ਸਟ੍ਰਾਸਬਰਗ, 13 ਦਸੰਬਰ (ਪੋਸਟ ਬਿਊਰੋ)- ਫਰਾਂਸ ਦੇ ਸਟ੍ਰਾਸਬਰਗ ਸ਼ਹਿਰ ਦੇ ਪ੍ਰਸਿੱਧ ਕ੍ਰਿਸਮਿਸ ਬਾਜ਼ਾਰ 'ਚ ਬੀਤੇ ਦਿਨੀਂ ਇਕ ਹਥਿਆਰਬੰਦ ਹਮਲਾਵਰ ਦੀ ਗੋਲੀਬਾਰੀ 'ਚ ਤਿੰਨ ਲੋਕਾਂ ਦੀ ਮੌਤ ਹੋ ਗਈ ਤੇ ਕਰੀਬ ਇਕ ਦਰਜਨ ਜ਼ਖਮੀ ਹੋ ਗਏ। ਬਾਜ਼ਾਰ ਦੇ ਦੁਆਲੇ ਗਸ਼ਤ ਕਰਦੇ ਸੁਰੱਖਿਆ ਕਰਮੀਆਂ ਨੇ ਹਮਲਾਵਰ 'ਤੇ ਜਵਾਬੀ ਗੋਲੀਆਂ ਚਲਾ ਕੇ ਉਸ ਨੂੰ ਜ਼ਖਮੀ ਕਰ ਦਿੱਤਾ, ਪਰ ਇਸ ਦੇ ਬਾਵਜੂਦ ਉਹ ਮੌਕੇ ਤੋਂ ਭੱਜਣ 'ਚ ਸਫਲ ਹੋ ਗਿਆ।
ਅਧਿਕਾਰੀਆਂ ਨੇ ਦੱਸਿਆ ਕਿ ਸ਼ੱਕੀ ਅੱਤਵਾਦੀਆਂ ਵਿੱਚ ਸ਼ਾਮਲ ਇਸ ਹਮਲਾਵਰ ਦਾ ਨਾਂਅ ਚੈਰਿਫ ਸੀ। ਉਸ ਨੂੰ ਛੇਤੀ ਗ੍ਰਿਫਤਾਰ ਕੀਤਾ ਜਾਣਾ ਸੀ, ਪਰ ਇਸ ਤੋਂ ਪਹਿਲਾਂ ਉਸ ਨੇ ਇਸ ਵਾਰਦਾਤ ਕਰ ਦਿੱਤੀ। ਕੈਪੀਟਲ ਆਫ ਕ੍ਰਿਸਮਿਸ ਕਹੇ ਜਾਣ ਵਾਲੇ ਸਟ੍ਰਾਸਬਰਗ ਵਿੱਚ ਕ੍ਰਿਸਮਿਸ ਮੌਕੇ ਹਜ਼ਾਰਾਂ ਲੋਕ ਇਕੱਠਾ ਹੁੰਦੇ ਹਨ। ਪਹਿਲਾਂ ਵੀ ਇਥੇ ਅੱਤਵਾਦੀ ਹਮਲੇ ਦੀ ਸ਼ੰਕਾ ਪ੍ਰਗਟਾਈ ਗਈ ਸੀ। ਇਸ ਹਮਲੇ ਨਾਲ ਪੂਰੇ ਦੇਸ਼ 'ਚ ਹੰਗਾਮਾ ਮੱਚ ਗਿਆ। ਹਮਲੇ ਦੇ ਕਈ ਘੰਟਿਆਂ ਬਾਅਦ ਤੱਕ ਲੋਕ ਦੁਕਾਨਾਂ ਅਤੇ ਘਰਾਂ ਵਿੱਚ ਲੁਕੇ ਰਹੇ।
ਸਟ੍ਰਾਸਬਰਗ ਵਿੱਚ ਯੂਰਪੀ ਪਾਰਲੀਮੈਂਟ 'ਚ ਮੌਜੂਦ ਆਗੂ ਵੀ ਉਥੇ ਰਹਿਣ ਨੂੰ ਮਜਬੂਰ ਸਨ। ਇਸ ਹਮਲੇ ਮਗਰੋਂ ਰਾਸ਼ਟਰਪਤੀ ਇਮੈਨੂਅਲ ਮੈਕਰੋਂ ਨੇ ਕੈਬਨਿਟ ਅਧਿਕਾਰੀਆਂ ਨਾਲ ਬੈਠਕ ਕੀਤੀ। ਫਰਾਂਸ ਦੇ ਨਾਗਰਿਕ ਫਰਵਰੀ 2015 ਦੇ ਪੈਰਿਸ ਅੱਤਵਾਦੀ ਹਮਲੇ ਨੂੰ ਹਾਲੇ ਤੱਕ ਨਹੀਂ ਭੁਲਾ ਪਾਏ। ਉਸ ਹਮਲੇ 'ਚ 130 ਲੋਕ ਮਾਰੇ ਗਏ ਸਨ।