ਇਸਲਾਮਾਬਾਦ, 13 ਦਸੰਬਰ, (ਪੋਸਟ ਬਿਊਰੋ)- ਪਾਕਿਸਤਾਨ ਸੁਪਰੀਮ ਕੋਰਟ ਨੇ ਵੀਰਵਾਰ ਨੂੰ ਦੇਸ਼ ਦੇ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਦੀ ਭੈਣ ਅਲੀਮਾ ਖਾਨਮ ਨੂੰ ਇਕ ਹਫ਼ਤੇ ਦੇ ਅੰਦਰ 2,940 ਕਰੋੜ ਰੁਪਏ ਟੈਕਸ ਅਤੇ ਜੁਰਮਾਨੇ ਦੇ ਰੂਪ ਵਿਚ ਜਮ੍ਹਾਂ ਕਰਾਉਣ ਦਾ ਆਦੇਸ਼ ਦਿਤਾ ਹੈ। ਦੇਸ਼ ਦੀ ਸਭ ਤੋਂ ਵੱਡੀ ਅਦਾਲਤ ਨੇ ਇਹ ਆਦੇਸ਼ ਵਿਦੇਸ਼ਾਂ ਵਿਚ ਜਾਇਦਾਦ ਰੱਖਣ ਦੇ ਇਕ ਕੇਸ ਦੀ ਸੁਣਵਾਈ ਦੇ ਦੌਰਾਨ ਦਿਤਾ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਖਾੜੀ ਦੇ ਦੇਸ਼ ਯੂ ਏ ਈ ਵਿਚ ਜਾਇਦਾਦ ਰੱਖਣ ਵਾਲੇ 44 ਰਾਜਸੀ ਰਸੂਖ ਵਾਲੇ ਲੋਕਾਂ ਦੇ ਵਿਰੁਧ ਕੇਸ ਦੀ ਸੁਣਵਾਈ ਦੌਰਾਨ ਤਿੰਨ ਜੱਜਾਂ ਦੀ ਬੈਂਚ ਨੇ ਕਿਹਾ ਕਿ ਜੇ ਖਾਨਮ ਕੋਰਟ ਦੇ ਫ਼ੈਸਲੇ ਦਾ ਸਨਮਾਨ ਨਹੀਂ ਕਰਦੀ ਤਾਂ ਉਸ ਦੀ ਜਾਇਦਾਦ ਜ਼ਬਤ ਕਰ ਲਈ ਜਾਵੇ। ਫੈਡਰਲ ਬੋਰਡ ਆਫ਼ ਰੈਵੇਨਿਊ (ਐਫ ਬੀ ਆਰ) ਨੇ ਅਦਾਲਤ ਨੂੰ ਕਿਹਾ ਕਿ ਖਾਨਮ ਉਤੇ 2,940 ਕਰੋੜ ਰੁਪਏ ਦਾ ਜੁਰਮਾਨਾ ਤੇ ਟੈਕਸ ਲਾਇਆ ਗਿਆ ਹੈ। ਉਨ੍ਹਾਂ ਦੀ ਪਛਾਣ ਵਿਦੇਸ਼ ਦੀ ਇਸ ਜਾਇਦਾਦ ਦੇ ਬੇਨਾਮੀ ਮਾਲਕ ਦੇ ਰੂਪ ਵਿਚ ਹੋਈ ਹੈ।
ਆਪਣੇ ਵਕੀਲ ਨਾਲ ਅਦਾਲਤ ਵਿਚ ਪੇਸ਼ ਹੋਈ ਅਲੀਮਾ ਖਾਨਮ ਨੇ ਅਦਾਲਤ ਨੂੰ ਦੱਸਿਆ ਕਿ 2008 ਵਿਚ ਉਨ੍ਹਾਂ ਨੇ 3,70,000 ਡਾਲਰ ਦੀ ਜਾਇਦਾਦ ਖਰੀਦੀ ਅਤੇ 2017 ਵਿਚ ਵੇਚ ਦਿਤੀ ਸੀ। ਇਸ ਤੋਂ ਪਹਿਲਾਂ ਸੁਣਵਾਈ ਵਿਚ ਐਫ ਬੀ ਆਰ ਨੇ ਅਦਾਲਤ ਨੂੰ ਖਾਨਮ ਦੀ ਜਾਇਦਾਦ ਅਤੇ ਟੈਕਸ ਵੇਰਵਾ ਦੇ ਦਿਤਾ ਸੀ।