ਟੋਰਾਂਟੋ, 13 ਦਸੰਬਰ (ਪੋਸਟ ਬਿਊਰੋ) : ਕੈਨੇਡਾ ਦੇ ਸੱਭ ਤੋਂ ਵੱਡੇ ਸ਼ਹਿਰ ਵਿੱਚ ਰਿਟੇਲ ਮੈਰੀਜੁਆਨਾ ਸ਼ਾਪਜ਼ ਨੂੰ ਇਜਾਜ਼ਤ ਦਿੱਤੀ ਜਾਵੇ ਜਾਂ ਨਹੀਂ ਇਸ ਬਾਰੇ ਟੋਰਾਂਟੋ ਦੇ ਕਾਉਂਸਲਰਜ਼ ਬਹਿਸ ਕਰਨ ਲਈ ਪੂਰੀ ਤਰ੍ਹਾਂ ਤਿਆਰ ਹਨ।
ਸਿਟੀ ਸਟਾਫ ਦਾ ਕਹਿਣਾ ਹੈ ਕਿ ਕਾਉਂਸਲਰਜ਼ ਪ੍ਰਾਈਵੇਟ ਤੌਰ ਉੱਤੇ ਚਲਾਏ ਜਾਣ ਵਾਲੇ ਮੈਰੀਜੁਆਨਾ ਸਟੋਰਜ਼ ਨੂੰ ਟੋਰਾਂਟੋ ਵਿੱਚ ਆਪਰੇਟ ਕਰਨ ਦੀ ਇਜਾਜ਼ਤ ਦੇ ਦੇਣੀ ਚਾਹੀਦੀ ਹੈ ਕਿਉਂਕਿ ਗੈਰਕਾਨੂੰਨੀ ਮਾਰਕਿਟ ਨੂੰ ਸ਼ਹਿ ਦੇਣ ਦੇ ਮਾੜੇ ਨਤੀਜੇ ਹੋ ਸਕਦੇ ਹਨ। ਇਹ ਮੁੱਦਾ ਕਾਉਂਸਲ ਮੀਟਿੰਗ ਦੇ ਏਜੰਡੇ ਉੱਤੇ ਹੈ। ਜਿ਼ਕਰਯੋਗ ਹੈ ਕਿ ਗੁਆਂਢੀ ਮਿਉਂਸਪੈਲਿਟੀਜ਼ ਵੱਲੋਂ ਮੈਰੀਜੁਆਨਾ ਸ਼ਾਪਜ਼ ਆਪਣੀ ਹੱਦ ਵਿੱਚ ਖੋਲ੍ਹਣ ਦਾ ਵਿਰੋਧ ਕੀਤੇ ਜਾਣ ਤੋਂ ਇੱਕ ਦਿਨ ਬਾਅਦ ਹੀ ਇਹ ਮੀਟਿੰਗ ਰੱਖੀ ਗਈ ਹੈ।
ਮਿਸੀਸਾਗਾ ਤੇ ਮਾਰਖਮ ਵਿੱਚ ਕਾਉਂਸਲਰਜ਼ ਨੇ ਬੁੱਧਵਾਰ ਨੂੰ ਪ੍ਰਾਈਵੇਟ ਤੌਰ ਉੱਤੇ ਆਪਰੇਟ ਕੀਤੇ ਜਾਣ ਵਾਲੇ ਰਿਟੇਲ ਮੈਰੀਜੁਆਨਾ ਸਟੋਰਜ਼ ਖੋਲ੍ਹੇ ਜਾਣ ਤੋਂ ਇਨਕਾਰ ਕਰ ਦਿੱਤਾ। ਅਗਲੇ ਸਾਲ ਬਹਾਰ ਤੱਕ ਅਜਿਹੇ ਸਟੋਰਜ਼ ਓਨਟਾਰੀਓ ਭਰ ਵਿੱਚ ਖੁੱਲ੍ਹਣ ਦੀ ਸੰਭਾਵਨਾ ਹੈ। ਮਿਸੀਸਾਗਾ ਦੀ ਮੇਅਰ ਬਯਨੀ ਕ੍ਰੌਂਬੀ ਤੇ ਮਾਰਖਮ ਦੇ ਫਰੈਂਕ ਸਕਾਰਪਿੱਟੀ ਨੇ ਆਖਿਆ ਕਿ ਕਈ ਅਜਿਹੇ ਸਵਾਲ ਹਨ ਜਿਨ੍ਹਾਂ ਦੇ ਜਵਾਬ ਅਜੇ ਤੱਕ ਨਹੀਂ ਮਿਲੇ।
ਟੋਰਾਂਟੋ ਦੇ ਮੇਅਰ ਜੌਹਨ ਟੋਰੀ ਦਾ ਕਹਿਣਾ ਹੈ ਕਿ ਉਹ ਮੈਰੀਜੁਆਨਾ ਸ਼ਾਪਜ਼ ਦੀ ਇਜਾਜ਼ਤ ਸਬੰਧੀ ਮਤਾ ਲਿਆਉਣ ਬਾਰੇ ਸੋਚ ਰਹੇ ਹਨ। ਉਨ੍ਹਾਂ ਸਵੀਕਾਰ ਕੀਤਾ ਕਿ ਜਿਹੋ ਜਿਹੇ ਹਾਲਾਤ ਇਸ ਸਮੇਂ ਹਨ ਉਸ ਤੋਂ ਉਹ ਸੰਤੁਸ਼ਟ ਨਹੀਂ ਹਨ।