ਟੋਰਾਂਟੋ, 28 ਜੁਲਾਈ (ਪੋਸਟ ਬਿਊਰੋ) : ਕੋਵਿਡ-19 ਮਹਾਂਮਾਰੀ ਦੀ ਮਾਰ ਸਹਿ ਰਹੇ ਲੋਕਲ ਰੈਸਟੋਰੈਂਟਸ ਦੀ ਮਦਦ ਕਰਨ ਲਈ ਸਿਟੀ ਆਫ ਟੋਰਾਂਟੋ ਵੱਲੋਂ ਇੱਕ ਨਵਾਂ ਪ੍ਰੋਗਰਾਮ ਡਾਈਨ ਟੁਗੈਦਰ ਸੁ਼ਰੂ ਕੀਤਾ ਗਿਆ ਹੈ।
ਇਸ ਪ੍ਰੋਗਰਾਮ ਵਿੱਚ ਹਿੱਸਾ ਲੈਣ ਵਾਲੀਆਂ ਈਟਰੀਜ਼ ਵੱਲੋਂ ਇੱਕ ਮੈਨਿਊ ਤਿਆਰ ਕੀਤਾ ਜਾਵੇਗਾ,ਜਿਹੜਾ ਲੋਕਾਂ ਨੂੰ ਲੋਕਲ ਰੈਸਟੋਰੈਂਟਸ ਵਿੱਚ ਖਾਣ ਲਈ ਉਤਸ਼ਾਹਿਤ ਕਰੇਗਾ। ਇਹ ਖਾਣਾ ਟੇਕਆਊਟ, ਡਲਿਵਰੀ, ਪੈਟੀਓ ਜਾਂ ਇੰਡੋਰ ਡਾਈਨਿੰਗ ਲਈ ਵੀ ਉਪਲਬਧ ਹੋਵੇਗਾ। ਬੁੱਧਵਾਰ ਨੂੰ ਇੱਕ ਪ੍ਰੈੱਸ ਕਾਨਫਰੰਸ ਵਿੱਚ ਮੇਅਰ ਟੋਰੀ ਨੇ ਆਖਿਆ ਕਿ ਇਸ ਨੂੰ ਵਿੰਟਰਲੀਸ਼ੀਅਸ ਜਾਂ ਸਮਰਲੀਸ਼ੀਅਸ ਕਿਸਮ ਦੇ ਪ੍ਰੋਗਰਾਮ ਦਾ ਅਪਡੇਟ ਮੰਨਿਆ ਜਾਵੇ। ਪਰ ਇਸ ਦਾ ਮੰਤਵ ਇੱਕੋ ਹੈ ਤੇ ਉਹ ਹੈ ਸਾਡੇ ਰੈਸਟੋਰੈਂਟ ਤੇ ਹੌਸਪਿਟੈਲਿਟੀ ਬਿਜ਼ਨਸ ਦੀ ਮਦਦ ਕਰਨਾ, ਜੋ ਕਿ ਇਸ ਸਮੇਂ ਮੁਸ਼ਕਲਾਂ ਵਿੱਚੋ ਲੰਘ ਰਿਹਾ ਹੈ।
ਰੈਸਟੋਰੈਂਟਸ ਨੂੰ ਦੋ ਕੋਰਸ ਮੈਨਿਊ ਪੇਸ਼ ਕਰਨਾ ਹੋਵੇਗਾ, ਜਿਨ੍ਹਾਂ ਵਿੱਚ ਮੇਨ ਡਿਸ਼ ਦੇ ਨਾਲ ਨਾਲ ਜਾਂ ਤਾਂ ਐਪੇਟਾਈਜ਼ਰ ਹੋਣਾ ਜ਼ਰੂਰੀ ਹੋਵੇਗਾ ਤੇ ਜਾਂ ਫਿਰ ਡਿਜ਼ਰਟ। ਇਸ ਮੈਨਿਊ ਵਿੱਚ ਦਿੱਤੇ ਜਾਣ ਵਾਲੇ ਖਾਣੇ ਦੀਆਂ ਕੀਮਤਾਂ 15 ਡਾਲਰ ਤੋਂ 50 ਡਾਲਰ ਦਰਮਿਆਨ ਹੋਣੀਆਂ ਚਾਹੀਦੀਆਂ ਹਨ। ਇਹ ਮੈਨਿਊ ਲੰਚ ਜਾਂ ਡਿਨਰ ਜਾਂ ਦੋਵਾਂ ਲਈ ਪੇਸ਼ ਕੀਤਾ ਜਾ ਸਕਦਾ ਹੈ। ਇਸ ਪ੍ਰੋਗਰਾਮ ਦੇ ਸਬੰਧ ਵਿੱਚ ਅਰਜ਼ੀਆਂ 4 ਅਗਸਤ ਤੋਂ ਸਵੀਕਾਰੀਆਂ ਜਾਣੀਆਂ ਸ਼ੁਰੂ ਹੋਣਗੀਆਂ ਤੇ 31 ਅਗਸਤ ਨੂੰ ਬੰਦ ਕਰ ਦਿੱਤੀਆਂ ਜਾਣਗੀਆਂ। ਇਹ ਪ੍ਰੋਗਰਾਮ 17 ਸਤੰਬਰ ਤੋਂ 3 ਅਕਤੂਬਰ ਤੱਕ ਚਲਾਇਆ ਜਾਵੇਗਾ।