ਅੰਕਾਰਾ, 13 ਦਸੰਬਰ (ਪੋਸਟ ਬਿਊਰੋ) : ਤੁਰਕੀ ਦੀ ਰਾਜਧਾਨੀ ਅੰਕਾਰਾ ਵਿੱਚ ਇੱਕ ਤੇਜ਼ ਰਫਤਾਰ ਰੇਲਗੱਡੀ ਰੇਲਵੇ ਇੰਜਣ ਨਾਲ ਟਕਰਾ ਕੇ ਸਟੇਸ਼ਨ ਉੱਤੇ ਰਾਹਗੀਰਾਂ ਦੇ ਲਾਂਘੇ ਲਈ ਬਣਾਏ ਗਏ ਓਵਰਪਾਸ ਵਿੱਚ ਜਾ ਵੱਜੀ, ਜਿਸ ਕਾਰਨ 9 ਵਿਅਕਤੀ ਮਾਰੇ ਗਏ ਜਦਕਿ 47 ਹੋਰ ਜ਼ਖ਼ਮੀ ਹੋ ਗਏ।
ਟਰਾਂਸਪੋਰਟ ਮੰਤਰੀ ਮਹਿਮਤ ਕਾਹਿਤ ਤੁਰਹਾਨ ਨੇ ਮੌਕੇ ਦਾ ਮੁਆਇਨਾ ਕਰਨ ਤੋਂ ਬਾਅਦ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਦੱਸਿਆ ਕਿ ਇਹ ਘਟਨਾ ਸਵੇਰੇ 6:00 ਵਜੇ ਵਾਪਰੀ। ਗੱਡੀ ਅੰਕਾਰਾ ਤੋਂ ਤੁਰਕੀ ਦੇ ਸੈਂਟਰ ਸ਼ਹਿਰ ਕੋਨਿਆ ਜਾ ਰਹੀ ਸੀ ਜਦੋਂ ਉਸ ਦੀ ਆਹਮੋ ਸਾਹਮਣੀ ਟੱਕਰ ਇੰਜਣ ਨਾਲ ਹੋ ਗਈ। ਇਹ ਇੰਜਣ ਟਰੇਕਸ ਦੀ ਜਾਂਚ ਕਰ ਰਿਹਾ ਸੀ। ਤੇਜ਼ ਰਫਤਾਰ ਗੱਡੀ ਬਿਨਾਂ ਰੁਕੇ ਹੀ ਇਸ ਸਟੇਸ਼ਨ ਨੂੰ ਪਾਰ ਕਰਦੀ ਹੈ। ਘੱਟੋ ਘੱਟ ਦੋ ਬੋਗੀਆਂ ਲੀਹ ਤੋਂ ਲਹਿ ਗਈਆਂ ਤੇ ਗੱਡੀ ਓਵਰਪਾਸ ਵਿੱਚ ਜਾ ਵੱਜੀ ਤੇ ਓਵਰਪਾਸ ਗੱਡੀ ਉੱਤੇ ਆ ਡਿੱਗਿਆ।
ਤੁਰਹਾਨ ਨੇ ਦੱਸਿਆ ਕਿ ਹਾਦਸੇ ਵਿੱਚ ਤਿੰਨ ਇੰਜਣ ਡਰਾਈਵਰਾਂ ਤੇ ਛੇ ਯਾਤਰੀਆਂ ਦੀ ਮੌਤ ਹੋ ਗਈ। ਇੱਕ ਯਾਤਰੀ ਜ਼ਖ਼ਮਾਂ ਦੀ ਤਾਬ ਨਾ ਸਹਾਰਦਿਆਂ ਹੋਇਆਂ ਹਸਪਤਾਲ ਵਿੱਚ ਦਮ ਤੋੜ ਗਿਆ ਜਦਕਿ ਬਾਕੀਆਂ ਦੀ ਮੌਕੇ ਉੱਤੇ ਹੀ ਮੌਤ ਹੋ ਗਈ। ਟੀਵੀ ਦੀ ਫੁਟੇਜ ਵਿੱਚ ਐਮਰਜੰਸੀ ਸੇਵਾਵਾਂ ਨੂੰ ਯਾਤਰੀਆਂ ਨੂੰ ਬਚਾਉਂਦਿਆਂ ਵਿਖਾਇਆ ਗਿਆ ਹੈ। ਹੁਰੀਅਤ ਅਖਬਾਰ ਅਨੁਸਾਰ ਜਿਊਂਦੇ ਬਚੇ ਪਰ ਮਲਬੇ ਵਿੱਚ ਦੱਬੇ ਲੋਕਾਂ ਨੂੰ ਬਾਹਰ ਕੱਢਣ ਲਈ ਸੂਹੀਆ ਕੁੱਤਿਆਂ ਦੀ ਵੀ ਮਦਦ ਲਈ ਜਾ ਰਹੀ ਹੈ।
ਅਜੇ ਤੱਕ ਇਹ ਵੀ ਨਹੀਂ ਪਤਾ ਲੱਗ ਸਕਿਆ ਹੈ ਕਿ ਸਿਗਨਲ ਦੀ ਸਮੱਸਿਆ ਕਾਰਨ ਇਹ ਹਾਦਸਾ ਹੋਇਆ ਜਾਂ ਕਿਸੇ ਹੋਰ ਕਾਰਨ ਕਰਕੇ। ਅੰਕਾਰਾ ਦੇ ਗਵਰਨਰ ਵਾਸਿਪ ਸਾਹਿਨ ਨੇ ਆਖਿਆ ਕਿ ਮਾਮਲੇ ਦੀ ਤਕਨੀਕੀ ਜਾਂਚ ਸੁ਼ਰੂ ਕਰ ਦਿੱਤੀ ਗਈ ਹੈ।