ਮੁੰਬਈ, 13 ਦਸੰਬਰ (ਪੋਸਟ ਬਿਊਰੋ)- ਭਾਰਤ ਦੇ ਤਿੰਨ ਵੱਡੇ ਹਿੰਦੀ ਭਾਸ਼ਾਈ ਰਾਜਾਂ ਵਿੱਚ ਭਾਜਪਾ ਦੀ ਹਾਰ 'ਤੇ ਚੋਟ ਕਰਦਿਆਂ ਸ਼ਿਵ ਸੈਨਾ ਨੇ ਕਿਹਾ ਕਿ ਚੋਣ ਨਤੀਜੇ ਦੱਸਦੇ ਹਨ ਕਿ ਇਨ੍ਹਾਂ ਰਾਜਾਂ ਦੀ ਜਨਤਾ ਨੇ ਭਾਜਪਾ ਮੁਕਤ ਦਾ ਸੰਦੇਸ਼ ਦਿੱਤਾ ਹੈ, ਜਿਸ ਨੂੰ ਸਮਝਣ ਦੀ ਲੋੜ ਇਸ ਪਾਰਟੀ ਨੂੰ ਹੈ।
ਸਿ਼ਵ ਸੈਨਾ ਦੇ ਰਸਾਲੇ ਦੀ ਸੰਪਾਦਕੀ ਵਿੱਚ ਲਿਖਿਆ ਗਿਆ ਹੈ ਕਿ ਲੋਕਾਂ ਨੇ ਜ਼ਿਆਦਾ ਉੱਚਾ ਉੱਡਣ ਵਾਲਿਆਂ ਨੂੰ ਫਰਸ਼ ਵਿਖਾ ਦਿੱਤਾ ਹੈ। ਰਿਜ਼ਰਵ ਬੈਂਕ ਦੇ ਗਵਰਨਰ ਉਰਜਿਤ ਪਟੇਲ ਦੇ ਅਸਤੀਫੇ ਬਾਰੇ ਕਿਹਾ ਗਿਆ ਕਿ ਦੇਸ਼ ਨੂੰ ਚਾਰ ਪੰਜ ਕਾਰੋਬਾਰੀਆਂ ਦੇ ਦਿਮਾਗ ਨਾਲ ਚਲਾਇਆ ਜਾਣ ਕਾਰਨ ਰਿਜ਼ਰਵ ਬੈਂਕ ਵਰਗੀ ਸੰਸਥਾ ਟੁੱਟ ਰਹੀ ਹੈ। ਸਿ਼ਵ ਸੈਨਾ ਨੇ ਕਿਹਾ ਕਿ ਪ੍ਰਧਾਨ ਮੰਤਰੀ ਮੋਦੀ ਅਤੇ ਅਮਿਤ ਸ਼ਾਹ ਨੇ ‘ਕਾਂਗਰਸ ਮੁਕਤ ਭਾਰਤ’ ਦਾ ਜਿਹੜਾ ਸੁਫਨਾ ਵੇਖਿਆ ਸੀ, ਇਨ੍ਹਾਂ ਨਤੀਜਿਆਂ ਤੋਂ ਉਹ ਸੁਫਨਾ ਭਾਜਪਾ ਸ਼ਾਸਿਤ ਰਾਜਾਂ ਵਿੱਚ ਮਿੱਟੀ ਵਿੱਚ ਮਿਲ ਗਿਆ ਹੈ। ਉਨ੍ਹਾ ਕਿਹਾ ਕਿ ਸਰਕਾਰ ਸਿਰਫ ਚੋਣਾਂ ਲੜ ਕੇ ਜਿੱਤਣ ਲਈ ਹੁੰਦੀ ਹੈ, ਇਸ ਦੇਸ਼ ਵਿੱਚ ਭਾਜਪਾ ਤੋਂ ਇਲਾਵਾ ਅਤੇ ਕੋਈ ਦਲ ਨਾ ਟਿਕੇ ਅਤੇ ਨਾ ਬਚੇ, ਇਸ ਰਵੱਈਏ ਦੀ ਹਾਰ ਚਾਰ ਰਾਜਾਂ ਵਿੱਚ ਹੋਈ ਹੈ।