ਟੋਰਾਂਟੋ, 27 ਜੁਲਾਈ (ਪੋਸਟ ਬਿਊਰੋ) : ਡੈਨਫੋਰਥ ਉੱਤੇ ਸਥਿਤ ਜੰਪ ਫੌਰ ਜੌਏ ਪਲੇਅ ਸੈਂਟਰ ਮੁੜ ਖੁੱਲ੍ਹਣ ਜਾ ਰਿਹਾ ਹੈ ਤੇ ਇੱਥੋਂ ਦੀ ਹਰੇਕ ਥਾਂ ਨੂੰ ਸੈਨੇਟਾਈਜ਼ ਕੀਤਾ ਜਾ ਚੁੱਕਿਆ ਹੈ ਤੇ ਹਰ ਅਹਿਤਿਆਤ ਵਰਤੀ ਜਾ ਰਹੀ ਹੈ।
ਬੁੱਧਵਾਰ ਨੂੰ ਪੱਤਰਕਾਰਾਂ ਨਾਲ ਗੱਲ ਕਰਦਿਆਂ ਇਸ ਪਲੇਅ ਸੈਂਟਰ ਦੀ ਮਾਲਕ ਆਇਰੀਨ ਸਿਕੀਓਟਿਸ ਨੇ ਆਖਿਆ ਕਿ ਸੈਂਟਰ ਖੋਲ੍ਹਣ ਸਮੇਂ ਸਾਨੂੰ ਕਾਫੀ ਅਹਿਤਿਆਤ ਤੋਂ ਕੰਮ ਲੈਣਾ ਹੋਵੇਗਾ। ਸਾਨੂੰ ਅਜੇ ਵੀ ਹਰ ਕਦਮ ਫੂਕ ਫੂਕ ਕੇ ਰੱਖਣਾ ਹੋਵੇਗਾ।ਕੋਵਿਡ-19 ਮਹਾਂਮਾਰੀ ਕਾਰਨ 16 ਮਹੀਨੇ ਤੱਕ ਇੰਡੋਰ ਪਲੇਅ ਸੈਂਟਰ ਲੱਗਭਗ ਖਾਲੀ ਹੀ ਰਹੇ ਪਰ ਹੁਣ ਪ੍ਰੋਵਿੰਸ ਦੇ ਰੀਓਪਨਿੰਗ ਪਲੈਨ ਦੇ ਤੀਜੇ ਪੜਾਅ ਵਿੱਚ ਬੱਚਿਆਂ ਤੇ ਮਾਪਿਆਂ ਨੂੰ ਇਨ੍ਹਾਂ ਸੈਂਟਰਜ਼ ਵਿੱਚ ਜਾਣ ਦੀ ਇਜਾਜ਼ਤ ਦੇ ਦਿੱਤੀ ਗਈ ਹੈ।
ਇਹ ਸੈਂਟਰ ਚਲਾਏ ਜ਼ਰੂਰ ਜਾਣਗੇ ਪਰ ਇਨ੍ਹਾਂ ਵਿੱਚ ਬੱਚਿਆਂ ਦੀ ਗਿਣਤੀ ਘਟਾਉਣੀ ਹੋਵੇਗੀ, ਦੋ ਸਾਲ ਤੋਂ ਵੱਧ ਉਮਰ ਦੇ ਬੱਚਿਆਂ ਨੂੰ ਮਾਸਕ ਲਾਉਣਾ ਜ਼ਰੂਰੀ ਹੋਵੇਗਾ, ਕਾਂਟੈਕਟ ਟਰੇਸਿੰਗ, ਸੈਨੇਟਾਈਜਿ਼ੰਗ ਸਟੇਸ਼ਨਜ਼ ਤੇ ਸਕਰੀਨਿੰਗ ਆਦਿ ਸਾਰੇ ਮਾਪਦੰਡ ਸੈਂਟਰਜ਼ ਦੇ ਨਾਲ ਨਾਲ ਸਾਰੇ ਮਾਪਿਆਂ ਨੂੰ ਵੀ ਅਪਨਾਉਣੇ ਹੋਣਗੇ।ਕੈਨੇਡਾ ਵਿੱਚ ਇਸ ਸਮੇਂ 12 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਨੂੰ ਕੋਵਿਡ-19 ਵੈਕਸੀਨ ਦੇਣ ਦਾ ਕੋਈ ਇੰਤਜ਼ਾਮ ਨਹੀਂ ਹੈ ਤੇ ਪਬਲਿਕ ਹੈਲਥ ਅਧਿਕਾਰੀਆਂ ਵੱਲੋਂ ਇਸ ਗੱਲ ਉੱਤੇ ਜ਼ੋਰ ਦਿੱਤਾ ਜਾ ਰਿਹਾ ਹੈ ਕਿ ਵਾਇਰਸ ਤੋਂ ਬਚਣ ਲਈ ਅਹਿਤਿਆਤ ਵਰਤੇ ਜਾਣ ਦੀ ਲੋੜ ਹੈ।
ਰਾਇਰਸਨ ਸਕੂਲ ਆਫ ਆਕਿਊਪੇਸ਼ਨਲ ਐਂਡ ਪਬਲਿਕ ਹੈਲਥ ਦੇ ਪ੍ਰੋਫੈਸਰ ਥੌਮਸ ਟੈਨਕੇਟ ਨੇ ਆਖਿਆ ਕਿ ਜਿਨਾਂ ਹੋ ਸਕੇ ਭੀੜ ਤੋਂ ਬਚਣਾ ਚਾਹੀਦਾ ਹੈ ਤੇ ਜਿੱਥੇ ਬੱਚਿਆਂ ਨੂੰ ਬੇਹੱਦ ਨੇੜੇ ਜਾ ਕੇ ਇੱਕ ਦੂਜੇ ਦੇ ਸੰਪਰਕ ਵਿੱਚ ਆਉਣਾ ਪਵੇ ਉਥੋਂ ਵੀ ਦੂਰੀ ਬਣਾ ਕੇ ਰੱਖਣੀ ਚਾਹੀਦੀ ਹੈ।ਡਾਕਟਰ ਵੀ ਬੱਚਿਆਂ ਦੇ ਸੋਸ਼ਲ ਕਾਂਟੈਕਟਸ ਤੋ ਬਚਣ ਦੀ ਸਲਾਹ ਦਿੰਦੇ ਹਨ ਤਾਂ ਮਿੰਨੀ ਆਊਟਬ੍ਰੇਕਸ ਤੋਂ ਬਚਿਆ ਜਾ ਸਕੇ।
ਇਸ ਦੌਰਾਨ ਫਾਈਜ਼ਰ ਤੇ ਮੌਡਰਨਾ 12 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਉੱਤੇ ਕੋਵਿਡ-19 ਵੈਕਸੀਨ ਦੇ ਟ੍ਰਾਇਲ ਕਰ ਰਹੀ ਹੈ ਤੇ ਮਾਹਿਰਾਂ ਨੂੰ ਆਸ ਹੈ ਕਿ ਇਸ ਸਾਲ ਦੇ ਮੁੱਕਣ ਤੋਂ ਪਹਿਲਾਂ ਕੈਨੇਡਾ ਵਿੱਚ ਬੱਚਿਆਂ ਲਈ ਵੀ ਕੋਵਿਡ-19 ਵੈਕਸੀਨ ਦੇ ਸ਼ੌਟਸ ਉਪਲਬਧ ਹੋ ਜਾਣਗੇ।