300,000 ਵਿਦਿਆਰਥੀਆਂ ਨੇ ਵੀ ਅਜੇ ਨਹੀਂ ਲਵਾਈ ਪਹਿਲੀ ਡੋਜ਼
ਓਨਟਾਰੀਓ, 27 ਜੁਲਾਈ (ਪੋਸਟ ਬਿਊਰੋ) : ਓਨਟਾਰੀਓ ਦੇ ਚੀਫ ਮੈਡੀਕਲ ਆਫੀਸਰ ਆਫ ਹੈਲਥ ਦਾ ਕਹਿਣਾ ਹੈ ਕਿ ਕੋਵਿਡ-19 ਖਿਲਾਫ ਜਾਰੀ ਲੜਾਈ ਦੇ ਆਖਰੀ ਗੇੜ ਵਿੱਚ ਹੁਣ ਪ੍ਰੋਵਿੰਸ ਪਹੁੰਚ ਚੁੱਕਿਆ ਹੈ।1·8 ਮਿਲੀਅਨ ਲੋਕਾਂ ਵਿੱਚ, ਜਿਨ੍ਹਾਂ ਵਿੱਚ 300,000 ਵਿਦਿਆਰਥੀ ਵੀ ਆਉਂਦੇ ਹਨ, ਵੈਕਸੀਨ ਸਬੰਧੀ ਹਿਚਕਿਚਾਹਟ ਨੂੰ ਖ਼ਤਮ ਕਰਨ ਲਈ ਸਰਕਾਰ ਤੋਂ ਜੋ ਬਣ ਸਕਦਾ ਸੀ ਉਹ ਕਰ ਰਹੀ ਹੈ।
ਡਾ· ਕੀਰਨ ਮੂਰ ਨੇ ਆਖਿਆ ਕਿ ਰੋਜ਼ਾਨਾ ਹੋ ਰਹੀ ਵੈਕਸੀਨੇਸ਼ਨ ਵਿੱਚ ਵਾਧਾ ਹੋਣ ਦੇ ਬਾਵਜੂਦ 10 ਵਿੱਚੋਂ 2 ਓਨਟਾਰੀਓ ਵਾਸੀ ਅਜੇ ਵੀ ਅਜਿਹੇ ਹਨ ਜਿਨ੍ਹਾਂ ਦੇ ਪਹਿਲੀ ਡੋਜ਼ ਨਹੀਂ ਲੱਗੀ ਹੈ। ਉਨ੍ਹਾਂ ਆਖਿਆ ਕਿ ਜਿਨ੍ਹਾਂ ਲੋਕਾਂ ਨੇ ਟੀਕੇ ਦੀ ਇੱਕ ਵੀ ਡੋਜ਼ ਨਹੀਂ ਲਵਾਈ ਉਨ੍ਹਾਂ ਦੇ ਕੋਵਿਡ-19 ਦੀ ਚਪੇਟ ਵਿੱਚ ਆਉਣ ਦਾ ਖ਼ਤਰਾ 6·4 ਗੁਣਾ ਵੱਧ ਹੈ ਬਜਾਇ ਉਨ੍ਹਾਂ ਦੇ ਜਿਨ੍ਹਾਂ ਨੇ ਵੈਕਸੀਨ ਦੀ ਘੱਟੋ ਘੱਟ ਇੱਕ ਡੋਜ਼ ਲਵਾਈ ਹੈ।
ਫੈਮਿਲੀ ਡਾਕਟਰ ਡਾ· ਜੈਨੀਫਰ ਕਵੈਨ ਵੱਲੋਂ ਦੋ ਤਾਜ਼ਾ ਰਿਪੋਰਟਾਂ ਦਾ ਸਹਾਰਾ ਲੈਂਦਿਆਂ ਹੋਇਆ ਅਜਿਹੇ ਲੋਕਾਂ ਦਾ ਖਰੜਾ ਤਿਆਰ ਕੀਤਾ ਗਿਆ ਜਿਹੜੇ ਵੈਕਸੀਨੇਸ਼ਨ ਕਰਵਾਉਣ ਤੇ ਬਿਨਾਂ ਵੈਕਸੀਨੇਸ਼ਨ ਕਰਵਾਇਆਂ ਪਿਛਲੇ ਮਹੀਨੇ ਹਸਪਤਾਲ ਦਾਖਲ ਹੋਏ ਜਾਂ ਮਰ ਗਏ। ਉਨ੍ਹਾਂ ਪਾਇਆ ਕਿ 12 ਜੂਨ ਤੇ 10 ਜੁਲਾਈ ਦਰਮਿਆਨ ਓਨਟਾਰੀਓ ਵਿੱਚ ਹੋਈਆਂ 95·8 ਫੀ ਸਦੀ ਮੌਤਾਂ ਉਨ੍ਹਾਂ ਲੋਕਾਂ ਦੀਆਂ ਸਨ ਜਿਨ੍ਹਾਂ ਨੇ ਟੀਕਾਕਰਣ ਨਹੀਂ ਸੀ ਕਰਵਾਇਆ।ਇਸ ਤੋਂ ਇਲਾਵਾ ਵਾਇਰਸ ਕਾਰਨ ਹਸਪਤਾਲ ਦੇ ਆਈ ਸੀ ਯੂ ਵਾਰਡ ਵਿੱਚ ਭਰਤੀ ਹੋਣ ਵਾਲੇ 99·5 ਫੀ ਸਦੀ ਲੋਕਾਂ ਨੇ ਵੀ ਟੀਕਾਕਰਣ ਨਹੀਂ ਸੀ ਕਰਵਾਇਆ।
ਸੋਮਵਾਰ ਸਵੇਰੇ 8:00 ਵਜੇ ਤੱਕ ਓਨਟਾਰੀਓ ਵਿੱਚ ਕੋਵਿਡ-19 ਵੈਕਸੀਨ ਦੀਆਂ 92,035 ਡੋਜ਼ਾਂ ਲਾਈਆਂ ਜਾ ਚੁੱਕੀਆਂ ਸਨ।ਫੋਰਡ ਸਰਕਾਰ ਦਾ ਕਹਿਣਾ ਹੈ ਕਿ 12 ਸਾਲ ਤੋਂ ਵੱਧ ਉਮਰ ਦੇ 79·82 ਫੀ ਸਦੀ ਓਨਟਾਰੀਓ ਵਾਸੀ ਆਪਣੀ ਪਹਿਲੀ ਡੋਜ਼ ਹਾਸਲ ਕਰ ਚੁੱਕੇ ਹਨ ਤੇ 66·74 ਫੀ ਸਦੀ ਨੂੰ ਦੂਜੀ ਡੋਜ਼ ਵੀ ਲੱਗ ਚੁੱਕੀ ਹੈ।
ਮੂਰ ਨੇ ਇੱਕ ਵਾਰੀ ਫਿਰ ਅਜੇ ਤੱਕ ਵੈਕਸੀਨੇਸ਼ਨ ਨਾ ਕਰਵਾਉਣ ਵਾਲੇ ਵਿਦਿਆਰਥੀਆਂ ਨੂੰ ਸਤੰਬਰ ਤੱਕ ਘੱਟੋ ਘੱਟ ਇੱਕ ਡੋਜ਼ ਲਵਾਉਣ ਲਈ ਆਖਿਆ। ਉਨ੍ਹਾਂ ਆਖਿਆ ਕਿ ਅਜੇ ਵੀ 300,000 ਵਿਦਿਆਰਥੀਆਂ ਨੂੰ ਅਗਸਤ ਦੇ ਲੌਂਗ ਵੀਕੈਂਡ ਤੋਂ ਪਹਿਲਾਂ ਵੈਕਸੀਨ ਦੀ ਪਹਿਲੀ ਡੋਜ਼ ਲਾਏ ਜਾਣ ਦੀ ਲੋੜ ਹੈ।