿੱਚ ਵਾਧਾ ਹੋਇਆ ਅਤੇ ਅਗਲੇ ਤਿੰਨ ਸਾਲਾਂ ਵਿੱਚ ਵਿਦਿਆਰਥੀਆਂ ਦੀ ਗਿਣਤੀ ਲਗਭਗ 33 ਫੀਸਦੀ ਵਧ ਗਈ। ਓਦੋਂ ਦੇ ਚੇਅਰਮੈਨ ਕ੍ਰਿਸ਼ਨ ਕੁਮਾਰ, ਆਈ ਏ ਐਸ ਨੇ ਅਕਤੂਬਰ 2017 ਵਿੱਚ ਵਿਸ਼ਾ ਮਾਹਰ ਕਮ ਡਿਪਟੀ ਡਾਇਰੈਕਟਰ ਓਪਨ ਸਕੂਲ ਰਮਿੰਦਰਜੀਤ ਸਿੰਘ ਨੂੰ ਡਿਪਟੀ ਡਾਇਰੈਕਟਰ ਪਬਲੀਕੇਸ਼ਨ ਦਾ ਚਾਰਜ ਵੀ ਦਿੱਤਾ, ਜੋ ਮਈ 2018 ਤੱਕ ਨਵੇਂ ਅਕਾਦਮਿਕ ਸਾਲ ਦੀਆਂ 200 ਤੋਂ ਵੱਧ ਪੁਸਤਕਾਂ ਅਪ੍ਰੈਲ ਤੱਕ ਤਿਆਰ ਕਰਕੇ ਦਿੰਦੇ ਹੋਏ ਰਮਿੰਦਰਜੀਤ ਸਿੰਘ ਨੇ ਪੂਰਾ ਕਰ ਦਿੱਤਾ। ਫਿਰ ਵਾਸੂ ਦੇ ਕੋਲੋਂ ਡਿਪਟੀ ਡਾਇਰੈਕਟਰ ਪਬਲੀਕੇਸ਼ਨ ਦਾ ਚਾਰਜ ਵਾਪਸ ਲੈ ਲਿਆ ਗਿਆ ਤੇ ਤਿੰਨ ਦਸੰਬਰ 2018 ਨੂੰ ਵਿਸ਼ਾ ਮਾਹਰ ਕਮ ਡਿਪਟੀ ਡਾਇਰੈਕਟਰ ਓਪਨ ਸਕੂਲਜ਼ ਨੂੰ ਲੋਕ ਸੰਪਰਕ ਦਾ ਚਾਰਜ ਦੇ ਦਿੱਤਾ ਗਿਆ ਜੋ ਪੰਜ ਦਸੰਬਰ ਦੇ ਹੁਕਮ ਰਾਹੀਂ ਬਿਨਾਂ ਕੋਈ ਕਾਰਨ ਦੱਸੇ ਫਿਰ ਵਾਪਸ ਲੈ ਲਿਆ ਗਿਆ। ਸਾਰੇ ਵਰਤਾਰੇ ਤੋਂ ਇੰਝ ਜਾਪ ਰਿਹਾ ਹੈ ਕਿ ਸਿੱਖਿਆ ਬੋਰਡ ਦੇ ਅਧਿਕਾਰੀ ਇਹ ਫੈਸਲੇ ਜਲਦਬਾਜ਼ੀ ਵਿੱਚ ਲੈ ਰਹੇ ਹੋਣਗੇ।
ਬੀਤੇ ਸੋਮਵਾਰ 10 ਦਸੰਬਰ 2018 ਨੂੰ ਹੁਕਮ ਜਾਰੀ ਕਰਕੇ ਪੰਜਾਬ ਸਕੂਲ ਸਿੱਖਿਆ ਬੋਰਡ ਦੇ ਚੇਅਰਮੈਨ ਨੇ ਵਿਸ਼ਾ ਮਾਹਰ ਰਮਿੰਦਰਜੀਤ ਸਿੰਘ ਵਾਸੂ ਤੋਂ ਓਪਨ ਸਕੂਲ ਦਾ ਚਾਰਜ ਖੋਹ ਕੇ ਲੋਕ ਸੰਪਰਕ ਦਾ ਚਾਰਜ ਦੇਣ ਲਈ ਹੁਕਮ ਜਾਰੀ ਕਰ ਦਿੱਤਾ। ਸਮਝਿਆ ਜਾਂਦਾ ਹੈ ਕਿ ਪੰਜਾਬ ਸਕੂਲ ਸਿੱਖਿਆ ਬੋਰਡ ਦਾ ਓਪਨ ਸਕੂਲ ਪੂਰਾ ਵਿਭਾਗ ਹੈ ਜੋ ਡਿਪਟੀ ਡਾਇਰੈਕਟਰ ਪੱਧਰ ਦੇ ਅਫਸਰ ਵੱਲੋਂ ਚਲਾਇਆ ਜਾਂਦਾ ਹੈ ਤੇ ਲੋਕ ਸੰਪਰਕ ਇਕ ਸੈਲ ਹੈ ਜਿਹੜਾ ਸੀਨੀਅਰ ਸਹਾਇਕ ਪੱਧਰ ਦੇ ਮੁਲਾਜ਼ਮ ਵੱਲੋਂ ਚਲਾਇਆ ਜਾਂਦਾ ਹੈ। ਇਸ ਲਈ ਸੀਨੀਅਰ ਮੋਸਟ ਵਿਸ਼ਾ ਮਾਹਰ ਤੋਂ ਬਿਨਾਂ ਕਿਸੇ ਕਾਰਨ ਓਪਨ ਸਕੂਲ ਖੋਹ ਕੇ ਛੋਟੇ ਰੁਤਬੇ ਦਾ ਦਫਤਰ ਦੇਣਾ ਅਤੇ ਸੀਨੀਆਰਤਾ ਸੂਚੀ ਵਿੱਚ ਉਸ ਤੋਂ ਜੂਨੀਅਰ ਵਿਸ਼ਾ ਮਾਹਰ ਨੂੰ ਓਪਨ ਸਕੂਲ ਵਿਭਾਗ ਦੇਣਾ, ਸੀਨੀਆਰਤਾ ਸੂਚੀ ਦੀ ਸਰਾਸਰ ਅਦੁਲੀ ਹੈ।