ਮੈਲਬਰਨ, 13 ਦਸੰਬਰ (ਪੋਸਟ ਬਿਊਰੋ)- ਆਸਟਰੇਲੀਆ ਦੀ ਸਰਕਾਰ ਵੱਲੋਂ ਵੱਡੇ ਸ਼ਹਿਰਾਂ ਦੀ ਆਬਾਦੀ ਘਟਾਉਣ ਦੇ ਲਈ ਕਾਫੀ ਸਮੇਂ ਤੋਂ ਤਜਵੀਜ਼ ਰੱਖੀ ਸੀ ਅਤੇ ਅੱਗੋਂ ਇਸ 'ਤੇ ਅਮਲ ਸ਼ੁਰੂ ਹੋ ਗਿਆ ਹੈ। ਪੇਂਡੂ ਖੇਤਰਾਂ ਦੀ ਵਸੋਂ ਵਧਾਉਣ ਲਈ ਸਰਕਾਰ ਵੱਲੋਂ ਨਵੇਂ ਵਿਸੇਸ਼ ਵੀਜ਼ਿਆਂ ਦਾ ਐਲਾਨ ਕੀਤਾ ਗਿਆ ਹੈ ਕਿ ਜੋ ਪ੍ਰਵਾਸੀਆਂ ਲਈ ਪੱਕੀ ਨਾਗਰਿਕਤਾ 'ਚ ਕਾਫੀ ਸਹਾਈ ਸਿੱਧ ਹੋ ਸਕੇਗੀ।
ਇਸ ਵੀਜ਼ੇ ਵਿੱਚ ਸਰਕਾਰ ਵੱਲੋਂ ਕਾਫੀ ਸਾਰੀ ਨਰਮੀ ਵਰਤੀ ਜਾ ਸਕਦੀ ਹੈ। ਡੇਜੀਗਨੇਸ਼ਨ ਏਰੀਆ ਮਾਈਗ੍ਰੇਸ਼ਨ ਐਗਰੀਮੈਂਟਸ ਸਕੀਮ ਇਥੋਂ ਦੇ ਦੋ ਖੇਤਰਾਂ ਵਿਕਟੋਰੀਆ ਦੇ ਵਾਰਨਬਲ ਅਤੇ ਨਾਰਥਲ ਟੈਰੇਟਰੀ 'ਚ ਜਿਥੇ ਕਾਮਿਆਂ ਦੀ ਕਾਫੀ ਕਮੀ ਹੈ, ਉਥੇ ਆਬਾਦੀ 'ਚ ਵਾਧੇ ਦਾ ਕੰਮ ਕਰੇਗੀ ਅਤੇ ਉਥੇ ਜਿਸ ਤਰ੍ਹਾਂ ਕਿਸਾਨਾਂ ਨੂੰ ਲੇਬਰ ਦੀ ਪ੍ਰੇਸ਼ਾਨੀ ਆਉਂਦੀ ਹੈ, ਉਸ ਤੋਂ ਵੀ ਰਾਹਤ ਮਿਲੇਗੀ। 482 ਕਲਾਸ ਦਾ ਇਹ ਵੀਜ਼ਾ ਪੰਜ ਸਾਲ ਲਈ ਉਥੇ ਰਹਿਣ ਅਤੇ ਫਿਰ ਪੀ ਆਰ ਦੀ ਪੇਸ਼ਕਸ਼ ਕਰੇਗਾ। ਇਸ ਵੀਜ਼ੇ ਵਿੱਚ ਅੰਗਰੇਜ਼ੀ ਭਾਸ਼ਾ ਦੀ ਵੀ ਛੋਟ ਦਿੱਤੀ ਜਾ ਸਕਦੀ ਹੈ। ਪ੍ਰਵਾਸੀ ਕਾਮਿਆਂ ਨੂੰ ਚਾਰ ਸਾਲ ਤੱਕ ਉਥੇ ਕੰਮ ਕਰਨਾ ਪਵੇਗਾ ਅਤੇ ਇਸ ਤੋਂ ਬਾਅਦ ਉਹ ਰੁਜ਼ਗਾਰ ਦਾਤਾ ਨੂੰ ਸਪਾਂਸਰ ਕਰਨ ਦੀ ਅਰਜ਼ੀ ਦੇ ਸਕਣਗੇ। ਗ੍ਰਹਿ ਮਾਮਲਿਆਂ ਦੇ ਵਿਭਾਗ ਦਾ ਕਹਿਣਾ ਹੈ ਕਿ ਸਰਕਾਰ ਖੇਤਰੀ ਆਸਟਰੇਲੀਆ ਦੀਆਂ ਲੋੜਾਂ ਪੂਰੀਆਂ ਕਰਨ ਲਈ ਪੂਰੀ ਤਰ੍ਹਾਂ ਵਚਨਬੱਧ ਹੈ। ਇੰਮੀਗ੍ਰੇਸ਼ਨ ਵਿਭਾਗ ਪੇਂਡੂ ਖੇਤਰਾਂ ਦੀ ਵਸੋਂ ਵਧਾਉਣ ਲਈ ਕਈ ਪੇਸ਼ਕਸ਼ਾਂ ਕਰ ਸਕਦਾ ਹੈ।