ਵਾਸ਼ਿੰਗਟਨ, 26 ਜੁਲਾਈ (ਪੋਸਟ ਬਿਊਰੋ)- ਲਾਲ ਗ੍ਰਹਿ ਮੰਗਲ ਉੱਤੇ ਜੀਵਨ ਦੀ ਖੋਜ ਦੇ ਨਾਲ-ਨਾਲ ਰੋਟਰਕਰਾਫਟ ਟੈਕਨਾਲੋਜੀ ਨੂੰ ਟੈਸਟ ਕਰਨ ਗਏ ਹੈਲੀਕਾਪਟਰ ਇੰਜੈਨੁਈਟੀ ਨੇ ਇੱਕ ਹੋਰ ਮੁਕਾਮ ਹਾਸਲ ਕਰ ਲਿਆ ਹੈ। ਧਰਤੀ ਦੇ ਇਲਾਵਾ ਪਹਿਲੀ ਵਾਰ ਕਿਸੇ ਹੋਰ ਗ੍ਰਹਿ ਉੱਤੇ ਉਡਾਣ ਭਰਨ ਵਾਲੇ ਹੈਲੀਕਾਪਟਰ ਨੇ 10ਵੀਂ ਫਲਾਈਟ ਪੂਰੀ ਕਰ ਲਈ ਤੇ ਇਸ ਦੇ ਨਾਲ ਕੁੱਲ ਇੱਕ ਮੀਲ (1.2 ਕਿਲੋਮੀਟਰ) ਦੀ ਦੂਰੀ ਤੈਅ ਕਰ ਲਈ ਹੈ।
ਏਜੰਸੀ ਨੇ ਦੱਸਿਆ ਹੈ ਕਿ ਇਸ ਦੀ 10ਵੀਂ ਫਲਾਈਟ ਅੱਜ ਤਕ ਦੀ ਸਭ ਤੋਂ ਔਖੀ ਸੀ। ਇੰਜੈਨੁਈਟੀ ਨੇ 10ਵੀਂ ਫਲਾਈਟ ਲਈ ਰੇਜ਼ਡ ਰਿਜ਼ ਨਾਂਅ ਦੇ ਇਲਾਕੇ ਨੂੰ ਚੁਣਿਆ। ਇਸ ਦੌਰਾਨ ਸਭ ਤੋਂ ਵੱਧ 1.2 ਕਿਲੋਮੀਟਰ ਦੀ ਉਚਾਈ ਨੂੰ ਵੀ ਛੋਹਿਆ। ਫਲਾਈਟ ਪਿੱਛੋਂ ਹੈਲੀਕਾਪਟਰ ਆਪਣੇ ਟੇਕ ਆਫ ਜ਼ੋਨ ਤੋਂ 95 ਮੀਟਰ ਪੱਛਮ ਵੱਲ ਸੱਤਵੀਂ ਏਅਰਫੀਲਡ ਵਿੱਚ ਲੈਂਡ ਹੋਇਆ। ਇਸ ਨੇ ਹਵਾ ਵਿੱਚ 165.4 ਸੈਕਿੰਡ ਬਿਤਾਏ।ਇਸ ਤੋਂ ਪਹਿਲਾਂ 9ਵੀਂ ਫਲਾਈਟ ਦੇ ਦੌਰਾਨ ਇਸ ਹੈਲੀਕਾਪਟਰ ਨੇ ਦੋ ਮਿੰਟ ਅਤੇ 46 ਸੈਕਿੰਡ ਹਵਾ ਵਿੱਚ ਬਿਤਾਏ ਸਨ। ਇਸ ਦੇ ਲਈ ਇਹ ‘ਸੇਤਾਹ' ਨਾਂਅ ਦੇ ਖੇਤਰ ਤੋਂ ਲੰਘਿਆ। ਇਸ ਜਗ੍ਹਾ ਨੂੰ ਰੋਵਰ ਦੀ ਮਦਦ ਨਾਲ ਨੈਵੀਗੇਟ ਕਰਨਾ ਮੁਸ਼ਕਲ ਹੁੰਦਾ ਹੈ। ਅਜਿਹੇ ਸਮੇਂ ਵਿੱਚ ਰੋਟਰ ਕਰਾਫਟ ਟੈਕਨਾਲੋਜੀ ਕੰਮ ਆਉਂਦੀ ਹੈ। ਜਿੱਥੇ ਰੋਵਰ ਜਾਂ ਕਲਾਸ ਵਿੱਚ ਚੱਕਰ ਕੱਟ ਰਹੇ ਆਰਬੀਟਰ ਦੀਆਂ ਨਜ਼ਰਾਂ ਨਹੀਂ ਪਹੁੰਚ ਸਕਦੀਆਂ, ਉਥੇ ਇੰਜੈਨੁਈਟੀ ਪਹੁੰਚ ਜਾਂਦਾ ਹੈ।